مش عارفة ابدأ منين وأقول ايه كل اللي ممكن اقوله ان أنا بحب القطط بشكل مبالغ فيه غير كل الناس ، جايز دي رحمه من ربنا خلقها في قلبي وجايز تكون ميزة خاصة فيه ها نعرفها بعدين
المهم في يوم لاقيت بنتي بتقولي الحقي يا ماما دة في قطة ولدت فوق عند السطح وقاعدة قدام الباب بالضبط فبدون تردد قولت لها تعالي نطلع نشوفها
وأول ما طلعت لاقيتها قطة سودة خالص مفيش حاجة باينة غير لون عينيها المميز وكانت عيونها لونها اصفر .
وأول ما شافتني حسيت ان شعر جسمي كله وقف مش عارفة ليه حسيت بالاحساس دة والقطة بخت فينا عشان طبعا ابنها
نزلنا جري جبنا اكل ومية وطلعنا تاني وقولت لبنتي اصبري وقولت للقطة احنا مش جايين نأديكِ احنا جايين نحطلك اكل وشرب بس
فبلاش تبخي فينا واصبري على نفسك هانحط الأكل وننزل على طول والغريبة انها سكتت واستنت لغاية ما حطينا الاكل والمية وفضلت تبص لنا كتير
المهم ان بنتي كانت مرعوبة وديما تقولي أنا خايفة اطلع اكل للقطة يا ماما اطلعي لها انتِ انا ماليش دعوة فقررت اكلمها وطلعت لها بعد كذا يوم وفعلا لاقيتها واقفة على السلم مش عايزة حد يطلع فوق السطح نهائي فقولت لها انا جاية في سلام وبلاش بخ وخوف مش هاعملك الا كل خير أنا جاية في سلام والسلام احسن من اي كلام ولو كنتي فاهمة كلامي اديني اشارة وكررت كلامي عليها 3 مرات
لاقيتها راحت جابت ابنها واخدته في سنانها وجابته لغاية عندي ونزلته انا عن نفسي انبهرت وقولت ايه دة انت مش خايفة على ابنك مني يعني فهمتي كلامي فلاقيتها هزت راسها فقولت اكيد انا بيتهئلي وكررت عليها كلامي انت فهماني لاقيتها هزت راسها تاني
مديت ايدي بالراحة ومسحت على جسمها وقولت لها انتِ هنا في أمان متخافيش محدش يقدر يقربلك طول ما أنا موجودة ونزلت جري جبت كرتونة وطلعتها وفرشتها من هدومي القديمة وهي دخلت نامت فيها على طول سبحان الله حسيت انها فهماني والغريب اللي عملته ومقولتش لحد اللي حصل بيني وبينها حتى بنتي عشان متخافش وفعلا فضلت ارعاها لغاية ما جة في يوم جارنا ومشاها هي وابنها وزعلت قوي عليهم لاني كنت حسيت بألفة بيني وبينها سبحان الله وان فيها حاجة غريبة عن اي قطة شوفتها لغاية ما في يوم لاقيت الكلبة بتاعة بنتي عمالة تهوهو جامد على باب الشقة وتحفر بأيديها فقولت في ايه وطبطبت عليها وبصيت من العين السحرية ما لاقتش حد قومت فتحت الباب اشوف فيه ايه لاقيت القطة واقفة قدام بابي ايوة هي نفس القطة السودة لكن من غير ابنها ما اعرفش ودته فين ؟؟؟
دخلت جري جبتلها اكل ومية وهي اول ما حطيت الاكل فضل ديلها بتهز جامد وكان باين عليها انها مبسوطة قوي حتى أنا قولتها انت مبسوطة والغريب انها هزت راسها زي المرة اللي فاتت يعني آه وأنا مبقتش اخاف خلاص من القطط بحس ديما انهم كائنات فيها سر عجيب وبتفهم كويس أو ملبوسة ومن يومها وأنا بفكر يا ترى القطة دي كانت جاية ليه أنا مخصوص والا ايه وليه الكلبة نبهتني ليها مع اني ما سمعتش صوتها أو شوفتها من العين السحرية سبحان الله اهي اخدت اللي فيه النصيب ومشيت والى لقاء آخر من حكاية القطط اللي مبتخلصش ابدا
#Rehab
أنت تقرأ
قصص رعب حقيقية قصيرة من واقع حياتي الشخصية ( متجددة)
Horrorقصص من الواقع الحقيقي الذي نعيش فيه ولكنها قصص مرعبة فمن يملك قلب يتحمل الخوف يدخل للقراءة وللعلم كل قصصي يا تعرضت لها شخصيًا أو نقلتها من أفواه أصحابها اتمنى لكم قراءة ممتعة .
