صحيت الصبح وكلي عزيمة واصرار
قانون رحاب رقم 3
دور ورى احساسك واياك تتنازل في يوم عن حاجة نفسك فيها وعايز تعرفها
لبست هدومي ونزلت خبطت على باب الجيران والمرة دي فتحتلي الزوجة أو أم الولد وكان شكلها مريح عن زوجها
وقالت لي اي خدمة فرديت وقولت السلام عليكم انا جارتكم اللي فوق وكنت جيت قبل كدة وزوج حضرتك فتحلي الباب
قالتلي اهلا وسهلا اي خدمة ، رديت وقولت النور في الدور بيرعش ديما وعايزة اغيره وانا ممكن اجيب واحدة على حسابي واركبها وأنا قولت لزوج حضرتك قبل كدة وقالي حاضر
ايوة فعلا هو قالي وجاب اللمبة وقالي ها يركبها النهاردة، طب اتفضلي ادخلي انا هادخل اجيبها ونركبها دلوقتي ونحل المشكلة
طب تمام خليني هنا منتظراكِ
ودة ينفع يعني لو طلعتلك فوق وعايزة منك حاجة ها تسيبيني على السلم كدة مش النبي وصى على سابع جار
ايوة
طب خلاص اتفضلي ادخلي انا قاعدة لوحدي ومعايا بناتي بس
دخلت وسميت بالله واستعذت بالله من الشيطان الرچيم
وأول ما دخلت وقَعَدت
سألتها ابنك مات ازاي بدون مقدمات لاقيت نفسي بسألها
بدأت تقولي
ابني مات مخنوق
ابني مات مخنوق
مخنووووووق
فقلت انت كنتي السبب مش كدة وحاسه بالذنب
قالت لي ايوة وبدأت تبكي بشدة وتقولي أنا حاسة بالذنب لاني سيبته ونزلت وكان نفسي الحقه بس مات مات مات وبدأت تبكي بحرقة ولوعة وتقولي أنا على طول بحس بيه انه معايا ونفسه في الشقة وعشان كدة كنت بتعالج نفسي بقالي اكتر من خمس سنين لغاية ما بدأت اقنع نفسي انه مات وان الحقيقة الوحيدة اللي عارفاها اني مش هاشوفوا تاني ومات وهو زعلان مني وفجأة ظهر ابنها وراها وقالي بالنص انتِ هنا بتعملي ايه مش قولتلك امشي من هنا اتنفضت وقولت بِسْم الله الرحمن الرحيم انت طلعت منين ؟؟؟
وليه زعلان مني ؟؟؟
عشان انتِ الوحيدة اللي قدرتي تشوفيني وأمي مش قادرة تشوفني ولا تكلمني زيك
فجأة الأم سكتت وقالت لي انتِ بتكلمي مين ؟؟؟
قولت ابنك معانا هنا وبيقولي امشي اطلعي برة ايه اللي جابك هنا ؟؟؟
ابني ؟؟؟؟
آه وواقف وراكِ كمان
قامت الأم بسرعة ولفت حوالين نفسها وما لاقتش حاجة
كل دة والولد واقف ومضايق
قولت ابنك بجد هنا وواقف انتِ مش شيفاه؟؟؟
لا مش شيفاه
وبدأت تنادي عليه بصوت عالي
قام قالي هي السبب ؟؟؟
هي السبب في ايه ؟؟؟
في موتي
أمي السبب ؟؟؟
سابتني ليه في البيت لوحدي
كل مرة كنت بقول لها عايز اقعد لوحدي وما كانتش بتسبني
ليه المرة دي سابتني ليه ؟؟؟؟
هي خلاص نسيتني بعد ما أخواتي البنات جمً
وبدأ يبكي
وهي بتسألني ابني لسه موجود ؟؟؟؟
أنا ديما حاسة بيه وبنفسه معايا في البيت وكنت بتعالج بسبب الموضوع دة
ومحدش كان مصدقني وبيقولوا عليه مجنونه
ايوة موجود وبيقول انك نسيتيه وخصوصا بعد ما خلفتي أخواته البنات
بدأت تبكي وتقولي بالعكس انا عمري ما نسيته انا ديما فكراه ولو كنت اعرف انه ها يفتح الغاز ويموت مخنوق ما كنتش خرجت أنا فضلت اتعالج نفسي بعد وفاته لغاية ما ربنا كرمني وخلفت البنتين وبردوا ما نستوش هو أول فرحتي وأول بختي في الخلفة قولي له يسامحني وقولي له اني عمري ما نسيته وديمًا بنام وبقول يا رب اشوفوا في المنام
خليه يسامحني
الولد سكت وقالي قولي لها اني سامحتها وهامشي ومش ها تحس بيه تاني أنا كنت منتظر كل السنين دي هنا عشان اسمع منها انها كانت غلطانة
ودلوقتي آن أوان الرحيل النهائي وفجأة اتفتحت طاقة نور غريبة وأنا بس اللي شفتها والولد قبل ما يمشي قالي قولي لأمي اني بحبها قوي ودخل فيها واختفى مع الطاقة دي
والام هديت من البكاء وقولتها ابنك خلاص روحه راحت بسلام ومبقتش موجودة خلاص في البيت وتقدري تعيشي حياتك عادي واترحمي عليه وربنا يجعل عوضك في بناتك وآخر كلمة قالهالى انه بيحبك وها يفضل يحبك قوي
وسيبتها وطلعت بعد ما هديت واللي حصل معايا بعد كدة هابقى احكيلكم عليه لان الظاهر الولد ساب معايا طاقة أو فجوة خلاني اشوف الميتين واتكلم معاهم بعد كدة والى لقاء آخر وقانون جديد من قوانين رحاب
يتبع .......
#Rehab
أنت تقرأ
قصص رعب حقيقية قصيرة من واقع حياتي الشخصية ( متجددة)
Horrorقصص من الواقع الحقيقي الذي نعيش فيه ولكنها قصص مرعبة فمن يملك قلب يتحمل الخوف يدخل للقراءة وللعلم كل قصصي يا تعرضت لها شخصيًا أو نقلتها من أفواه أصحابها اتمنى لكم قراءة ممتعة .
