نبضات القلب

البارت(14)

نبضات القلب♡

للكاتبة رقية_ليث

البارت الرابع عشر

ثم يتهمك ب أنك تخليت عنه
و لم تتمسك به
الشخص الذي بتر كل أصابعك!♥
.
.
.
.
مجتبى: وكفت عل حيلي شنو هل الحجي اكو وحدة هيج تكول لزوجها
حنين:  احجي و ابجي لان اني مااريدك ولا احبك ولا اريد تتقرب مني
مجتبى: عطت شنو هل الحجي
كاعد تسمعين شكاعد تحجين شنو هل الحجي
حنين: عطت مااريدك افهم علية مااريدك و مكاعد اتقبلك
مجتبى: صرت اعصاب لج صوتج احنه بالفندق
حنين: سكتت و كعدت ابجي
اشوف مجتبى يفتر بالغرفة و يحك بلحيته
بالربع ساعة ساكتين هو يفتر بالغرفة واني ابجي
مجتبى: نترت كافي تبجين...كااافي ما راح اتقربلج هاهية لتبجين كافي
حنين: زاد البجي مالتي
مجتبى: عطت لجججج كااافي كتلج ماراح اتقربلج...كااافي تبجين
حنين: سكتت و نزلت راسي
مجتبى: راح اطلع من الغرفة و انتي اخذي راحتج بدلي و هدئي كافي بجي
حنين: طلع و عافني بالغرفة وحدي و كعدت ابجي عل حظي الاعوج
ورة شوية كمت فليت التسريحة و اشوف شكلي بالمراية يخرع المكياج كلة خرب و الكحلة نزلت من شفت شكلي كعدت ابجي اكثر
نزعت البدلة و اخذت ملابس اريد ادور شيء مستور ماكو خرب يومج
نرجس ما حاطة شيء مستور
اخذت سيت نوم و فوكا روب طويل
دخلت غسلت و كعدت ابجي اكثر مااعرف شنو نهاية هذا الطريق
طلعت من الحمام و عيوني حمر من البجي
كعدت اجفف شعري واجة مجتبى باوعته من المراية وهو باوعني بسرعة و بعد نظراتة عني مبين ضايج كلش وعل اعصابة
اخذ ملابس و دخل يغسل....كملت شعري شفت العشة مااشتهي اي شيء
مالي نفس للاكل
رحت نمت و تغطيت و درت وجهي للحايط
غمضت عيوني احاول انام و ماافكر اريد انسى كلشي مااريد افكر
حسيت مجتبى طلع من الحمام و كعد يفتر بالغرفة
شوية و حسيت هدوء بعد ماكو صوت
رفعت راسي و شفته نايم عل القنفة و حاط ايدة عل عيونة
بقيت احوص بالفراش شفت الساعة صارت بال٣ الفجر واني بعدني كاعدة
شفت مجتبى مكرفص وجانت الغرفة باردة السبلت معلوك وهو جان طالع من الحمام و حتى شعرة مبلل
كمت اخذت غطى و غطيته و رجعت نمت
مجتبى: حنين...حنين
حنين: احجي واني مغمضة همممم شكو
مجتبى: يلة كعدي راح يجي ابن خالتي ياخذنا
حنين: كوة فتحت عيوني لان نعسانة و ما شبعانة نوم اي راح اكوم
شوية و كمت شفت مجتبى مبدل و كاعد عل القنفة من شافني كعدت كال
مجتبى: يلة بدلي واني واكف برة ادخن من تكملين رمشي علية
حنين: هزيت راسي بمعنى اي
طلع و مجتبى و اني غسلت وجهي و بدلت و حطيت مكياج خفيف شوية حتى يروح السواد الي جوة عيوني
كملت و لملمت الغراض و البدلة و رمشت عل مجتبى
شوية و اجة دك الباب فتحتها اله نزلنا الغراض و توجهت لحياتي الجديدة
و بيتي الجديد الي لازم اتعود و اتعلم عليهن
طول الطريق اني صافنه و اباوع من الجامة و مجتبى يباوع علية من المراية
جان مبين علينا اني و مجتبى جايين من جنازة ولا كأنما عرسان جدد و البارحة جان عرسهم
