روايه "لما نحب"

الفصل الثاني عشر ( مشاعر متضاربه)🖤

البارت الثاني عشر..

في صباح اليوم التالي..

انا نازله يا ماما ادعيلي

صاحت بها ريهام عاليا..

الأم برجاء: ربنا معاكي يا حبيبتي ويقدرك علي الي انتي داخله عليه ده..

ريهام بحزن: يارب يا ماما مع السلامه..

الام: مع السلامه يا حبيبتي

خرجت ريهام من بيتها وكادت ان تتحرك حتي وجدته امامها..

عبد الرحمن: طب مفيش صباح الخير حتي..

نظرت ريهام اليه وبغضب مكتوم: عايز ايه يا عبد الرحمن؟!!

عبد الرحمن بخبث: مش احنا صحاب..عايز نقعد نتكلم شويه مع بعض..ايه مش من حقي..

ريهام بغضب: صحاااب..هه..ضحكتني..كان في زمان وخووولص زي ما بيقولوا..يلا من هنا بقي..

عبد الرحمن: ما انا لازم اتكلم معاكي هو في ايه..انتي عمرك ما كنتي كده..

ريهام بعصبيه: اديك قولت اهو انا عمري ما كنت كده..معني كده اني كنت بسامح وبعدي وبستحمل..وانت بقا قدرت؟!...رد علياااا انت قدرت ده..؟!

عبد الرحمن: ريهام انا..

ريهام: طبعا مش عارف تقول حاجه..ومش مهم عندي اصلا..انت بقيت كارت محروق في حياتي وملكش اي تلاتين لازمه..اوعي من سكتي كده..

وتخطته ريهام وذهبت في طريقها للبحث عن عمل..

عبد الرحمن بداخله: ما انا مش هسيبك تروحي مني بعد ما شوفتك..زمان مكنتش اعرف شكلك خالص ومكنتيش فارقه معايا..انما بعد ما شوفتك وشوفت جمالك ده..مش هسمح تكوني لغيري الجمال ده لازم يبقي من حقي انا..
انا وبس...

....

انا رايحه النادي يا ماما عايزه حاجه..
صاحت بها فيروز عاليا..

الام: لا يا حبييتي خلي بالك من نفسك..

فيروز : حاضر يا ماما..يلا سلام..

الام: سلام يا حبيبتي..

خرجت فيروز من بيتها واتجهت الي النادي..
وعند وصولها اصتدمت بأحد الاشخاص..

فيروز : مش تفتح يا عم ان.........احمد..

احمد بابتسامه: اذيك يا فيروز..اسف مكنتش واخد بالي..

فيروز بتوتر: احم لا ولا يهمك..انا...انا بخير..انت ايه الي جابك هنا بقا..

احمد ومازال علي ابتسامته التي اسرت قلبها منذ اول مره رأتها بها: انا يا ستي بلعب كارتيه هنا بقالي فتره كده..وانتي؟!..

فيروز باستغراب: انت بتهزر..انا كمان بلعب كارتيه هنا..بس اول مره اشوفك مع اني باجي هنا علطول في نهايه كل اسبوع..