#جمار
#البارت٢٩
وجان يهجم عليه ويضرب بيه ولج ساقطه الا اربيج اليوم واني هم ماكلت باطل هم كمت اهمش واضرب واعض بي جنه فاره وبزون واحد يهجم على الثاني عمتي كريمه تدفع بي وماكو وحتى بيبي كامت تضرب بي بعوجيته
وفجاة دخل جدي وصاح...شااااامل
هو وخر من عدنه وراح لجدي
وكله شوف جدي شون تغلط عليه
جمار..من شفت جدي دخل كلت ان اخووووك الله جابك يشعلان خل اطلع مواهبي بالتمثيل اني شعري منفوش كل شعره شارده بصفحه وثوبي مفتوك من يم جتفي
رحت ركضت يمه
كتله جدي شوف شون شبعني كتل لان نسوان جايات خطابه ويكلي انهي عليج واخذج واخليج خدامه لامي ولمرتي وادوسج بحذائي اذا تنفستي ليش جدي هيج ياهو اليجي يكفخ بيه شسويت اني احجي واني موته روحي من البجي
شامل من شافني هيج حجيت كام بشيل بروحه ويطكهه بالكاع ويحلف ماحاجي هيج وحتى شهد عمتي وبيبيتي على كلامه بس هنه كالن كلشي ماسمعنه من الهوسه مايكدرن يكولن جذب ويطلعني جذابه كدام جدي
جدي من سمع هيج كام يرزل بي وكله تضرب بت مهدي
واني بالوجود ايدك اكسرهه وبعدين شنو تنهي عليه
انت مو عندك مره وبنيه وعلى صوت صياح جدي كلهه التمت واجه عمي صالح ومرته
صبيحه...وشكو بيه يعمي بت عمه ويريد يستر عليهه
جمار...واني شاكيتلج شاكيه لبنج اريد رجال يستر عليه
جفيني شرج انتي وابنج
صالح... صوتج لاتصيحين من الناس
جمار...بكلبي كلت كلفت نفسك بهاي الحجايه خركه بيد صبيحه روح ولك تعال ولك
اخذو شامل وياهم وراحو
احس نار وشبت بضلوعي على ضرب شامل اليه
جمار...عمه وين كسريه جدي
كريمه...ياكسريه ولج
جمار...الكسريه ام الصجم الي يصيد بيهه فخاتي
كريمه...وشسوين بيهه
جمار...اكو واحد اريد انيشن عليه الا اخلي يحط دشداشته بحلكه ويركض
كريمه...هههههه ولج كفي لسانج يمعوده وتجفي شرهم
جانت رقيه بالزرع اجتي سولفتلهه ومتنه ضحك
رقيه...هم صاير زلمه شنيشل اول البا رحه صبيحه اجتي تنومه بالساكيه
جمار...ليش.
رقيه...حاوين بانيه وموديهن للعلوه ومغلس عشره من الفلوس
جمار...وصايرلي رجال وينهي
