❤السيرة النبوية❤

#الحلقة_الثامنة_والستون

#قصص_الأنبياء(٢)
#السيرة_النبوية
#الحلقة_الثامنة_والستون
#هل_سُحر_رسول_الله
#هل_الأذكار_تحمي_الإنسان_من_السحر

كنا واقفين المرة إللي فاتت عند سؤال مهم وهو : هل سُحر رسول الله ﷺ 🤔

نعم رسول الله ﷺ سُحر👌
طيب إزاي يُسحر وهو رسول الله😳
رسول الله ﷺ بشر، بيحصل له كل إللي بيحصل لأي بشر عادي من الأمراض والابتلاءات،
فزي ما بيجيله مرض وهو رسول الله، وزي ما بتحصل له مشاكل وخلافات مع زوجاته وهو رسول الله، وزي ما بيحصل له ابتلاءات وهو رسول الله، برده سُحر وهو رسول الله 🤷‍♀️
لكن في نفس الوقت رسول الله ﷺ معصوم عصمة كاااملة في تبليغ شريعة الإسلام ، يعني كل حاجة رسول الله ﷺ قالها لنا في الدين فهي صحيحة لأنه لا ينطق عن الهوى 👌
والسحر أنواع،
منه السحر المؤثر على علاقة الرجل بزوجته، وهو ده السحر إللي أصيب به رسول الله ﷺ، مش السحر إللي بيؤثر على العقل 👌
فكان يُخيّل إليه أنه أتى أهله يعني حصل علاقة زوجية بينه وبين واحدة من نسائه لكنه لم يفعل،
والسحر هنا مش سحر الربط، خدوا بالك في فرق بين سحر الربط، وبين سحر التخيل إللي حصل مع رسول الله ﷺ 😅
وكون إن رسول الله ﷺ تعرض للسحر فده لا يُنقص من قَدره ﷺ نهائي،
السحر مرض زي أي مرض ورسول الله ﷺ بشر يصيبه ما يصيب البشر من أمراض بصفة عامة،
وموسى عليه السلام تعرض لسحر التخيل ده فاكرين😁
لما السحرة ألقوا العِصي والحبال فخُيل لموسى عليه السلام من سحر السحرة إنها ثعابين بتتحرك،
"يُخَيَّلُ إِلَيْهِ مِن سِحْرِهِمْ أَنَّهَا تَسْعَى"
فإيه المشكلة هنا لما يحصل لرسول الله ﷺ سحر التخيل إنه فعل شيء وهو لم يفعله،
ده احنا كبشر ساعات بنتخيل إننا عملنا الحاجة واحنا معملنهاش، تتتخيلي مثلا إنك طفيني نور الغرفة وبعدين تلاقيه مفتوح وإنتي مقفلتهوش أصلا بس توهمتي إنك قفلتيه،
فمفيش إشكالية خالص، انا بتكلم من جانب المنطق، أما من الجانب الشرعي فالحديث صحيح رواه البخاري ومسلم وغيرهم من أئمة الحديث👌

☆طيب إيه قصة السحر ده حصل إزاي يعني🤔

غلام من اليهود كان يخدم رسول الله ﷺ، فاليهود قعدوا يتحايلوا عليه ويُغروه عشان يساعدهم في سحر رسول الله ﷺ لحد ما وافق، فأخذ شعرات من مشط رسول الله ﷺ،
وأخذ شوية من أسنان مشط رسول الله ﷺ وأعطاها لليهود،
راحوا لواحد منهم اسمه لَبِيد بن أعصم،
《وفي رواية إن الغلام هو نفسه لبيد بن أعصم》
وقيل إن لبيد بن اعصم ده  من حلفاء اليهود من أهل المدينة أسلم نفاقا، يعني أظهر الإسلام وهو منافق، واتكلمنا عن المنافقين قبل كده😊
فقال له رؤساء اليهود:
إنت أحسن  واحد عندنا بيعرف في السحر، واحنا حاولنا نسحر محمد بس معرفناش،
واحنا هنعطيك مكافأة أو هنعطيك أجر لو انت سحرت لنا محمد، فاتفقوا إنهم هيعطوه ثلاثة دنانير،
أخذ الشعر وأسنان المشط وعمل عليهم سحر ودفن السحر ده في بئر لبني زُريق، بطن من بطون الأنصار زي فرع أو عيلة كده، زي ما بنقول دي أرض عائلة فلان😅
فمرض رسول الله ﷺ وتغير مزاجه، ومكنش عارف عنده إيه، وكان يتخيل إنه يأتي نساؤه وهو لم يأتيهن،
ففي مرة وهو نائم جاؤه ملكان، واحد قعد عند رأسه والثاني عند رجله، فقال الملك إللي عند رأسه للي عند رجله:
هو ماله في إيه؟
فقال له الملك إللي كان عند رجله: ده مطبُوب!
مسحور يعني، فقال الملك: مين إللي سحره🤔
قال: لبيد بن أعصم، فقال : إزاي سحره؟
قال الملك :
بمشط ومشاطة! فقال الملك : وفين مكان السحر ده؟
قال الملك إللي عند رجله ﷺ:
في قشر طلع نخلة موجود تحت حجر في أسفل بئر ذروان، فاستيقظ رسول الله ﷺ وقال لعائشة رضي الله عنها :
ربنا أخبرني بالمرض إللي عندي، فخرج رسول الله ﷺ مع مجموعة من أصحابه وراحوا البئر،
لما شافوها لقوا ميتها عاملة زي نقيع الحناء، شوفوا لما بتحطوا الحنة في مية المية بتكون عاملة إزاي🤔
أهه مية البئر كانت عاملة كده، والنخل إللي حوالين البئر إللي كان بيشرب من البئر  الْتوى سيفه يعني فروعه اتلوت  كأنها رؤوس الشياطين،
فنزل رجل في البئر وطلّع قشر النخلة من تحت الحجر، ولقوا فيها من شعر رسول الله ﷺ وأسنان مشطه، ولقوا تمثال من الشمع على هيئة رسول الله ﷺ وفي إبر مغروزة في التمثال ده،
ولقوا وتر معقود فيه إحدى عشرة عقدة، الوتر إللي بيبقى في القوس ده عارفينه🤔
في الوقت ده جاءه جبريل عليه السلام بالمعوِّذتين
《الفلق والناس》وقال له :
يا محمد! (قُلْ أَعُوذُ بِرَبِّ الْفَلَقِ ) وحل عقدة، يعني فك عقدة من العقد، (مِنْ شَرِّ مَا خَلَقَ) وحل العقدة إللي بعدها، لحد ما فك العقد كلها،
وكان كل ما رسول الله ﷺ يشيل إبرة من التمثال يحس بألمها وبعدين يحس براحة،
لحد ما شال الإبر كلها وخلاص رجع مُعافى مفيش فيه أي مشكلة،
فالصحابة قالوا له : لو إنك تقتل اليهودي😕
فقال لهم رسول الله ﷺ: أنا خلاص ربنا شفاني، وهو مستنيه عذاب شديد عند ربنا، ومش عايز أثير فتنة بين الناس👌