ٌتغرِيدةً عَشـگ / مـگتملة

بارت ( 31 )

#تغريدة_عشك
للكاتبة #العنـود

=========================

ثاني يوم الصبح دنتريك واني كل تفكيري وين حسين جان يندك الباب كمت احمد فتح الباب لكينا سالم جاي ياخذ تقى
تقى كامت تبجي متريد تعوف بتهة
حنين:احمد خليها تأخذها
:ما اريد بتي تطلع مسمومة مثل امها
:احمد خطية مهما يكون هاي ام
وبالكوة قنعتة يلا وافق
اخذت نور وياها وراحت
وانيهم تأكدت أطفالي نايمين ووصيت باجي عليهم ورحت للكلية
بلشت المحاظرات
المحاظرة الثانية جان عدنة استاذ سالار من كمل محاظرتة ردت اطلع صاحلي يريد يحجي وياية
سالار:اذا ممكن تجين يمي بالمكتب احكي معاكِ بموضوع
حنين:تمام دكتور شوية واجي وراك
ورة شوية رحت لمكتبة دخلت وعفت الباب مفتوح
بدة يحجي وياية بالكردي لأن هوة عربيتة مكسرة (بس اني طبعآ حألقي الكم بالعربي 🙂😂)
سالار:عزيزتي حنين بدون لف ودوران اني معجب بيج ورايدج زوجة الي
:شنو دكتور؟؟
:مثل ما سمعتي
:دكتور بس اني مطلقة وعندي طفلين
:اعرف بهل شي بس مصير الأطفال يرجعون لوالدهم
:دكتور أطفالي مستحيل اتخلى عنهم لو مهما صار و اني اساسآ ما مفكرة بالزواج ابداً وهذا آخر كلام عندي
عفتة وكمت
ضربت آخر محاظرتين ورجعت للبيت لفيت راسي ونمت
كعدت الظهر على بجي ازولة كمت رضعتهة ورجعت نامت واني كعدت ادرس وورة شوية كمت عزلت البيت وغيرت لكيوني ملابسة ورحت اني وويا يم يقين سولفتلهة ع الصار وضحكت
رجعت للشقة المغرب صليت وبديت اساعد باجي بالعشة
ورة العشة بابا صاحلي وبدة يحجي وياية
بابا:اليوم اجاني للمعرض الدكتور مالتج
احمد:بس لا هذا سالار
بابا:ي هوة
احمد:خرب يومة ولا هضمتة
حنين:حتى اني والله لو تشوف بنات قسمي شلون ميتات عليي
بابا:المهم اني بنظري خوش رجال ومبي عيب
احمد:يابة عوفهة براحتهة بزواجتهة الاولى غصبتهة وهسة هم
بابا:ابني افهم مراح اغصبهة بس الى متى هية تبقى هيج
:بابا كلي اطفالج ترجعيهم لابوهم
:صحيح كال هيج وكلي ما انتظرتني اكمل كلامي وطلعت كال اني ما عندي اي أشكال اطفالهة يبقون عدها وبالنهاية هية ام بس اني ممسؤل عليهم
:بابا ما اريد اتزوج
:بنتي افهميني بس اطلعي مرة وحدة كعدي ويا عجبج عجبج ما عجبج ما بلازم
:بابا صدكني ما اريد مراغبة بيي ابدد
:بابا لخاطري هسة بس اكعدي ويا وشوفي
صفنت شوية
حنين: هاهية بابا اكول صدوك ماكو خبر عن حسين
:لا والله ماكو
:ماشي تصبحون على خير
كمت رحت للغرفة درست شوية ونمت ثاني يوم جمعة كعدت الصبح تريكو ونضفت وبدلت لأزل ويزن ورضعتهم
وصلني مسج من رقم غريب
:جهزي نفسك اليوم نتغدة بمطعم
عرفتة الدكتور سالار
صدوك ورة ساعة 12 كما جهزت نفسي وبدلت رمش عليه استغربت ليش ما اتصل
وصيت باجي على الجهال ونزلت
سلمت وصعدت بالسيارة
سالار:شلونج حنين
:الحمدالله دكتور
:هههه دكتور شنوو
:لعد شكول
:كولي سالار بدون رسميات احسن 
:تمام
:هسة وين تردين نروح
:بكيفك
:ماشي
كلت بكلبي هذا شبي دلح بعد حتى اكلك وين نروح
وداني لمطعم مدري شلونة
سالار:شطلبين؟
حنين:بكيفك
:تمام لعد حطلبلج على كيفي

