[Zawgyi]
မထင်မှတ်ပဲ အချစ်ဦးကို ပြန်တွေ့လိုက်ရတဲ့အချိန်ဆို ဘာပြောလို့ပြောရမှန်းမသိတာတို့၊ ရှက်ရွံ့တာတို့ ဖြစ်တတ်ကြပေမဲ့ သူတို့နှစ်ဦးကတော့ အေးအေးဆေးဆေးပင် ကော်ဖီထိုင်သောက်နိုင်သည်။
အခုသူတို့အခြေအနေက ဘယ်လိုပြောရမလဲဆိုတော့ ရည်းစားဟောင်းလို့ ဆိုရအောင်ကလည်း လမ်းခွဲစကားကို ဘယ်သူကမှ စမပြောခဲ့ကြ။ အဲ့လိုဆိုလို့ တွဲနေသေးလားဆိုတော့လည်း ကွဲကွာသွားခဲ့တာ ခြောက်နှစ်ကျော်။ ဒီကြားထဲမှာ နောက်ထပ်ရည်းစားတွေ ရခဲ့သေးလားလို့လည်း ဘယ်သူကမှ ထုတ်မမေးပဲ ခပ်တည်တည်ပဲ နေနေကြသည်။
တိတ်ဆိတ်နေသော အခြေအနေကို ဖြိုခွင်းလိုက်တာက ရိပေါ်ပင်။
"ဒီကြားထဲ အဆင်ပြေခဲ့ရဲ့လားရှောင်းကျန့်"
ဒါပါပဲ ဟိုမကျဒီမကျ အခြေအနေကြီးမှာ မေးလို့ရတဲ့ မေးခွန်းက ဒီတစ်ခုတည်းလေ။ ရှောင်းကျန့်ကတော့ သောက်လက်စ ကော်ဖီခွက်ကို အသာချကာ ရိပေါ်ကို ပြုံးပြလိုက်သည်။
"ငါကတော့ပြေအောင်နေခဲ့ပါတယ်..မင်းအဆင်ပြေမှန်းကတော့ငါသိတာမို့မမေးတော့ဘူး"
ရိပေါ်ကတော့ ရှောင်းကျန့်၏စကားကို နားမလည်နိုင်။ ဘာလို့ သူအဆင်ပြေနေခဲ့တယ်လို့ ရှောင်းကျန့်က ထင်ရတာလဲ။ ဒီနှစ်တွေထဲမှာ သူအဆင်မပြေခဲ့တာတွေ သူအသိဆုံးပဲ။ အိမ်နဲ့ခဏခဏ ရန်ဖြစ်ရလွန်းလို့ အိမ်ပေါ်ကဆင်းလာတဲ့အပြင် အမွေပါဖြတ်ခံလိုက်ရတဲ့အထိပဲ။ အမွေဖြတ်ခံရတဲ့ကိစ္စကိုတော့ သူသိပ်ပြီး ဂရုမစိုက်ဘူး၊ သူ့ရဲ့ ခြေလက်တွေက အကောင်းကြီးမို့ ဒီအမွေတွေမရလည်း ကိုယ့်ဝမ်းကိုယ်ရှာစားနိုင်သည်။
အမှန်အတိုင်းပြောရရင် သူပင်ပန်းခဲ့တာပေါ့၊ ဒါပေမဲ့ ရှောင်းကျန့်နဲ့ ပြန်တွေ့ခဲ့ရင်ဆိုတဲ့ စိတ်လေးနဲ့ အရာရာကို တင်းခံခဲ့တယ်။ နေ့နေ့ညည တောင့်တနေမိတာ ရှောင်းကျန့်မို့ အခြားဘယ်သူ့ကိုမှ သူလက်မခံနိုင်ခဲ့သည်အထိ သူအသည်းမာခဲ့သည်။