Хятадын цагаан сараар бид хоёр эцэг эхийнхээрээ зочилдог уламжлалтай. Ф-ийн гэрийнхэн ч ёстой бужигнаж өгнө шүү дээ. Авга ах нар, авга эгч нар, нагац ах нар, нагац эгч нар, үеэлүүд, хамаатны дүү нар гээд л. Цагаан сар болохоор хүний хөлөөр тасрахгүй. Ф-ийн аавынх нь ажлын хүмүүс нэмэгдвэл ч гэрт багтаж шингэх аргагүй болно.
Аав нь их хатуу хүн болохоор тэднийд байхдаа бид хоёр хамаг сайнаараа байх гэж хичээдэг. Өглөө бүр 6:30-д босоод буйдан дээр нэг нэгрүүгээ харж эвшээж гарна шүү дээ. Хүмүүс ирэхээр Ф-ийн ээж бид хоёрыг жимс угаах гэх мэт ажилд дайчилна.
Ф зочны өрөөн дэх хүмүүс харж зогссоноо ингэж хэлэв.
-Plants vs Zombies шиг санагдахгүй байна уу?
-Айн?
-Дараагийн ээлжний Зомби нар ирж байна.
Би инээд алдан "Хэл амаа болгоомжтой. Аав сонсчихвол нэг сайн гөвүүлнэ шүү." гэлээ.
-Цагаан сараар нэгнийхээ мэндийг мэднэ гэж нэгэндээ бөөн төвөг удаж байх юм. Хялбарчлах хэрэгтэй.
-Яаж хялбарчилах юм бэ дээ?
-Утсаараа янз бүрийн ваучер явуулаад л хүмүүс нь өөрсдөө дэлгүүр ороод өөрсөддөө хэрэгтэй юмаа авцгаана биз.
-Хн.
-Хүүхдүүдэд өгдөг мөнгөө ч гэсэн интернэтээр л шилжүүлчихмээр байгаа юм.
Ийн ярьж зогстол Ф-ийн аав биднийг дуудлаа.
-Чэн ахтайгаа танилц.
Би тэр даруй түүнтэй мэндэллээ. Чэн ах явахаасаа өмнө надад улаан дугтуй өгөх гэв. Өдий насалчихаад байхад ийм юм өгсөнд нь гайхаж балмагдсандаа тэр даруй татгалзлаа.
-Ф та хоёрыг гэрлэхэд очиж чадаагүй болохоор нөхөж байна гэж бодоод авчих.
Ингээд би хэдэх үггүй өгснийг нь авлаа. Оройн хоолны дараа би бушуухан л улаан дугтуйг задлаад жаргалтай нь аргагүй доторх мөнгийг нь тоолж эхлэв. Чэн ахын өгөөмөр сэтгэлийг биширсэн би ингэж хэллээ.
-Интернэт банк шал хэрэггүй юм байна. Мөнгийг гараараа барьж байгаад тоолох шиг сайхан юм алга.
-Шуналтай гэдэг нь.
-Аяа, алдраа дуурсгасан агуу та ч гэсэн эгэл даруу надад мөнгө хайрлахгүй юм уу?
-Болно оо гэж хэлээд тэр дугтуйнаас 100 доллар сугалж аваад өгөхдөө "1 доллар хариулж өгөөрэй" гэж хэлэв.
-Ямар хүн цагаан сараар мөнгө өгчихөөд хариулт нэхдэг юм?
-99-ийн бэлэгдэл нь таалагддаг юм.
/99 буюу "九九" ханз нь "久久"буюу урт удаан гэсэн ханзтай ижил дуудлагатай байдаг./