نبضات القلب♡
للكاتبة رقية_ليث
البارت الثاني
.
.
.
مهيمن فوك مااني تعبان و دايخ امي كملتها علية عطت بصوت عالي: يمممممممة كااافي دخليج كااااااافي ارحميني والله تعببباااان تعبببببان
كااافي
عفتها و صعدت لغرفتي و احس الحرارة تطلع من جسمي من كثر ما
جنت عصبي اول ما دخلت نزعت ملابسي وبقيت بس بالشورت
تمددت عل الجرباية و جنت مسطور
بقيت افرك براسي لان حيل دايخ افكار تجيبني و افكار توديني مااعرف شسوي
نمت نص ساعة و فزيت لان حلمت حلم يخوف كعدت عركان
و بلكوة اتنفس استغفرت ربي و دخلت اغسل بلكت ارتاح
و الافكار الموزينه تروح من بالي من طلعت اتصلت عل حاتم
اطمن عل رزان و كال عل وضعها ماكو شيء تغيير
نزلت جوة شفت اختي حنين كاعدة تدرس
هلا بحبيبة اخوها شلونج
حنين ابتسمت من شفته صارلي اسبوع مشايفته هو ملتهي بالمستشفى واني ملتهية بالدراسة: هلا والله اني زينه انت شخبارك مبين عليك تعبان
كمت حضنته و بسته من خده شلونها رزان
مهيمن كعدت عل القنفة و نزلت راسي: والله مااعرف شكلج بس حالتها مطمن ابد
حنين كعدت مقابيلة و لزمت ايدة: ان شاء الله تصير احسن و ترجعلها ذاكرتها و الله كلش انقهرت عليها من سمعت فقدت الذاكرة و تعرضت لاضرار
مهيمن: ان شاء الله...تصير احسن انتي شلونج بدروسج؟
حنين: مثل متشوف مطشرة بجميع النواحي و مخبوصة عندي امتحان كيمياء
مهيمن: اريد درجة كاملة ترة ازعل
حنين: صراحة بالكيمياء مااضمنلك هذا الشيء
مهيمن ضحكت: لا ادري بيج شاطرة...يلة راح اصعد ابدل
حنين: وين راح تروح؟...للمستشفى
مهيمن: اي للمستشفى
حنين: تريد اسويلك شيء وجهك شلون اصفر
مهيمن: مااريد شيء بس سويلي جاي
حنين: من عيوني
مهيمن....صعدت بدلت و شربت جاي و توجهت للمستشفى
بقينا ايام و ليالي هناك و اني لا ليلي ليل و لا نهاري نهار
حاير و مااعرف شسوي ما عندي غير الدعاء
ورة اسبوعين بدت رزان تتقبل الشيء الي هي بي و فهموها الاطباء حالتها
و بدت تتقبل هذا الشيء و اهلها بدوا يدخلون لغرفتها يشوفوها وهي تظل بس صافنه عليهم ساكته متحجي شيء واني اوكف بالباب اباوع عليهم وهي تنتبه عليه مرات تباوع علية و مرات لا
من تباوعني و تلتقي عيونه احس الي كاعدة تباوعني مو رزان
ما بيهن حب و لا لهفة مجرد شخص عادي كاعد تباوع علية لا اكثر ولا اقل
و هذا الشيء جان يحطمني من الداخل
اليوم بعد ما تأكدوا تحسنت قرروا يطلعوها من المستشفى
فرحت من سمعت بهذا الخبر و اخيرا راح تطلع
وقعوا عل خروجها و حطوها بكرسي متحرك و اخذوها للبيت
قررت اروح للبيت اغسل و ابدل و اروحلهم
اريد اشوفها و احجي وياها بعد مااتحمل
ابو مهيمن: ها بوية طلعوها من المستشفى؟
مهيمن: اي يابة طلعوها و هسه شوية و اروحلهم
ابو مهيمن: احسب حسابك احنه هم وياك اني و امك نروح نشوفهم
ام مهيمن: اني لتحسب حسابي يمة مااروح ظهري يوجعني
ابو مهيمن: متروحين لان ظهرج يوجعج لو متريدين تشوفين البنية
ام مهيمن: شبيك يا عيني لو ما ظهري جان رحت بس والله اني اكول البنية بعد متناسبنا يعني فقدت الذاكرة و بعد متذكر خطيبها شلون راح يكمل وياها
مهيمن: يممممممة سكتي لخاطر الله
ابو مهيمن: معليك بكلام امك لتهتم وليدي رزان خطيبتك و راح تبقى هيج و ان شاء الله نفرح بعرسكم
مهيمن: ان شاء الله
ابو مهيمن: ام مهيمن حسبي حسابج تروحين ويانه هاي السوالف مال ظهري يوجعني متمشي علية
ام مهيمن: بس....