هو اعصاب و بس يدخن و اني العيون منفوخات من البجي و بس صافنه مااحجي اي شيء
وصلنا لبيتهم قبل مندخل للبيت اجة و لزم ايدي واني تفاجئت من تصرفة
بقيت اباوعة بنظرات استغراب وهو فهم همس بأذاني وكال
مجتبى: ابتسمي لتخليهم يشكون بشيء
حنين: فهمت قصدة و فهمت معنى الحركة الي سواها
دخلنا للبيت و هو ابتسم و فرحان واني بقيت صافنه علية شلون مثل عليهم و لا كأنما قبل شوية جان اعصاب و ضايج
ذبحوا طلي يم رجلية و دخلنا و الكل فرحان و يهلهل و يصفكون
واني حاولت ابتسم و ابين نفسي فرحانة
جان البيت هوسة اهلي جانوا بعدهم ما جايين
مجتبى: تعاي خلي نروح للغرفة خاف تعبانة و تريدين ترتاحين او تبدلين
حنين: رحنا اني و مجتبى للغرفة و جانت بالطابق الثاني و اكو حمامات و كلشي جاهز فوك حتى مطبخ صغير اكو
الطابق الفوك كلة النا اني و مجتبى طابق كامل بي غرفة نوم و مطبخ و حمامات و هول صغير
دخلنا للغرفة و جانت هاي اول مرة اشوفها ابد مااجيت قبل و شفتها
تفاجئت من شفتها هاي مو الغرفة الي اختارها
بقيت صافنه هاي الغرفة الي عجبتني كاعد احجي هو كال
مجتبى: عجبتج الغرفة؟
حنين: بس هاي مو الغرفة الي اختاريناها؟!
مجتبى: اي لان ذيج ما عجبتج اشتريت الغرفة الي عجبتج هي غرفتج ولازم تكون عل ذوقج
حنين: انت مو كلت راح اشتريها و اتفقت وية الرجال عليها!
مجتبى: اي صح بس اتفقت عل هاي الغرفة مو ذيج وحبيت اسويها مفاجئة الج
حنين: ابتسمت لان الغرفة كلش جانت عاجبتني
مجتبى: عجبتج؟
حنين: اي كلش.....شكرا
مجتبى: ماكو شكر بيناتنا ثنينا واحد
حنين: من كال هيج اختفت الابتسامة و رجعت للواقع
نرجس: كللللللللللللللللللللليييييششششش
حنين: ولج عزة فضحتينا
نرجس: غير فرحانة بيكم ان شاء الله عيون الحساد تبتعد عنكم
مجتبى: ضحكت عل سوالفها
نرجس: ولكم شلون حلوين طالعين من واكفين سوية لو تشوفون البارحة بالعرس شلون طالعين حلوين و ضغطوا بعض الناس
مجتبى: ولج انتي تزوجتي و ما بطلتي هاي سوالفج
نرجس: ولا راح ابطلهن
حنين: مااحس غير چكليت يطشر علية درت وجهي شفت نور و فاطمة
والله خواتي مخبلات يعني يدرن بية ما موافقة عل هذا الزواج بس رغم هذا اجن يهوسن و فرحانات اكثر مني
ادري بيهن يريدن يضوجن اسراء و حوراء لان الاكثرية يدرون
حوراء تحب مجتبى و جانت تمشي و تكول اني لمجتبى و مجتبى يحبني
و اكيد راح يتزوجني تاليتها انضربت بوري و اني الي تزوجته
مجتبى: يلة اني اعيفكم براحتكم راح اروح
حنين: اول ما نزل مجتبى جرني من ايدي و دخلني للغرفة
ولجن شبيجن تخبلتن
نور: كفختها عل راسها لج احترمينا احنه اكبر منج
فاطمة: لج احجيلنا البارحة شصار ما صار
حنين: يعني شصار قابل شنو هل السؤال
نرجس: ضحكت ولجن شوف وجها شلون صار احمر خرب ههههههه
حنين: كافي ولجن والله اخجل
نور: والله مجتبى مدللج دلال بس انتي عوجة
حنين: كافي خلي ننزل جوة مااريد احجي بهيج مواضيع
