المرة اللي فاتت قولتكم هاحكي عن قصة صاحبتي اللي مسكتني من هدومي في قلب المغسلة
يا ترى ايه اللي حصل معاها ؟
نسمي بالله وتعالوا احكيلكم الحكاية من البداية
الحكاية بدأت لما اتصلت بيه صديقة طفولتي ورن تليفوني الصبح وانا اجازة اصلا من الشغل وكنت نايمة متأخر ومش قادرة افتح عينيا ولما اتصلت تاني قولت اكيد في حاجة غريبة رديت لاقيت صوتها مش طالع فقلت لها انتِ كويسة
قالت لا
قولت مالك يا ....
قالت ماما ماتت
قومت اتنطرت من على السرير وقولت لا حول ولا قوة الا بالله العلي العظيم
انا لله وانا اليه راجعون انا جيالك انتِ فين ؟
انا في البيت
وماما فين
في المستشفى
قومت جريت ما عرفتش بلبس ايه واخدت اول تاكس وروحت لها البيت كانت متلخبطة واخدتها ونزلنا روحنا المستشفى وقولت ايه اللي حصل يا بنتي ماما كانت تعبانة قالت لا ابدا هي فجأة تعبت قومت طلبت الاسعاف جت اخدتها وحالتها فجأة تدهورت من امبارح لليوم
ولاقيت تليفون بيقول تعالوا الحاجة توفت
فكلمتك بدون تفكير عارفة ليه
ليه ؟؟
عشان انتِ قولتلي لو كنتي في مصر وحصل حاجة لامي انت ها تغسليها وتكفنيها لاني مش هاقدر يا رحاب ادخل على غُسلها
لا ها تقدري امال تسيبي امك للناس الغُرب يغسلوها ويكفنوها والا ايه ؟؟؟
رحاب صدقيني مش هاقدر
تعالي بس نشوف الاجراءات ايه وبعد كدة نتكلم
وفعلا روحنا المستشفى ولان اخوها كان مسافر اضطرينا ننتظره للمسا وروحت ورجعت ليها تاني بالليل واول ما جيت لاقيت كل الناس نزلت وهي جوه عند والدتها رحمه الله عليها فقلت ادخل اناديها عشان نروح ونرجع تاني يوم الصبح عشان نجهزها وندفنها
المهم جيت خبطت براحة ودخلت عليها وقلت يا ... تعالي نمشي
قالتلي شوية استنيني برة من فضلك
فطلعت وانتظرت وجتلي مكالمة من بنتي تسأل ايه الاخبار وانا خلصت ولاقيتها طولت روحت رايحة وفاتحة الباب وقولت مش نمشي بقى
قالت مش قادرة ازاي امشي واسيبها لوحدها 😔
قولت تلقائي هي مش لوحدها معاها اللي مونسها
قالت مش قادرة صدقيني روحت داخلة وحطيت ايدي عليها وقولت سيبي امك وتعالي نروح مش معقول ها تباتي معاها
قالت مش قادرة افك رجلي متسمرة في قلب الأرض
روحت حاطة ايدي على وسطها وبشدها ناحيتي راحت واقعة عليه وقالت ليه بتعملي فيه كدة ليه جسمي ساب واترمت عليه فضلت اسحبها لبرة لغاية ما لاقيت زوجها وقولت له هات كرسي مش قادرة اشيلها اكتر من كدة وفعلا جاب كرسي وحطيتها عليه وفضلت تقولي انا بخاف منك من زمان ليه كدة
ليه كدة وأنا والله ما فاهمة فيه ايه ومصدومة لا عارفة ارد ولا عارفة اتكلم والغريب بقى انها فضلت تسألني اسئلة وانا مضطرة اجاوبها لانها فاقت بعد فترة ومسكتني من الجاكت بتاعي كأنها ماسكة حرامي من رقبته وتقولي انت معاكِ حاجات انا عارفة وانتِ عارفة 😳 والله لو حلفت على المية تجمد ان انا مش عارفة معايا ايه وانا مسالمة وفي حالي وفضلت مسكاني من هدومي لغاية ما اخوها جه وفك الاشتباك وقالي اختي مالها اجيب دكتور
قولت لا
طب اجيب شيخ
قولت لا
اختك زي الفل هي تعبانة شوية ومش عايزين شوشرة عشان زوجها موجود
قالي ماشي يا رحاب طب وايه اللي بتقوله دة ؟؟
شوف العلم عند الله انا كل اللي بعمله بقرأ وردي اليومي ولله الحمد وعمري ما فكرت في اذية اي انسان نهائي لكن اختك دائما شايفاني اقدر اعمل حاجات كتيرة قوي غريبة بالنسبة لها
زي ايه ؟؟؟
زي ان انا ممكن ارقي اي شخص تعبان وفيه وجع او الم وطبعا البركة في كلام ربنا يقوم ربنا يشفيه ولو فيه مس لا قدر الله بيروح بعد كذا مرة
طب ربنا يزيدك دي حاجة جميلة
وكمان دائما ربنا بيعرفني الناس وقلوبهم فيها ايه
يعني ابص في وش البني ادم اعرف اذا كان بيضمر ليه خير أو شر وبحس بيه على طول وللاسف دي حاجة بتوجعني قوي لاني بزعل من الناس اللي بوشين ومش عارفة اعمل ايه فعلي قدر استطاعتي بحاول اتجنب الناس واكون في حالي وكفاية دايرة الناس اللي اعرفها
طب نعمل ايه دلوقتي؟؟
نروحها حالا ضروري
وفعلا نزلنا عشان نروح
واصرت توصلني بالعربية
وانا راكبة فضلت تسألني انا ممسوكة منين
فقلت من رجلك
قالت صح
طب انا ايه اللي بيوجعني ؟؟
قولت رجلك
قالت صح
وللعلم كنت بخبط اي كلام وخلاص لغاية ما نروح وقَعَدت تقولي انت عارفة وانا عارفة في ايه ؟
وصدقا لغاية النهاردة هي مفكرة اني وليه من أولياء الله الصالحين 😑وبعرف حاجات كتير وبتيجي لغاية عندي وانا والله سيباها على الله وفعلا روحت لكن اللي حصل بعد كدة تاني يوم واحنا في الغُسل
كان اصعب موقف انا اتحطيت فيه في حياتي اما جيت الصبح احضر غُسل طنط رحمه الله عليها
وللحديث دائما بقية
يتبع
........
#رحاب_نبيل
أنت تقرأ
قصص رعب حقيقية قصيرة من واقع حياتي الشخصية ( متجددة)
Terrorقصص من الواقع الحقيقي الذي نعيش فيه ولكنها قصص مرعبة فمن يملك قلب يتحمل الخوف يدخل للقراءة وللعلم كل قصصي يا تعرضت لها شخصيًا أو نقلتها من أفواه أصحابها اتمنى لكم قراءة ممتعة .
