ضربت الجرس سمعت اصوات جري وهرج ومرج في الشقة بشكل غريب قولت عادي يمكن بيوضبوا الشقة والا حاجة عشان يعرفوا يفتحوا الباب
المهم فتح ليه الباب طفل صغير وقالي انتِ مين ؟؟؟
بصراحة شكله غريب عينه زايغه ووشه احمر لدرجة غريبة
فقلتله أنا جارتكم اللي فوق في الدور الاخير وعايزة بابا أو ماما لاقيت الطفل بيقولي بطريقة عجيبة بابا وماما مش هنا ومفيش حد غيري عايزة ايه بالضبط ؟؟؟
قولت له عايزة اغير نور السلم فلو سمحت لما يجي بابا او ماما ابقى قولي عشان نشوف هانغير اللمبة ازاي ولو مش عايزين اغيرها أنا ، فجأة لاقيت خيال اسود غطى الولد كله من ورى وكان كبير قوي كأنه غلفه بغلاف ومحدش يقولي ان دي تهيئوات لاني شفته بعيني والولد بقى يردد كلمة واحدة زي الانسان الآلي بالضبط امشي من هنا وكان صوته رهيب مش صوت عيل ابدا
امشي من هنا
امشي من هنا
بصراحة أنا اللي ما بخافش قلقت قوي قوي وطلعت جري على السلم وسيبته وهو راح رازع الباب بقوة وأنا دخلت شقتي ومش لاقيه تفسير للي حصل لغاية ما هديت يومين وقررت انزل اخبط عليهم تاني اشوف ايه حكايتهم الغريبة دي ؟؟؟؟
وكان في اعتراض من بنتي لكن أنا قولت طالما بصلي وبذكر ربنا وبقول اذكاري ومحافظة على وردي يبقى ربنا معايا ومحدش يقدر يقربلي بسوء
وفعلا حصنت نفسي زي المرة اللي فاتت وتوكلت على الله ونزلت ضربت الجرس لكن الشئ الغريب ان اللي فتح لي كان شاب في أوائل الثلاثينات
وقالي صباح الخير اي خدمة فقلت صباح النور أنا جارتكم اللي جيت خبطت عليكم قبل كدة هو بن حضرتك ما قالكش اني جيت من يومين وخبطت
علامات الدهشة كُنت شيفاها في وش الجار بشكل غريب والاغرب رده
قالي أنا ما عنديش ولاد أنا عندي تؤام بنات وعندهم 3 سنين 😳
يا سنة بيضا يا ولاد ؟؟؟
امال مين اللي أنا قابلته دة ؟؟؟ما اعرفش وكمان احنا مكناش موجودين في البيت بقالنا اسبوع كنت عند والدتي ومحدش جة الشقة نهائي ؟؟؟؟
الله الله امال مين اللي فتحلي الباب ؟؟؟
بقول لحضرتك مفيش حد كان في الشقة واحنا لسه راجعين النهاردة انا وبناتي والمدام
اسفة يمكن اتلخبطت وخبطت على شقة الجيران اللي تحت منك لاني لسه جاية جديد العمارة ومش عارفة سكانها
اكيد هو دة اللي حصل معاكِ يا فندم
طبعا اكيد هو دة اللي حصل بس بعد اذنك مش هاطول عليك
عايزة اغير نور السلم لان اللمبة دي نورها ضعيف وبتفضل تترعش فلو مفيهاش تعب غيرها أو انا اجيب واحدة تانية واغيرها
حاضر يا فندم هاغيرها ومتتعبيش نفسك وتنزلي أنا هاغيرها والنور ها يكون افضل من كدة
شكرا جزيلا واسفة على الازعاج وسيبته وطلعت وكلي حيرة مين اللي فتحلي الباب وايه حكاية الطفل اللي قابلته ؟؟؟؟
وايه الكينونة للظل اللي جه وكان وراه ؟؟؟
كلها اسئلة يا عالم هاوصل لها في يوم من الأيام والا ها تنضم لحاجات كتيرة قوي عديت بيها وما لاقتش ليها تفسير لغاية دلوقتي
وعموما قانون رحاب الجديد رقم 1- لو متأكد انك شايف عفريت يبقى انت شايف بجد واياك تخاف أو تتهز والا هايقدر يسيطر عليك ويلبسك
وللحديث بقية ..........
يتبع .....
#Rehab
أنت تقرأ
قصص رعب حقيقية قصيرة من واقع حياتي الشخصية ( متجددة)
Terrorقصص من الواقع الحقيقي الذي نعيش فيه ولكنها قصص مرعبة فمن يملك قلب يتحمل الخوف يدخل للقراءة وللعلم كل قصصي يا تعرضت لها شخصيًا أو نقلتها من أفواه أصحابها اتمنى لكم قراءة ممتعة .
