❤السيرة النبوية❤

#الحلقة_مائة_وثلاثة_عشر

#قصص_الأنبياء(٢)
#السيرة_النبوية
#الحلقة_مائة_وثلاثة_عشر
#أحداث_السنة_السادسة_من_الهجرة
#ما_بعد_الحديبية

وقفنا المرة إللي فاتت عند رسول الله ﷺ لما قام يذبح الهدي بتاعه ويحلق شعر رأسه عشان يتحلل من الإحرام،
لكن قبل ما نكمل عايزة أوضح نقطة😊
الحديث إللي قلناه المرة إللي فاتت عن إصلاح ذات البين:
ألا أخبركم بأفضل من درجة الصيام والصدقة والصلاة، فقال أبو الدرداء : قلنا بلى يا رسول الله ،
قال :إصلاح ذات البين"
المقصود هنا بالصلاة والصدقة والصيام بالنوافل مش الفرائض، يعني رسول الله ﷺ بيقول إن إصلاح ذات البين أفضل من نوافل الصلاة والصدقة والصيام،
لكن مش أفضل من فرائض الصلاة الخمس ولا أفضل من صيام شهر رمضان الفرض ولا هي أفضل من الزكاة مثلا،
لأ، الأفضلية هنا بين النوافل فقط 👌

نرجع لرسول الله ﷺ وهو بيذبح الهدي، الصحابة لما شافوا رسول الله ﷺ قام يذبح الهدي بتاعه عرفوا خلاص إن كده مفيش أي أمل إنهم يدخلوا مكة يكملوا عمرتهم فقاموا كلهم وبدأوا يذبحوا الهدي بتاعهم ويحلقوا رؤوسهم،
ولكن قاموا وهم مغمومين لدرجة إنهم كادوا يقتلوا بعض من الغم،
يعني مثلا لما الواحد بيكون بيقطع حاجة بالسكينة وهو متضايق وزعلان أو مغموم مش ساعات بيتعور🤔
لأن ساعتها مش بيبقى مركز هو بيعمل إيه لكن تركيزه كله في الهم والغم إللي هو فيه،
كذلك الصحابة في الموقف ده كانوا مهمومين ومغمومين فكادوا يقتلوا بعض من الغم،

☆طيب ليه الصحابة مسمعوش كلام رسول الله ﷺ من أول مرة قال لهم يقوموا يذبحوا الهدي مع إنهم زي ما قال عروة بن مسعود الثقفي في وصفهم إنهم مجرد ما رسول الله ﷺ كان يأمر أمر الكل بيسارع في تنفيذ الأمر ده😕

الصحابة كان عندهم أمل إن الوحي ينزل ويقول لهم ادخلوا مكة وكملوا العمرة، يعني كانوا زي الغريق إللي بيتعلق بقشة زي ما بيقولوا😅
فلما رسول الله ﷺ قال لهم يقوموا يتحللوا مكنوش مستوعبين، يعني هو بجد كده خلاص مفيش أي أمل إننا نكمل العمرة بعد ما جينا المشوار ده كله،
طيب وأبو جندل هنسيبه فعلا لقريش يعذبوه ومش هننقذه وناخده معانا😥
تقدروا تقولوا إنهم كانوا في حالة صدمة😕
عشان كده رسول الله ﷺ كان عاذرهم وتعامل مع الموضوع بكل حكمة لما لقاهم مستجابوش لأمره تركهم لحد ما يلاقي حل، وهو كان حاسس باللي هم حاسين بيه وشايف الأزمة إللي هم فيها،
لكن الفرق إن رسول الله ﷺ كان شايف المصالح إللي هتيجي من وراء المعاهدة دي وإللي الصحابة مكنوش شايفينها،
وانتم عارفين الإنسان لما بيكون مهموم أو في ابتلاء مبيشفش قصاده،
فلما خرج رسول الله ﷺ وبدأ هو يذبح الهدي عرفوا خلاص إن مفيش وحي هينزل يقول لهم يكملوا العمرة فهنا بقى قاموا كلهم وبدأوا ينفذوا أمر رسول الله ﷺ،
وبكده انتهت مشكلة كبيرة جدا كانت هتحصل بين رسول الله ﷺ والصحابة بسبب رأي أم سلمة رضي الله عنها.