وحشتوني جدا وقبل ما احكي قصتي الجديدة احب اقولكم ان القصة المرة دي حصلت معايا شخصيًا ومحدش يقولي تفسيرها ايه لاني بصراحة ما اعرفش
نصلي على النبي الهادي عليه افضل الصلاة والسلام
كنت رايحة الحسين وخان الخليلي في يوم من حوالي شهر ونص اشتري شوية حاجات وكنت بلف على المحلات واشم في البخور واتفرج على الهدوم وبصراحة ما كنتش روحت من زمان جدا ولاقيت حاجات كتيرة جدا اتغيرت في الشوارع وقدام المسجد وخلافه
ولما تعبت من كتر اللف قعدت على كرسي في محل وبدأت اتفرج على البروشات لاني بحبها من زمان وخصوصا البروشات الفرعونية بحب البسها في الچواكت بتاعتي وفعلا نقيت واحد جميل ودفعت تمنه ومنتظرة اختي تخلص عشان اقوم اكمل لف معاها وفجأة بلف برقبتي للجمب لاقيت مانيكان لطفل صغير محطوط جمب باب المحل وكان لابس لبس رياضي فبصيت عليه عادي جدا وفجأة بدون مقدمات لاقيته لف راسه وبصلي وهو اساسا مرسوم على وشه ضحكة 😃
أنا فضلت مبرقة زي الصورة بالضبط دي 😳ومش عايزة اقفل عيني ايه اللي أنا شوفته دة دة محدش قرب منه نهائي طب ازاي لف وشه وبصلي 😦
طب أنا اسكت طبعا لا☺️ قومت واقفة وبكل ثقة مسكت راسه ولفيتها يمين وشمال والله زي ما بقولكم كدة وعدلت وقفته وضبطت له هدومه كأنه عيل بالضبط وطبطبت عليه وطلعت برة المحل مشيت
وأنا على ثقة بأن المنيكان دة ملبوس روح لان استحالة يحصل كدة فيه بدون ما يكون ملبوس روح
وبعد كدة بحكي لصديقة واخت ليه اللي حصل يمكن يكون عندها تفسير قالت لي بالحرف الواحد الحاجات دي بتبقى ملبوسه وشكله ملبوس بروح طفل شاف فيكِ شبه من امه🥲 عشان كدة لف وشه وبصلك
بصراحة أنا ما لاقتيش تفسير للي حصل دة وقولت لو روحت الحسين تاني هاعدي على نفس المحل واشوف الطفل او منيكان الطفل لسه موجود والا لا ولو حد عنده فكرة دة ايه يا ريت يكتبلي في الكومنتات ونتواصل سوا عشان اقولكم على حاجة تانية حصلت معايا في مجال شغلي وعملي مش بقولكم أنا جاذبة لحاجات اب نورمال حاجات ملهاش تفسير
وطبعا دائمًا
للحديث بقية ......
يتبع
#Rehab_Nabil
أنت تقرأ
قصص رعب حقيقية قصيرة من واقع حياتي الشخصية ( متجددة)
Horrorقصص من الواقع الحقيقي الذي نعيش فيه ولكنها قصص مرعبة فمن يملك قلب يتحمل الخوف يدخل للقراءة وللعلم كل قصصي يا تعرضت لها شخصيًا أو نقلتها من أفواه أصحابها اتمنى لكم قراءة ممتعة .
