#جمار
#البارت الخامس
خلصنه امتحانات نص السنه بابا كال حضرو نفسكم وره الضهر نطلع للحله جان يوم خميس
تغدينه وطلعنه حاتم راح بسيارته هو وباجي
واني وماما وبابا وام علي بسيارتنه
عدنه باجي محجبه بس اني وماما سفور بس من نجي ليمهم نذب شال على راسنه لان بابا يكول عيب احنه هناك ناس عرب ويستنقدون السافره عود من نرجع لبغداد ذبنه وحاتم من شافنه كال بالحله هله هله وبغداد يعلم يعلم الله ...لازم يسم بدنه بحجيه..
ام علي خطيه من نجي للحله كلنه نجيبه ويانه مانكدر نعوفه وحدهه بالبيت بابا اشتره كومه هدايه الجدو ولبيبي ولبيبيته ولاخوانه ونسوانهم وجهالهم
ومر على حلويات الدرويش وحمل اشكال والاوان وعزل كل واحد حصته
مشت السياره بينه واني نقطي ضعفي السياره بس اصعد انام عسى ماعشر ساعات اكضيه نوم
واذا كاعده نفسي تكوم تلعب بين الغافيه والكاعده وصاحت على امي
جمار جمار
-هاا بعدين تعاي اكلج انتي ليش مسميتني جمار هاي الاسامي شكثرهه اله جمار
-وشبي جمار يجنن مو يكولون يجمار الكلب معناهه انتي لبه الكلب
اي اي بس اني مااحبه كل شويه وبالمدرسه يكللي عنجار من وراج
-من ورايه؟دحمدي ربج ابوج راد يسميج على اسم بيليته ،،فتيله،، وطكته بضحكه وابوي هم
-لا والله حتى جان حركت روحي وصديقاتي يصيحلي فتووول....فتله....ام الفتايل
لو ام الفيزياء من توزع درجات وتكعد تصيح بعلو صوته
فتيييييييييييييله ماخذه ٥٠ من طاح حظج على هاي الدرجه
اني اسولف وهمه ميتين ظحك
اروح انام
-هاج اشربي هذا الحب علمود معدتج واذا نفسج تلعب اعلجي علج
مهدي :-البارحه السياره غاسلهه اذا زوعتي اله اشمرج من الشباك
سعاد:-وشنو السياره اعز من بنتي
-اي
-لا والله
اباوع عليهم يكرص بيه ويظحك وهيه هم وجابو الدرب كله هيج كل شويه اكعد علة ظحكهم
شون بله عبالك استوهم مخطوببن ولايستحون من ام علي الكاعده ليوره
اوووو خل انام احسلي نمت وماكعدت اله واحنه بالحله
خل احجيلكم عن بيت جدو اسمه شعلان وبيبي اسمهه حسنه عدهم ولد ثلاثه وبنات ثنين ابويه وعمي صاحب وعمي صالح وعمات كوثر وكريمه كوثر مزوجه بالنجف وتجي بالسنه مره الهم اما كريمه فدرست وخلصت يم خوالهه لان همه بقريه وبس مدرسه ابتدائيه ومستوصف عدهم اما الاعداديه فلازم تصعد بسياره يله توصلله فخلصت اعداديه يم خوالهه ومعهد طبي وتعينت بالمستوصف الي بالمنطقه حبه ولد وخطبه بس ابن عمهه نهة عليهه وخطبه بس هيه رفضته والولد من نهى عليه ابن عمهه عافهه وتزوج غيرهه
وبقت لهسه بلا زواج عمرهه ٣٦ سنه