ابو مهيمن: لا بس ولا غير شيء تروحين يعني تروحين فشلة من الناس هسه شيكولون
ام مهيمن: يلة امري لله اروح شسوي
حنين: اني هم اروح وياكم
ام مهيمن: عندج دراسة وين تولين
حنين: يوم حبابة خلي اروح والله كملت دراسة اريد اشوف رزان مشتاقتلها
ام مهيمن: لج بومة هي فقدت الذاكرة وين تذكرج
حنين: ميخالف اريد اروح اشوفها
ابو مهيمن: ميخالف بوية تروحين ويانه يلة روحي تحضري هاي امج اذا تحجين وياها منا لباجر ميفيد
حنين فرحت و ركضت بسرعة للغرفة ابدل
صاحوني و طلعت بسرعة اركض و اعدل بحجابي
ها شلون طالعة؟
مهيمن: تخبلين
حنين: فديتك والله دومك ترفع معنوياتي
ركبنا بالسيارة و توجهنا لبيت رزان مااعرف ليش جنت
خايفة من ردة فعلها من تشوفنا و متتعرف علينا
يمكن بس اشوفها ابجي مااتحمل هذا الشيء
اصلا التفكير بي يخليني ابجي لا اراديا
وصلنا لبيتهم و طلعنا اخوها حاتم استقبلنا
دخلنا للصالة ورة شوية دخل ابوها و امها
سلمنا عليهم و كعدوا يسولفون
واني احوص اريد اروح اشوف رزان
و اشوف مهيمن مثلي كاعد عل اعصابة بس يريد يروح يشوفها
كاعد و يهز برجلة بداخلي كاعد اضحك علية و اكول شوف الحب شيسوي
و بنفس الوقت انقهر علية لان حبيبته و خطيبته نسته
حجيت بصوت عالي ممكن نروح اني و مهيمن نشوف رزان
ام رزان: لا اخاف عليها خاف تخترع
حنين: ليش شنو كدامها قرقوز مثلا حتى تخترع!
ابو رزان: روحوا بوية البيت بيتكم بوية أديل اخذيهم لغرفتها
أديل: اي عمو تدلل...تفضلوا
حنين...شفت مهيمن فرح لان راح يشوفها همست اريد هدية علاكة نساتل و حلويات
مهيمن همس: لجج مو تدلللين
حنين...دخلنا لغرفتها شفناها كاعدة و صافنه عل السكف
من دخلنا فزت
رزان بخوف: منوو انتوا شعدكم هنا؟
أديل: حبيبتي هدئي...هذا خطيبج مهيمن اشرت علية وهاي اخته حنين
رزان تحجي و ترجف: ﻻﻻﻻ اني ما مخطوبة هذا واحد
مجرم اي اي مجرم مجرم مااريدة مااريد اشوفة اطلع بررررا اطلع برررا
حنين: شفت مهيمن تفاجئ من ردة فعلها و صار عصبي اشوف بعيونه القهر لان حبيبته و خطيبته بعد متريدة عافها و طلع من الغرفة عصبي
طلعت ورة لان حالته ابد مو مال اعيفة وحدة
شفت طلع بالطرمة(طارمة) و كعد يدخن بحركت قلب
اهدء مهيمن و الله من اشوفك هيج قلبي ينمرد عليك
مهيمن: يفتر و يدخن و يحجي بحركة لججج ما شفتيها شلون تحجي
شلون ترجف من تشوفني شفت الخوف بعيونها
تاليتها اني اصير مجرم لجج اني مجرررم
حنين: اعرف والله صعبة عليك تشوف الانسانة الي تحبها هيج تعاملك
بس تحتاج وقت حتى تتقبل الوضع الي هي بي لتضغط عليها
مهيمن: حنين والله مااتحمل...مااتحمل بعدها عني و تدرين بية مو صبور شلون راح اصبر بس فهميني شلون!!
حنين: تنهدت و كتلة خليها عل الله ادعي يرجعلها ذكراتها و تذكر كلشي و ادعي الله يلين قلبها تجاهك
مهيمن: والله ماكو غير ليان هي السبب اكيد هي السبب
حنين: ليان شعليها؟!
مهيمن: ذبيت الجكارة و طفيتها برجلي هيج ماكو شيء يلة امشي نرجع يمهم
حنين: رجعنا دخلنا يمهم و همه فهموا انو رزان ما تقبلت و جودنا مبين علينا من وجهنا و خاصة مهيمن طول الكعدة هو بعالم ثاني و كاعد عل اعصابة
طلعنا منهم و مهيمن يسوق بسرعة حتى اني خفت لا نسوي حادث لان ادري بي مو صاحي مخبل كلشي يسوي
بس بعدين ابوية عاط بي
ابو مهيمن: خفففف السرعة شنوووو تريد تموتنا شبيك تخبلت
انززل يلة انزل اني اسوق انت الظاهر مو صاحي
نزل مهيمن من السيارة بدون ميحجي شيء و ابوية كام يسووقها
أنت تقرأ
نبضات القلب
Romansهل حقا يمكن للانسان ان يمحو كل شيء من ذاكرته؟! هل هذا الشيء بأرادته لنسيان الماضي! ام شيء خارج أرادته!؟ هل يمكن ان ينسى اهله و اقاربه و حبيبه بهذه السهولة؟! هل يمكن ان يتقبلنا كالسابق ام يعتبرنا غرباء؟! هل سوف يتصرف معنا بعدوانية؟ هل سوف يحبنا كال...
