تزوجني ليحميني (مكتملة)

الحلقة 8

أمير بعد ماتغاشات شمس نسى هداك الكف ماحسش بروحو حتى كيفاش هزها وطار بيها لغرفتها.. لحقوهم جميلة واميرة.. أمير عيط للطبيب لي وصل بعد ربع ساعة... وعطاها إبرة باش ترقد....
امير: دكتور طمني...
الطبيب: الطفلة تعاني من انهيار عصبي والظاهر انو جايتها صدمة نفسية قوية...
أمير ندم نوعا ما حس روحو لي تسرع ودار حاجة بلا ماياخد رايها... اما هاد الشي مش معناه تهز يدها عليه.. وخمم مع نفسو انو يسألها ويعرف حكايتها كاملة كي تفيق... بعد ماراح الطبيب.. بقات جميلة مع شمس تمسحلها على شعرها... وشمس تتصبب بلعرق.. الظاهر قاعدة تشوف في كابوس...
اما أمير بقى قاعد فالصالون يخمم في حكاية صاحبة العيون القاتلة كيما سماها هو بينو وبين روحو... واميرة قاعدة معاه تحاول تفهم منو ..
-اميرة: في رايك شمس علاش دارت هكا... واش لي خلاها تعمل هاد الشي وتتجاوز الحدود ...
-امير: مانعرفش... وقت تفيق راح تفهمنا علاش دارت هكا... ودرك أميرتي اطلعي ترقدي الصباح عندك جامعة.
-اميرة: اوكي خويا لعزيز تصبح على خير...
-امير: ونتي من اهل الخير...
اميرة باست خوها وطلعت رقدت... وجميلة بعد ماطمنت على شمس راحت لغرفتها تريح... اما أمير بقى فالبيرو سهران يتكيف يخمم في شمس... وفجأة يسمع صوت بكا وعياط جاي من غرفة شمس...
راح يجري ليها لقاها تعيط على أهلها وتبكي... بدا يهدي فيها حتى هدات... بعد ماهدات عطالها كاس ما باش تريح... شربت ومبعد فاقت واش دارت معاه هبطت راسها حشمانة منو...
-امير: شمس احكيلي قصتك ماتخبيش عليا... فرغي قلبك بلاك ترتاحي...
- شمس: سامحني على التصرف تاعي مانعرفش كيفاش تجاوزت الحدود اما النهار هدا انا نكرهو... فالنهار هدا اللي انا ولدت فيه خسرت والديا... وقتها كان عمري 16سنة وقتها صار حريق في دارنا... هوما سلكوني اما هوما ماجاو يخرجو حتى تفجر التريسيتي وتفجرت الدار معاه... و... وخسرت والديا... راحت ماما يا أمير راح بابا وخلاوني وحدي اهئ.... اهئ 😭😭😭😭
أمير ماعرفش واش يقول جبدها لحضنو وخلاها تبكي في راحتها باش تريح...
أمير كان حاط في بالو غير هو الموجوع برك وغير هو لي يعاني من صدمة فقدان الأهل... اما شمس فصدمتها اكتر من صدمتو... على الاقل هو كان صغير ماعاشش معاهم بزاف... اما شمس خسرتهم وهي في سن المراهقة السن لي تحتاج دعمهم فيه...
فاق مع روحو لقى صوتها مكانش شاف معاها لقاها رقدت في حضنو...