اني بكلبي بس احجي عليي ميقدر اني خجلانة
حنين:بس اريد مي عطشت
سالار:تحملي شوية هسة يجي اللببسي ميحتاج مي
اني بقيت صافنة هذا شبي
اجة الطلب طالب نص دجاجة وثنين قواطي ببسي
تذكرت حسين من جنة نطلع اني وويا لمطعم جان يحير شيجيب وشيخلي ويكلي اكليي ختصير بيج لحمة
اباوع على سالار شلون ياكل عبالك اول مرة بحياتة يشوف دجاجة حتى لعب نفسي اكلت خاشوكتين تمن وانسدت نفسي من ورا
سالار:اكلي اكلي ليش متأكلين
بكلبي شاكل وانت لعبت روحي وخلصت الدجاجة
حنين:لا شكرآ شبعت
سالار:اي اني احب المرآة تكون رشيقة متاكل هواي اروح اغسل واجيج
بكلبي كلت شدعوة هيج ميصرف خاف مشايل فلوس
شوية واجة
سالار:يلا امشي بس خلي ادفع بالاول
باوعت على محفظتة من يطلع منها فلوس بيها خير من الله بعد ليش ميصرف
صعدنة بالسيارة وكعد يحجي عن نفسة هوة أبو كردي وامة نص عربي ونص كردي ويعرف شوية يحجي عربي وعندة 3 خوات ومتزوجات واخ طالب وكومة حجة
سلار:اني كنت احب واحدة بس بعدين افترقنا
:ليش
:تصرف كثير تشتري وايد ملابس وعطور وانا احب المرأة الاقتصادية
كلت بكلبيي هذا غير بخيل
:تمام دكتور هسة تكدر ترجعين للبيت
بالطريق سألني شنو جوابي
:اعذرني كولشي قسمة ونصيب 
:ليش
:لان اني وحدة متطلبة هوايي واصرف هواي وعندي أطفال فى اعذرني ما افيدك
:اتشرفت بلقاء حضرتج
:الي الشرف دكتور
ونزلت من السيارة صعدت للشقة لكيت بابا كاعد وايدة على راسة واحمد يمة صاير عصبي
حنين باستغراب:سلام عليكم
:عليكم السلام
:صاير شي
محد يحجي
:اكو شيي صاير
حوراء:ماكو شي حبيبتي فوتي لاطفالج جوة حبيبتي
طبيت للغرفة بدلت ملابسي ورحت العب وية الأطفال ورضعتهم
طلعت برة كعدت يمهم
حنين:بابا اليوم من طلعت وية دكتور سالار ما ارتاحيت الة ابد وانطيتة جوابي بالرفض
بابا بس هز راسة مكال شي
بابا:بابا حنين اكو موضوع صاير
:شصاير
احمد:يابة لتكللها
حنين:شكو
احمد: ماكو شي لتشغلين بالج
بابا:حنين لكو حسين
من كال هيج كلبي فز
حنين: صدوك بابا وين لكو بي شي متأذي
احمد:اعصابج حنين ما بي شي بس متصاوب بفخذة ويرادلة عملية
حنين:شنوو عمليةة
بابا:ي ورافض يسويها الا يشوف اطفالةة
:شنوو
:وعمليتة خطرة كلش مو مال يتأخر
كمت طبيت جوة لغرفتي والدمعة بعيني
ياربي ما اريد أطفالي يتيتمون
طلعت فوني واتصلت بتقى
حنين:الو تقى
:هلا حنين
:كليلي حسين شصايرلةة
:وشيهمج انتِ ملتهية وية هذا الدكتور مو نسيتي وسدت الفون بوجهي
رجعت اتصلت عليها
:تقى بس كليلي حسين شبييي لتخبليني
تقى وهية تبجي:جان بالانبار والضرب يمهم كلش قوي وشبكة ماكو وكهرباء ماكو محد يكدر ينزل وحسين تصوب وجابو واصابتة حيل خطيرة وميقبل يسوي العملية الا يشوف جهالة
اريد احجي جان اسمع صوت فوزية
فوزية:وججج يمة حنين بداعت جهالج جيبيهم خل يشوفهم وليدي كبل ليروح من ايدي حنين بروح امجج تعاليي حسين يعشكجج
حنين:ماشي ماشي اليوم نجي
سديت الموبايل وطلعت يمهم
حنين:احمد شوف اقرب طيارة توصل للبصرة اروح اليوم
احمد:نسيتي شسوة حنين
حنين:ما اكدر حسين ما اكدر اقصد احمد
دخلت للغرفة حضرت ملابسي وملابس للجهال وكولشي نحتاجة
احمد:حنين حضري روحج ب 8 الطيارة
شيصبرني يا الهيي ضليت كل شوية اخابر على تقى اطمن على حسين

=======================
دقايق وينزل الجزء الاخير