ياغلاتك بقلبي يا نصيب الغير

البارت الثالث

يـــوم الأربعـــــاء:

20 شـــوال...

في الصبـــاح وبحــوش أم الذيــب..

أم الذيب: ياهلا وغلا بولد اختي الوحيده..

خلف: هلا فيك ياخاله.. فقدتك وقلت أجي أسأل عن أحوالك وقطعت مشوار من الدوادمي للرياض عشانك..

أم الذيب: تسلم يالغالي ياعساني ماانحرم من هالشوفه..

خلف: ماأشتقتي للديره ياخاله؟؟

أم الذيب: انا هنا ديرتي هنا حياتي وموتي وأن اللـه أخذ بعمري ياليت قبري بجنب أبو الذيب وهذي وصاتــي لك ياخلف..

خلف: لا تقولين كذا ياخاله الله يعطيك الصحه والعافيه ويطول بعمرك..

أم الذيب: مابقى من العمر كثر ماراح وأنا وش لي بالحياه عقب أبو الذيب..

خلف: لك ولدك صايـــل ياأم صايل..

"عصبت أم الذيب وقالت بتهديد": لاتجيب لي سيرته أنا ماعندي عيال اللي مايسأل عن أمه وما يطيعها هذا مايتسمى ولد..

خلف: أنتي طيبه ياخاله وتسامحين وتغفرين له الغلطه,, أنا عارف أن كل الردى فيه وعاق وأناني مايفكر إلا بنفسه بس أحفادك ياخاله عشان خاطرهم..

أم الذيب: أي أحفاد اللي ما أعرف أشكالهم وأعمارهم؟؟ كلما زارني تكون نفسه شينــه وما يحكي إلا بالفلوس والاراضي ,, وإذا سألته عن عياله قال قريب يزورونك.. بشرني بعياله الأربع وذبحت لهم ذبايح ولا بعد شفتهم..!!!!

خلف: واللـه ياخاله أنه مخطي وغلطان ولك حق تزعلين عليه بس أنا كان ودي أنك تتركين الوحده بهالبيت وتعيشين معه ببيته وتتعرفين على مرت ولدك وأحفادك وصدقيني ان........

"قاطعته أم الذيب": هو مايبيني!!!!!! مايبي امه لأنه يبي فلوسها بس!!!! ..

"تنهدت وهي تتكلم بحنـــان" ياولدي ياخلف أدري أنك خايف علي من البيت لحالي بس أنا تعودت على بيتي وتعودت أخدم نفسي بدون محد يساعدني وتعودت على الجيران ..

عقب هالعمر تبيني أترك كل شي وراي وأروح عند صايل اللي بحياته ماقالي؛ يمه تعالي شوفي بيتي...؟؟

"خلف بحيره": ياخاله واللـه مايصير كذا بعض الأحيان أتصل عليك ولا تردين وأخاف يكون صار لك شي لا سمح اللـه..

"أبتسمت أم الذيب": ياولدي لاتخاف على خالتك ترى أنا عن عشر رجال .. وبعدين مره ثانيه دق على جوالي لا تدق على الثابت..

"تفاجأ خلف": أنتي معك جوال؟ من متى؟

أم الذيب: من شهر شرالي صالـح ولد أم سطام (رقم وجهاز) اللـه يحفضه ويرزقه كل خير..

خلف: فشيله ياخاله ليه ما طلبتي مني بدل هذا اللي أسمه صالح ألحين وش يقولون عنا الجيران؟؟