#قصتي_الليلية_بقلمي_Rehab_Nabil
#الساحر
كان في بلدة في محافظة من محافظات الجمهورية رجل يَدّعي انه يفك المسحور ويجبر قلب المفطور ويجلب الحبيب ويفك الاعمال والاسحار ويأتي له ناس من كل بلاد المسلمين وينتظروا دورهم للدخول لاخد البركة وفك الاعمال .
وكان هناك شخص من أهل بلدته أخذ منه مبلغ من المال على سبيل السلف ومرت الايام واعتقد خطأ ان الرجل لم يعُد يتذكر هذا الدّين وانه لن يحتاج أن يرجعه له مرة أخرى ، وجلس يومًا يشرب شاي ويلعب دومينو على القهوة
وفي اثناء اللعب والضحك فجأة وجد شخص وقف أمامة فجأة وهو يقول له :
صباح الخير الشيخ المبروك بيقولك انه عايزك تروح له البيت
النهاردة وما تتأخرش
عايزني في ايه؟؟ بلا مبالاة رد الرجل
والله ماعرفش كل اللي اعرفه انه قالي اجيلك واقولك انه عايزك ضروري ولازم تروح له النهاردة !!!
قوله مالاقتوش ههههه
هو انا اقدر اكدب على الشيخ دي تبقى مصيبة دستور يا اسيادنا هو ما يعرفش ، بقولك ايه يا اخينا متودنيش في داهية انا هاروح واقوله انك مش عايز تروح تشوفوا وانت وهو احرار بقى مع نفسكم ماليش فيه أصلك مش عارف الشيخ المبروك ممكن يعمل فيك ايه ؟؟
ها يعمل ايه يعني اعلى ما في خيلك إركبه وسرعان ما انسجم في اللعب وتركه الرجل الواسطة بينه وبين الشيخ وهو يقول له
افتكر اني قلتلك بلاش تعاند الشيخ يبقى خلاص تستاهل اللي يجرالك قابل بقى يا عم .
وانتقل الحوار بأكمله للشيخ المبروك وعدم الاهتمام الذي قابله به الرجل الآخر .
بعد ما لعب هذا الرجل جاء يخرج محفظته للحساب على مشروباته لم يجد محفظته فقال أنا اتنشلت يا رجاله وأنا قاعد ازاي
أخذ يبحث هو ومن في القهوة عن محفظته فهو من عائلة لها اسمها بالبلد واستحالة أن تسرق منه محفظته وكيف وأين ؟؟؟
عندما انتهي من البحث ولم يجد محفظته فوجئ بنفس الشخص اتي له وقال الشيخ المبروك بيقولك تعالى خد مخفظتك من عنده
يا نهار اسود وايه اللي وداها هناك وازاي ؟؟؟
ما اعرفش أنا روحت قولت له اللي انت قولته فقالي روح قوله محفظته معايا خليه يجي ياخدها من عندي وبس دي الرسالة لا اكتر ولا أقل ....
يبقى انت اللي سرقتني ووديت المحفظة له
اوعى يا جدع انت والله لا اشتكيك لشيخنا
فقام هذا الشخص بالذهاب لابن اخته فهو يقاربه في السن وكان معروف عنه بقوة شخصيته وحكى له ما حدث وانه مرعوب أن يذهب للشيخ المبروك ....
فقال له ابن اخته أنا هاروح اجيبلك محفظتك بس هات الفلوس اللي عليك ليه وبكدة نبقى سدينا الدين ومالوش حاجة عندك !!!
خلاص روح حاسبه الفلوس اهي كنت عامل حسابي عليها بس أنا خفت اروح له اصله بيخوف قوي سبحان الله وما كنتش عارف انه مخيف وانت بتاخد الفلوس منه ؟؟؟
عموما هات الفلوس ومالكش دعوة أنا هاتصرف
وذهب ابن اخيه للشيخ المدعي ودق الباب وبكل ثقة وقف أمام الباب
ففتح الشيخ وقال له انت مين ؟؟
يعني مش عارفني بكل هيبتك وهيلامانك كله ؟؟؟
انت ابن اخت .....
ايوة حلو الكلام فين محفظه خالي ؟؟؟؟
وهو مجاش ليه بنفسه والا خايف ؟؟؟؟
مالكش فيه خد فلوسك وعدها لو مضبوطة هات محفظته وكل واحد يروح لحاله
ايوة الفلوس مضبوطة
خد محفظه خالك وقوله ميجبش سيرتي تاني عشان لو عرفت مش ها يحصل له طيب انت فاهم ؟؟؟؟
وكان ينظر له نظره مخيفه ، فسرعان ما قال له
فاكرني هاخاف من بصتك دي روح خوف بيها العيال الصغيرين
فهو لم يتأثر واخذ المحفظه ورجع لخاله وذكر له ما حدث
فقال له ماليش دعوة بيه
بس ازاي اخد محفظتي
اكيد عن طريق الجن مش محتاجة ذكاء
اشتاتًا اشتوت
اللهم احفظنا متجبش سيرتهم على لسانك
دول بيجوا على السيرة !!!!!
خلاص اقفل على السيرة دي والراجل دة ما تتعاملش معاه تاني دة دجال فاهمني فاهمك وقفل على السيرة دي خالص
حاضر
ايوة بحبك وانت فاهم وواعي
الرجل دة القرب منه خطر
وعموما لو عملك حاجة ابقى قولي وانا هاتصرف معاه
حاضر يا ابن اختي
سلام يا خالي
سلام ..
يا ترى انتهت الحكاية لغاية كدة والا لسه ليها باقية ؟؟؟
#Rehab
أنت تقرأ
قصص رعب حقيقية قصيرة من واقع حياتي الشخصية ( متجددة)
Terrorقصص من الواقع الحقيقي الذي نعيش فيه ولكنها قصص مرعبة فمن يملك قلب يتحمل الخوف يدخل للقراءة وللعلم كل قصصي يا تعرضت لها شخصيًا أو نقلتها من أفواه أصحابها اتمنى لكم قراءة ممتعة .
