تزوجني ليحميني (مكتملة)

الحلقة 13

اليوم .... يوم مخبي بزاف صدمات وبزاف أسرار... اليوم انعقد الاجتماع وفات بصعوبة لكن فالاخير النجاح لصالح حسام وأمير...وصار الوقت باش يرجعو للبلاد.... وكل واحد فيهم متشوق باش يشوف الإنسان لي يحبو...اما كل واحد خير الكتمان خاطرو خايف مايلقاش عند الطرف التاني نفس المشاعر....
وصلو للدار ريحو شويا باش يبداو تحضيرات حفلة النجاح.... وصل الليل والحفلة وجد كلش فيها باقي غير يجو الضيوف.... وابطالنا يوجدو في رواحهم.... امير لبس كوستيم بلونوي مع شوميز بيضا وبابيون نوار.... شمس لبست غوب طويلة مستورة فالنوار ستيل باربي خير هالها أمير خاطرو عارفها محجبة وخاطرو يغير عليها مع هي زينة بزاف ودرات ماكياج خفيف مع خيمار ساتان نوار ماحبتش تعري شعرها خرجت تحفة... هي ماكانتش حابة تحضر الحفلة اما اميرة وأمير سيفو عليها باش تحضر.... اميرة لبست غوب غوج قصيرة حد الركبة من القدام وطويلة من اللور وشعرها خلاتو مطلوق جيست دارت سلبات من القدام بالبابيليز جات تهبل هي تاني مع الماكياج الغامق لي دارتو... اما حسام لبس كوستيم نوار شوميز بيضا وبابيون نوار....
لحقت ال 21 بداو الضيوف يجو من رجال أعمال وناس كبار معروفين يباركولهم بنجاحهم منهم لي حاسدهم ومنهم لي فرحانلهم ومنهم لي يخطط باش يدمرهم... وجا خصوصا باش يجمع نقاط الضعف تاع أمير.... امير عندو اعداء بزاف مي هو عافس عليهم ومش معبرهم....مي هدا عدو حالف يدمرو راح تعرفوه من بعد.... هبطت اميرة وشمس والاضواء كامل عليهم أميرات بمعنى الكلمة....كل الضيوف بهتو مع زينهم خاصة شمس... اما أمير وحسام واش نحكيلهم فمهم محلول 😮😮 وعينيهم رجعو قلوب😍😍 من كتلة الزين لي قدامهم...
-امير : شمس جيتي تهبلي الله يبارك 🥰🥰🥰
-شمس: يعيشك أمير وانت تاني تهبل...😊😊😊
وحسام واميرة يحكو مع بعض هو باهت في زينها وهي تاني عاجبها مش قادرة تشوف معاه حشمانة تشوف لتحت لتحت برك....
حطو موسيقى هادئة وبداو ليكوبل يشطحو مع بعض.... حسام مع اميرة... وشمس وأمير يتفرجو... مبعد راح ليها طلب منها يشطحو مع بعض... وافقت بعد تردد... العينين كامل عليهم فيهم لي غايرين منها ومنهم لي فرحانلهم ومنهم لي مشوكي من أمير البارد كيفاش رجع.... مي كاين عينين تانيين يقدحو نار ويتوعدو بالانتقام والدمار....
كملت الاغنية وكملت الرقصة معاها.... وكل واحد شد بلاصتو.... شمس راحت تشرب كاس ما...