نرجس: طبعا ميعجبها هذا الكلام ست الحسن لهذا تريد تنزل
حنين: كافي اريد انزل
فاطمة: يلة امشن ننزل راح تبجي...يلة غيري ملابسج وتعاي مو تتأخرين
حنين: ماشي مااتأخر
نزلن كلهن و بقيت وحدي بالغرفة فتحت الكنتور طلعت كلبية حلوة
لبستها و نزلت
سلمت عليهم كلهم و عل امي الكل يضحك و يسولف واني كاعدة و اجاملهم بالابتسامة
طلع الكل و ارتاحيت واخيرا طلعوا احس راسي صار طبل
صعدت فوك لبست بجامة و فليت شعري و مددت لان كلش تعبت
و ما نايمة هواي احس راسي راح ينفجر
سمعت صوت رجلين عل الدرج عرفت مجتبى صعد
بقيت مغمضة عيوني و سويت نفسي نايمة
مااريد احجي وية خاف نتعارك مابية حيل عركة تالي الليل
فتح الباب و دخل اسمع بس صوت حركته بالغرفة
حسيته نام يمي و انفاسة صارت قريبة علية وهذا الشيء خلاني اتوتر
لا اني الي اكدر انام مرتاحة و لا اكدر افتح عيوني خاف يدري بية كاعدة
فتحت تك عين شفته نايم ظليت صافنه هذا نايم بس بالشورت خرب بالحظ
بلعت ريكي و درت وجهي و نمت
مرت ايام عل زواجي من مجتبى ايام باردة ماكو اي شيء بيناتنا يكعد الصبح يروح للشغل واني اكعد انضف و اطبخ مرات اكعد عل الموبايل او التلفزيون
يرجع من الشغل يتغدى و ينام و بليل يا اما ينزل جوة يم اهله واني هم انزل وية لو يكعد عل الموبايل و التلفزيون يشوف اخبار لو يطلع وية اصدقائة
هيج مرت ايامنا وهو لا يوم حاول يتقرب مني او يلمسني وهذا الشيء مريحني لان كل ما يتقرب مني و انفاسة تصير قريبة علية احس قلبي راح يطلع من مكانة
باجر اول يوم الية دوام بالكلية متحمسة كلش و كاعد احضر ملابسي
و الفرحة ما واسعتني افتر بالغرفة و الابتسامة عل وجهي ما فارقتني واخيرا حققت حلمي و راح اروح للكلية
قطع سلسلة افكاري صوت مجتبى
مجتبى: متحمسة؟
حنين: ابتسمت كلش اكثر مما تتصور
مجتبى: باجر اول يوم اني اوديج علما تلكين خط
حنين: هزيت راسي بمعنى اي
مجتبى: من هسه انبهج انتبهي عل البنات الي تحجين وياهن لتثقين بسرعة وحتى الولد
حنين: كمت من الجرباية و صرت مقابيلة شنو تقصد؟
مجتبى: شنوو شنو تقصد يعني لتثقين بسرعة بالبنات لان ادري بيج بسرعة تثقين بس بية ماادري ليش متثقين
حنين: لان انت فضحتني كدام اهلي
مجتبى: شلون تريديني اسكت عن هيج شيء اهلج جان لازم يعرفون بهذا الشيء
حنين: عرفوا و شصار تاليتها....تزوجتك الك
مجتبى: يعني سبب كرهج هذا كلة لان كلت لاهلج شفتج ورة المدرسة كاعد تحجين وية واحد ساقط؟
حنين: اني اصلا جنت اضوج منك من البداية و بهاي سوايتك كرهتك
مجتبى: يعني تفضلين تتزوجين ذاك الساقط بس متتحملين تتزوجيني؟
حنين: اي عل الاقل ذاك الساقط الي تحجي عنه جنت احبه
مجتبى: لج انتي ليش هيج غبية لج هذا باعج بمجرد ما شفتكم لج هو لو رجال صدك جان ما هرب و عافج وحدج ولو هو رجال جان ما باعج و راح كبل وية صديقتج
حنين: شكاعد تحجي انت شنو كبل وية صديقتج؟!
