❤السيرة النبوية❤

#الحلقة_الحادية_والثلاثون

#السيرة_النبوية
#الحلقة_الحادية_والثلاثون
#رحلة_الإسراء_والمعراج
#الإسراء

كنا واقفين المرة إللي فاتت عند جبريل عليه السلام لما جاء لرسول الله ﷺ وغسل صدره وقلبه عشان يجهزه لرحلة الإسراء والمعراج،
قبل ما ندخل في التفاصيل أحب أوضح كم نقطة😁

◇كل المعلومات إللي هقولها عن الإسراء والمعراج مصدرها الأحاديث الصحيحة فقط، متجمعة جنب بعض عشان تكون القصة،
طبعا ده مش اجتهادي😅
أنا بسمع من المشايخ والعلماء الموثوق في علمهم وبدور على الأسئلة والشُّبه وإجابتها وبشرح بأسلوبي مش أكثر😊

◇الإسراء والمعراج حصل بعد رجوع رسول الله ﷺ من الطائف، لكن في أي شهر أو في أي يوم محدش يعرف نهائي🙅‍♀️❌
لا في حديث صحيح ولا حديث ضعيف ولا حتى حديث موضوع إن ليلة الإسراء والمعراج كانت في ليلة السابع والعشرين من رجب،
وبالتالي الليلة دي ملهاش أي فضل لا بصلاة ولا بذكر ولا بقيام ولا بصيام ولا احتفال ولا أي حاجة خالص،
يوم زيه زي أي يوم تاني 👌

◇الهدف من الرحلة دي إن ربنا يهون على رسول الله ﷺ  الابتلاءات إللي حصلت معاه وإللي هتحصل بعدين، ليثبت قلبه عشان يقدر يكمل في طريق نشر الدعوة😉

◇رحلة الإسراء والمعراج كانت بالروح والجسد، مش بالروح فقط ولا هي تهيؤات ولا حلم ولا أي حاجة خالص😀
جبريل جاء لرسول الله ﷺ وهو صاحي زينا كده عادي وأخذه في رحلة الإسراء والمعراج👌
والدليل إن ربنا قال:
"سُبْحَانَ الَّذِي أَسْرَىٰ بِعَبْدِهِ "
والعبد يتكون من روح وجسد 👌

◇رحلة الإسراء والمعراج معجزة حصلت لرسول الله ﷺ واحنا كمسلمين بنؤمن بها، وهي من الغيب، ومن صفات المؤمنين إنهم بيؤمنوا بالغيب،
وإللي مش مقتنع ومش عايز يؤمن بها هو حر ..مع نفسه ويبقى يقول كده لربنا يوم القيامة😀
"وَقُلِ الْحَقُّ مِنْ رَبِّكُمْ فَمَنْ شَاءَ فَلْيُؤْمِنْ وَمَنْ شَاءَ فَلْيَكْفُرْ "

نبتدي الرحلة مع رسول الله ﷺ من البيت الحرام لحد ما نوصل للمسجد الاقصى،
نشوف رسول الله ﷺ  هيروح هناك إزاي😉
خرج رسول الله ﷺ مع جبريل خارج بيته فوجد دابة، حيوان أبيض طويل، أكبر من الحمار وأصغر من البغل،
عليه السّرج واللّجام، إللي هو القعدة إللي بتتحط على الحصان دي عارفينها 😅
ومفيش دليل على إن الحيوان ده كان له أجنحة 👌
وكان اسم الحيوان ده 《البُرَاق》، ركب عليه رسول الله ﷺ مع جبريل عليه السلام،
وكانت خطوة البراق مد بصره، يعني مطرح ما عينه تجيب يحط رجله ،فتخيلوا سرعته أد إيه😮
عشان كده اسمه البراق، لأن سرعته زي سرعة البرق كده😁

☆وليه رسول الله ﷺ  ركب أصلا على البراق، مش ربنا قادر إنه يوصله للمسجد الأقصى بدون ما يركب حاجة😕

ركوب البراق كان زيادة في تشريف رسول الله ﷺ ، لأنه لو راح بنفسه كده كان هيبقى في صورة الماشي،
والراكب أعز من الماشي 😉