النهاردة هاحكيلكم على حاجة لذيذة مش عارفة اعمل فيها ايه
من يومين وانا قاعدة في البيت لوحدي لاقيت جرس الباب بيضرب وكنت لسه راجعه من العمل فلبست اسدال الصلاة وجريت جري فتحت الباب لاقيت قط لونه مشمشي واقف قصاد باب البيت وما لاقتش حد غيره استغربت وقولت يمكن بيتهألي واكيد مفيش حد ضرب الجرس ودخلت جبت اكل وميه وحطيتهم قدام باب الشقة فالقط اكل ونزل راح شاف حاله
لاني متعودة يجيلي كل يوم قط لغاية باب بيتي ودائما حاطة علبة فيها مية شرب وعلبة فيها اكل
وكارتونة عشان ينام فيها
وبعدها بيومين سمعت بالليل صوت قط صغير بيبكي بحرقة في الشارع فقلت يا رب لو كان طلع لغاية هنا كنت شوفت ماله لكن هو في الشارع تحت وانا هانزل ادور فين عليه ؟؟
ما علينا ودخلت نمت حوالي اربع خمس ساعات وقومت بعد آذان الفجر عشان اصلي لاقيت صوت قط قدام باب البيت عمال يبكي بحرقة وصوته ضايع خالص
فقلت الله يكون هو دة الصوت اللي كنت سمعاه من بالليل؟؟؟
فعلا طلع هو روحت ماسكاه ودخلته البيت وحميته واكلته ورشيت له دوا الحشرات وقعد عندي يومين خلالهم لاقيت قط صغير عمال يبكي على السلم سامعه صوته بس اتاريه ليه اخ او اخت في نفس سنه بيدور عليه على السلم قومت دخلت جبته وطلعته ليه راح نازل معاه وتاني يوم قبل الفجر صحيت لاقيت صوت ع السلم وحد ضرب عليه الجرس جريت قولت استر يا رب مين بيضرب عليه الجرس في الوقت دة بصيت من العين السحرية وقولت مين ؟؟
ما لاقتش حد بره غير القطط
فتحت براحة الباب لاقيت القط الصغير ناديت عليه جالي واتمسح في ايدي اخدته وحطيت له اكل وميه
وقعد يهرهر بصوت عالي قوي ويتمسح فيه جامد
وبعد شوية طلعته وها تقولوا ليه ما احتفظتيش بيه عشان عندي اربع قطط ذكور كبار وكلبة ها يقطعوه ضرب وهو مش حمل ضربهم
وفعلا بقى كل كام يوم يجي يقعد قدام باب شقتي بالليل متأخر لغاية الصبح ويمشي ومش عارفة ازاي بسمع ضرب الجرس لما بيكون في قط على باب شقتي تفتكروا دة ايه ؟؟؟
عفريت قطط والا ايه ......
وعموما هابقى احكيلكم ايه اللي حصل مع شيكو ما انا سميت القط الصغير شيكو
وللحديث بقية ........
#Rehab
أنت تقرأ
قصص رعب حقيقية قصيرة من واقع حياتي الشخصية ( متجددة)
Horreurقصص من الواقع الحقيقي الذي نعيش فيه ولكنها قصص مرعبة فمن يملك قلب يتحمل الخوف يدخل للقراءة وللعلم كل قصصي يا تعرضت لها شخصيًا أو نقلتها من أفواه أصحابها اتمنى لكم قراءة ممتعة .