مجتبى: طبعا لان انتي جنتي عمية و متشوفين شنو جان يصير من وراج لج هذا جان يجذب عليج هو وصديقتج شروق هي هم جانت تحجي وية عل النت وجان يحبها وتحبه طبعا هاي بعد ما خانتج و اخذت حسابة منج و راحت حجت وية و قشمرته بحجايتين
وهي الي اقترحت علية يشوفج ورة المدرسة و مااعرف شلون حصلت رقمي و دزتلي رسالة و كلتلي انو انتي كاعد تشوفين ولد ورة المدرسة طبعا اني ما صدكت بالبداية بس من اجيت و شفت بعيني للاسف طلع كلامها صحيح
وانتي وكعتي بهذا الفخ الي نصبوا الج جانوا مقررين تلتقين وية واني اشوفكم
و هو يشرد و يحظرج من جميع البرامج بحجة ابن عمج شافنه سوية حتى يخلص منج و تبقى الساحة الهم
شوفي الشخص الي جنتي تحبي شنو سوة بيج
و الي جنتي تعتبريها صديقتج شنو سوت بيج
شفتي لو لا؟؟
و تعرفين هسه شنو صار بيهم انقلب السحر عل الساحر هي وية رايحين لشقة واني دزيت رسالة لابوها و اهلها رايحين و لازميهم ثنينهم بالشقة
هي ابوها شبعها كتل و ايدها و رجلها انكسرن و صار عدها فطر براسها و زوجها ابن عمها متزوج ثنين وهي الثالثة وكل يوم يكعدها بكتلة و يكومها بكتلة
اما حبيب القلب مالتج ابوها اشتكى علية بتهمة تحرش و اصلا الشقة طلعت مشبوهه و انحبس بتهمه تحرش و ابتزاز الكتروني لان طلع مبتز مدري جم بنية و مهددهن بصورهن و ماخذ منهن فلوس
شفتي شنو سويت حتى انتقملج منهم لان ثنينهم أذوج
وانتي ولا هامج هذا الشيء
حنين: مجتبى يحجي واني صافنه علية ما كاعد استوعب الكلام الي كاعد يكولة معقولة الي جنت اصيحلها صديقتي هيج طلعت وحدة حقيرة و باعتني علمود واحد بعد احقر و اسقط منها
بعد هذا الحجي كلة طلعت صدك عمية و ثولة
شلون حبيت هيج انسان ساقط و منحط الله اعلم وية كم وحدة جان يحجي غيري
ااا انت شلون عرفت هاي المعلومات؟
مجتبى: يعني اني محامي و هاي المعلومات بسهولة اكدر احصلها واني ظليت اراقبهم فترة و جنت انتظر منهم غلطة حتى اطيح حظهم بيها
حنين: نزلت دموعي مااعرف شنو احجي
مجتبى: صدك تحجي تبجين عليهم ميستحقون دمعة وحدة منج
حنين: ما كاعد ابجي عليهم كاعد ابجي عل نفسي شكد جنت غبية حتى هيج ثقيت بيهم
مجتبى: حضنتها كافي لتبجين كافي
حنين: ليش هيج حظي وهيج يصير وياية جنت اعتبرها صديقتي وكل اسراري عدها و احمد جنت احبه من كل قلبي ليش هيج يصير احجي و اشهك من البجي
مجتبى: كافي لتبجين والله قلبي ينمرد عليج من اشوفج تبجين
ميستاهلون هذا البجي كلة
حنين: ابجي عل نفسي و غبائي
مجتبى: اني صوجي حجيتلج لو ما حاجي احسن
حنين: لا همزين حجيت عرفتهم عل حقيقتهن
مجتبى: يلة كافي ضحكي باجر وراج كلية
حنين: ابتسمت و مسحت دموعي اي لازم افرح و ماابجي

مرحبا اني مجتبى مواليد ١٩٨٩ مكمل كلية قانون و حاليا اني محامي مشهور بشغلي و بشطارتي
ابد ما مريت بعلاقات حب خلال فترة الكلية
جان عندي صديقات بالكلية بس مو حب
ما لكيت البنية الي تناسبني و احسها تكملني و اكملها
ورة ما تخرجت كرست حياتي كلها للشغل و القضايا ما فكرت بالزواج
ورة جم سنة من ناس لناس امي شافت بتهم و عجبتها و قررت تخطبها الية واني عادي وافقت لان جان الحب مو من اولوياتي
يعني ممكن اتزوج زواج تقليدي و بعدين احبها و تحبني
