❤السيرة النبوية❤

#الحلقة_الواحدة_والستون

#قصص_الأنبياء(٢)
#السيرة_النبوية
#الحلقة_الواحدة_والستون
#قتلى_وأسرى_بدر

اتكلمنا المرة إللي فاتت عن غزوة بدر وعن الأحداث إللي حصلت مع المسلمين وإزاي إنهم ثبتوا في قتالهم ضد المشركين فربنا أرسل لهم مدد من الملائكة عشان يقاتلوا معهم ويثبتوهم، وانهزم المشركون وهربوا من أرض المعركة واتجهوا نحو مكة،
قُتل من المشركين في غزوة بدر سبعين رجل، وأُسر سبعون،
من السبعين إللي قُتلوا غير عتبة وابنه الوليد وشيبة أخو عتبة قُتل حنظلة بن أبي سفيان وإللي قتله زيد بن حارثة إللي كان في الوقت ده اسمه زيد بن محمد،
وقُتل أبو البُخْتري بن هشام مع إن رسول الله ﷺ قال لو رأيتم أبو البختري بن هشام في المعركة محدش يقتله،
من باب حفظ الجميل له،
فاكريييين الناس إللي شاركت في نقض الصحيفة في شعب أبي طالب وكان أبو البختري واحد منهم😁
أهه رسول الله ﷺ كان عايز يرد جميل أبو البختري بن هشام فقال للمسلمين محدش يقتله،
لكن أبو البختري كان بيقاتل واحد من المسلمين فقال له المسلم رسول الله ﷺ أمر إننا لا نقتلك فخليك على جنب وكان أبو البختري معاه واحد صاحبه فقال للمسلم :
طيب وصاحبي😕
فقال له الصحابي : صاحبك لأ، معندناش أمر بعدم قتله،
فقام أبو البختري يدافع عن صاحبه ويقاتل المسلم فاضطر الصحابي إنه يدافع عن نفسه فقاتل أبو البختري بن هشام فقتله👌
وبعدين اعتذر لرسول الله ﷺ وقال له إنه اضطر يدافع عن نفسه فسامحه رسول الله ﷺ،
من الناس إللي قُتلت كمان نوفل بن خويلد أخو أم المؤمنين خديجة بنت خويلد، وإللي قتله علي بن أبي طالب🙊
وعمر بن الخطاب قتل خاله العاص بن هشام بن المغيرة أخو أبو جهل،
وعبد الرحمن بن أبي بكر الصديق مكنش لسه أسلم فكان بيقول لأبوه بعد إسلامه أنا شفتك في غزوة بدر وكنت ببعد عنك عشان مقتلكش،
فقال له أبو بكر الصديق رضي الله عنه أنا لو كنت شفتك كنت قتلتك👌

☆لازم نقف هنا وقفة مهمة جدا😶
الصحابة كانوا بيقتلوا أقاربهم بكل بساطة عادي كده إزاي، هم مش كان بينهم ذكريات وعيش وملح وعلى طول مع بعض واحنا عارفين العصبية القبلية عندهم كانت عاملة إزاي،
ودلوقتي كده بكل بساطة يقتلوا أقاربهم، لأ والأب يقول لابنه أنا لو كنت شفتك كنت قتلتك كده عادي😳
إنتم عارفين إن في شريعة الإسلام على قول جمهور أهل العلم إن الأب لا يُقتل قصاصا لو قتل ابنه،
وده لأن مفيش أب عاقل هيقتل ابنه في الوضع الطبيعي،
بقول في 《الوضع الطبيعي》 😅 وإلا في حالات يقتل الوالد من ابنه👌
لأن الأب مفطور على حبه لابنه يعني عاطفة لا إرادية،
فإزاي وصل بأبي بكر الصديق رضي الله عنه إنه يقول لابنه أنا كنت هقتلك لو شفتك،
والناس دي مكنتش بتهوّل ولا تقول كلام كده وخلاص، كانوا على أد كلمتهم فعلا👌
وشوفوا مصعب بن عمير هو كمان في قصته مع أخوه لما أُسر قال للي أسره وكان واحد من الأنصار:
امسكه كويس وخد بالك منه، أمه غنية وعندها فلوس كتير هتفديه بيها👌
فأخوه قال له: هي دي وصيتك بأخوك😳
فقال له مصعب وهو بيشاور على الأنصاري : هو إللي أخويا مش إنت🤚
《قصة مصعب مع أخيه فيها ضعف بسيط》
لكن بتؤدي نفس المعنى، إن الصحابة بقى انتماؤهم لدينهم، وإن صلة القرابة دي لا تعني لهم أي شيء وإن أهم حاجة هي الدين،
في حين إن في الواقع بتاعنا تلاقي البنت مثلا تحضر فرح أخوها ولا فرح أختها ولا أي حد من قرايبها إللي كله منكرات ومحرمات بحجة إن دي أختي وإزاي أسيبها في يوم زي ده،
وده أخويا إزاي محضرش فرحه😱
ده هيزعل والناس هتزعل وأمي وأبويا و...و...
طيب هو إنتي متخيلة إن الناس إللي إنتي عصيتي ربنا عشانهم دول هينفعوكي يوم القيامة😑
متخيلة إن واحد فيهم هييجي يقول لربنا يارب سامحها أصلها عصيتك عشان متزعلنيش☺
عارفة أهلك دول هيعملوا معاكي إيه يوم القيامة؟
مش أنا إللي هقولك شوفي ربنا عالم الغيب والشهادة بيقول لك إيه إللي أهلك أو أبنائك أو أي حد هيعمله معاكي يوم القيامة:
"يَوْمَ يَفِرُّ الْمَرْءُ مِنْ أَخِيهِ * وَأُمِّهِ وَأَبِيهِ* وَصَاحِبَتِهِ وَبَنِيهِ* لِكُلِّ امْرِئٍ مِنْهُمْ يَوْمَئِذٍ شَأْنٌ يُغْنِيهِ"
هيطلعوا يجروا منك ومحدش فيهم هينفعك ولا يعطيكي حسنة واحدة،
هو إنتي لما يبقى عندك امتحان وأمك لو قالت لك متذاكريش وسيبك من المذاكرة والكلام ده هتسمعي كلامها ولا هتقعدي تذاكري لأنك هتبقي محتاسة في الإمتحان ومش عارفة تجاوبي حاجة😑
أنا عارفة إنهم مش بيقولوا كده بالعكس ده هم مش وراهم طول النهار غير قومي ذاكري قومي ذاكري🙄
ولو كان الأهل حريصين الحرص ده على آخرة عليهم زي ماهم حريصين على دنيتهم مكنش ده بقى حال الشباب😞
فانتي خليكي حريصة على مصلحة نفسك،
محدش هينفعك يوم القيامة عند ربنا غير عملك الصالح، غير كده كله هيهرب منك👌