القصة النهاردة مختلفة خالص عن اللي فاتوا
مش عارفة انا اللي بقيت غريبة والا من ساعة ما كلمت صديقتي المقربة وقولتها انا بقيت اشوف حاجات غريبة والموضوع زاد قوي ....
كنت مسافرة على طريق مكة لعمل عمرة لبيت الله الحرام
وطول الطريق بدعي وحسيت ان باب السما مفتوح لان الدنيا مطرت والجو كان جميل ومعروف ان وقت استجابة الدعاء هو وقت السفر وفِي الليل والدنيا كمان مطر
وفضلت ادعي لنفسي ولأهلي وأحبابي كلهم وووقفنا كالمعتاد في استراحة وما ادراكم الاستراحات بيبقى فيها ايه وخصوصا الصحراء ليها سكانها زي ما انتم عارفين وزي ما حصل ليه قبل كدة في قصة فاتت !!!
المهم واحنا داخلين على الطريق الممهد للاستراحة لاقيت شخص واقف ورافع ايده لفوق كأنه بيحي كل اللي داخل ولما قربت منه لاقيته اتحول لحديد😳 اتصدمت وقولت يمكن انا مش نايمة يمكن مش واخدة بالي ودخلنا الاستراحة ووقفنا وعشان ادخل الحمام لازم الف من ورى وكل اللي عايش في الخليج وخصوصا السعودية عارف ان حمامات الحريم مدخلها ديما بيبقى وشه للصحراء 😔
ولسه بقول يا هادي ونازلة لاقيت ضبع كبير قوي قوي فوق مما تتخيلوا بينط من الجبل اللي قصادي للناحية التانية وكنت شيفاه كامل يعني مش بجمب عيني ولا حاجة وفجأة اختفى وفضلت متنحة لا عارفة اتحرك ولا خطوة دة ايه اللي أنا شفته دة ؟؟؟؟
لغاية ما ابني جالي بيقولي مالك يا ماما ومش عارفة فضلت وقت اد ايه بالشكل دة !!!!
قولت مفيش يا حبيبي
انتِ صليتي يا ماما ؟؟
لسه ما دخلتش اتوضى حتى يا بني ....
ودخلت اتوضيت وصليت وكلي يقين بإن الله شفته دة حقيقي ومش خيال لغاية ما كلمت صديقتي وتوأمي وبقول لها على الله حصل وشكلي هنجت من ترتيبات السفر فردت وقالت ان اللي شفته دة هو حارس الجبل 😳
حارس ايه ؟؟؟؟
حارس الجبل ومتسأليش كتير أنا اتقالي كدة يا بنتي
اللي شفتيه دة يبقى حارس الجبل ومن هنا ورايح ها تشوفي حاجات كتير قوي
طب ايه السبب ؟؟؟
عشان عينك التالتة افتحت
وانتِ اصلا روحانياتك عالية وأنا عارفة دة من زمان عنك فعشان كدة ها تشوفي حاجات اغرب مما تتخيلي الفترة اللي جاية
ودي كانت نهاية محادثة صديقتي اللي بعدها حصلت حاجات اغرب من اللي شفته وعشان ما اطولش عليكم هابقى احكيلكم على باقي التفاصيل المرة الجاية
وللحديث بقية ........
#Rehab
أنت تقرأ
قصص رعب حقيقية قصيرة من واقع حياتي الشخصية ( متجددة)
Horrorقصص من الواقع الحقيقي الذي نعيش فيه ولكنها قصص مرعبة فمن يملك قلب يتحمل الخوف يدخل للقراءة وللعلم كل قصصي يا تعرضت لها شخصيًا أو نقلتها من أفواه أصحابها اتمنى لكم قراءة ممتعة .
