شمس: بابا.. ماما.. خليكم معايا.. ماتروحوش وتخلوني وحدي.. راني بقيت وحدي وحد ماسامع بيا.. تعيشو خليكم معايا.. باااابااا.. ماااامااا.. فاقت تعيط وتبكي بالصوت.. هو كي سمعها دخل يجري عندها.. جبدها لحضنو يسكت فيها حتى هدات بين يديه.. وعيط للطبيب لي عطالها إبرة مهدئ ورجعت رقدت..
نعرفكم على بطلنا
#أمير عبد الله وشكون مايعرفوش صاحب اكبر شركة استيراد وتصدير .. نوصفلكم أمير عندو عيون مارون تقققتل طويل وأسمر مش بزاف مي مايل للسمورا شعرو شاتان.. وهداك الكور لي عندو يا يما يا يما😍😍😍 بقلاوة معسلة بالعسل حر.. عمرو 30 سنة معروف ببرودة دمو والكل يخاف منو.. عندو اختو الصغيرة عايشة معاه اسمها
#اميرة والديهم سماوها كيفو.. عمرها 21 سنة يعني قد شمس تقرا فالجامعة مدرسة عليا.. أهلهم ماتو في حادث مرور.. وهدا بي أثر على أمير وخلاه يكون بارد خاطر كان شاهد على كلشي اما هدا القناع يسقط قدام اختو ويولي عبد آخر..
-أمير: دكتور طمني عليها..
-الطبيب: ماتقلقش جيست جاها انهيار عصبي.. الظاهر عندها ازمة نفسية قوية.. والحمد لله جات سلامات ولحقتها فالوقت..
-أمير: مرسي دكتور..يعطيك الصحة.
-الطبيب: بلا مزية هدا واجبي.. ربي يجيب الشفا.
نرجعو لشمس لي بدات تحل في عينيها وتشوف في كلشي ابيض وخيط لاصق في يدها.. فاقت لقاتو عند راسها..
-شمس: انا..انا.. وين راني.. شكون جابني..
-أمير : ماتخافيش راكي فالسبيطار.. تغاشيتي وجبتك لهنا..
شمس تفكرت لي صار بدات تبكي.. أمير غاضتو جبدها لعندو يمسحلها على ظهرها حتى هدات.. سكتت شمس ومبعد فاقت على وضعهم.. جبدت روحها منو..
-شمس: مرسي خويا لي سلكتني.. مزيتك عمري لا ننساها.
-أمير: بلا مزية.. مي فهميني واش كنتي ديري الوقت هداك تما..
-شمس:.........
-أمير: (فهمها).. معليش على راحتك..
هزت شمس روحها شويا وصار وقت خروجها.. عاونها أمير باش تخرج..
-أمير : اهلك وينهم باش نوصلك ليهم..
-شمس: ما.. ماعنديش أهلي.. مرت عمي طردتني من دارها..
أمير ساكت.. سخفتو حالتها.. ماحبش يزيد يسقسي باش مايضغطش عليها..
أنت تقرأ
تزوجني ليحميني (مكتملة)
Horrorكرونيك جديدة فيها حب ❤❤😍😍 غيرة.. حزن💔💔.. لقاء 💏💏💏 وطبعا بلا ماننساو شويا انحراف 🔞🔞🔞🔞🔞..كرونيك كلها تشويق
