(عطر الوادي)..

Part 10

ورجعت الكم بقصة (عطر الوادي)..

#الكاتبة_نمارق_الاسدي

#الكاتبة_N

يقال بأن القلوب تتلاقى قبل الأجساد.. ❤️✨

___________________________________

Part 10

اليوم هو بداية الشتاء و الدنيا كلش بارده و السماء مغيمه و اني مادري ملبست ملابس زينه علمود ادفى..

اليوم رادوني بالعماده و طلع عندي نقص بالتسجيل.. من صدك ردت الا شويه ابجي ماعرف شنو اسوي.. جلنار اجه اخوها عليها و راحت بقيت وحدي..

بالعماده و دا اكمل نقص التسجيل.. وجان تصير مطره كلش قويه.. و خلصت النقص و المطرة بعدها.. مادري شلون ثبتت على نفسي و ما بجيت..

شفت الأساتذة كلهم طلعوا و اني بقيت وحدي و الحراس ما اعرفهم اخاف منهم... كمت اخذت غراضي وطلعت و كلت الي يريد يصير خل يصير..

رجعت للبيت متنگعه من فوك ليجوى و حذائي صاير بي طين و ضعيتي وضعيه.. اول ما دخلت للبيت و كفخ بوجهي هواء دافي عطست..

ضربت كصتي وكلت هاهي من بدايتها مرضه شلون رح اكمل الشتاء مادري... اني من نوع الشتاء يبدأ منا و اني تلزمني المرضة منا.. و اوكع بالفراش..

و جسمي كلش نحس من ناحيه الأمراض.. بسرعه استقطب المرضه الي..

سجى: سلام عليكم ماما..

ام سجى: هله يمه ولج هاي شنو ملابسج مبلله كلها.. غير ترجعين من وكت قبل لاتصير المطره القويه.. روحي بسرعه بدلي لتتمرضين مرضتج نحسه..

سجى: شسوي يعني غير طلعتلي سالفة عرض.. اليوم خلصت من وكت المحاضرات و انطوني خبر انو اني ما مكمله التسجيل مالتي..رحت اكمل التسجيل اشو كبت المطره القويه.. شسوي بعد اني هاا..

ام سجى: هسه دروحي بدلي بسرعه..

سجى.. عفتها ورحت لغرفتي بسرعه نزعت ملابسي المبلله و ذبيتهن بالغساله...طبيت سبحت بماي دافي و طلعت لبست من هدومي الشتويه.. طلعت السشوار و جففت شعري..

نزلت جوى يم امي خطيه طابخه كبه برغل و شوربه وياها.. بحيث شويه دفيت جنت دا اكل.. و عطست جان امي تعيط..

ام سجى: ولج تمرضتي يا سجى..

سجى: جني يا أمي أخذت برد....

ام سجى: استغفرالله ذكريني اهدرلج بابونج و ليمون..

سجى: اوك ماما.. ولج رنا شونج ويه الإعدادية..

رنا: والله بعد توكلنا على الله والرابع اسهل من الثالث جان صعب المواد اسهل مالتنا هسة

سجى: الله يوفقج حبيبتي..

احنا اربع بنات.. اي اربع بنات عند امي و ابويه الي مشفنا يمكن رح يصير هسه سنتين مشايفي.. وحسب اقوال امي انو هو يتصل بيها و يسئل علينا بس ميلحك..