شفت البنية و تعرفت عليها عجبتني و مجان ناقصها شيء
بس للاسف ورة ما تزوجنا طلعت كل تصرفاتها خلال الخطوبة
متصنعة و تعرفت عل وحدة ثانية و شخصية ثانية
وحدة انانية متفكر بس بنفسها و تحب المشاكل و مهملة
وهذا الشيء كلش صوجني ثنينا ما تراهمنا ابد شكد ما حاولنا نرتب حياتنا بس ماكو نفشل و قررنا ننفصل وهذا جان قرار من الطرفين
طلكتها و حسيت نفسي ارتاحيت و رجعت لحياتي الطبيعية و قررت بعد مااريد اتزوج لا عن حب ولا تقليدي
جانت علاقتي بنت عمي حنين سطحية و عادية عل كد السلام
بس اني مااعرف ليش جنت دوم احب اضوجها وهي صارت تضوج من هذا الشيء
اني جنت احب اضوجها لغرض الشقة بس هي جانت تضوج
وصارت تضوج مني كلش كامت بس تسلم علية لا اكثر ولا اقل
جنت ادري بت عمي حوراء تحبني بس اني جنت اعتبرها مثل اختي
حتى حنين جنت اعتبرها مثل اختي ولا فد يوم فكرت بيها بغير طريقة
لحد ما صارت سالفتها وية هذا الساقط و شفتها واكفة وية ورة المدرسة
ظلت تتوسل بية حتى مااكول لاهلها بس هاي سالفة متنضم
واني ما موجود يمها حتى انتبه عليها لهذا لازم اهلها يعرفون حتى يراقبوها
و مترجع تعيد الغلط مرة ثانية
قررت اكللهم و مااسكت عن هذا الشيء
بقيت ادور عل الساقط الي جان وياها و بحثت عن الرقم الي دزلي الرسالة
طلع مسجل بأسم بنية اسمها شروق
سألت مهيمن عليها وطلع ميعرفها بعدين طلعت صديقة حنين و توقعت هذا الشيء
عرفت من مهيمن حنين قلبها طيب و بسرعة تثق بالناس
فكرت هواي بيها و صارت تشغل تفكيري و عرفت حابسة نفسها بالغرفة
و بس تبجي
كتلة لمهيمن خليها ترجع للمدرسة لتحرمها من  احلامها بسبب هيج غلط
اقتنع و رجعت للمدرسة واني ظليت بين فترة و فترة اروح للمدرسة و اراقبها
بيوم من الايام انتبهت احمد واكف بعيد و كاعد ينتظر ردت اروح اهجم علية و اضربة
بس كلت خلي انتظر و اشوف شراح يصير
شفت حنين طلعت من المدرسة و جان مهيمن يوديها و يجيبها صعدت وية مهيمن و راحت واصلا حتى ما باوعت عل احمد وهو هم من طلعت ما باوع عليها
عرفت كاعد يدور عل غير بنية طلعت بنية باوعتلة و ابتسمت وهو كذالك
و تمشوا ورة المدرسة و كعدوا يسولفون و يضحكون
سألت عن البنية و طلع اسمها شروق و عرفت هي الي راسلتني و دزتلي رسالة
بقيت اراقبهم و شفتهم بيوم من الايام ركبوا بسيارة و راحوا واني لحكتهم
و شفتهم راحوا بمنطقة مدري شلونها و صعدوا بشقة
قبل فترة سويت بحث عنها بالمنطقة و اخذت رقم ابوها دزيتلة رسالة
و ورة شوية شفته اجة و صعد بالشقة و شافهم سوية
حسيت نفسي لازم احمي حنين بس شلون مااعرف
فكرت و وصلت لحل وهو اتزوجها رغم اني مااحبها ولا يوم فكرت بيها كزوجة بس مااعرف ليش حسيت نفسي مسؤول عنها ولازم احميها من الحوش الي موجودة
قررت افتح هذا الموضوع وية مهيمن رحنه للكورنيش و حجيتله الموضوع وكتلة اريد اخطب حنين من تخلص سادس
و هو ما اعترض بالعكس فرح و كال اسأل الوالد و اردلك خبر
كتلة مااريد حنين تعرف بالموضوع و تشتت تفكيرها و تبتعد عن الدراسة
ورة فترة ردلي الخبر عمي و مرت عمي موافقين
فتحت الموضوع وية اهلي........يتبع
..................
اتمنى تعجبكم

لا تنسوا التعليق و التصويت🌷

الكاتبة رقية_ليث