❤السيرة النبوية❤

#الحلقة_السابعة_والخمسون

#السيرة_النبوية
#الحلقة_السابعة_والخمسون
#الطريق_إلى_بدر

كنا واقفين المرة إللي فاتت عند رسول الله ﷺ لما بدأ يجهز الجيش عشان يخرجوا لاعتراض قافلة قريش،
اجتمع لرسول الله ﷺ المرة دي عدد كبير من الصحابة، فقسمهم رسول الله ﷺ لمهاجرين وأنصار وجعل لكل فريق راية،
جعل للمهاجرين راية وكانت مع علي بن أبي طالب، وجعل للأنصار راية وكانت مع سعد بن معاذ،
وجعل راية عامة لكل الجيش وكانت مع مصعب بن عمير،
وجعل رسول الله ﷺ واحد من الصحابة وهو قيس بن صعصعة ومعاه مجموعة صغيرة في مؤخرة الجيش عشان يحمي ظهرهم أو شيء سقط من الجيش يأخذه😉

خرج رسول الله ﷺ من المدينة مع الجيش وانطلقوا ناحية بدر، لأن عيون المسلمين أو خلونا نقول بلغة عصرنا المخابرات الإسلامية عرفت إن القافلة هتمر في منطقة بدر،
وهي على بُعد سبعين كيلو من المدينة،
فاتجه رسول الله ﷺ ناحية بدر عشان يقطع الطريق على القافلة،
لكن زي ما المسلمين لهم مخابرات، المشركين كمان كان لهم مخابرات 😅
وخصوصا إن قائد القافلة مش حد سهل ده أبو سفيان بن حرب من أذكى وأدهى العرب👌
فعرف إن رسول الله ﷺ خرج من المدينة عشان يعترض القافلة، لكنه ميعرفش رسول الله ﷺ وصل لحد فين بالضبط،
فمحبش يغامر ويضيع وقت،
راح باعت واحد من إللي كانوا معاه لقريش عشان يقول لهم يلحقوا القافلة بتاعتهم،
القافلة دي فيها أموال كثيرة جدا ولو خسروها هتبقى كارثة لأن كل قريش مشاركة في القافلة دي🙊
بعث أبو سفيان واحد اسمه ضَمْضَم بن عمرو الغفاري، لما وصل ضمضم لمكة وقبل ما يدخل عمل حاجة عجيبة جدا😅
قطع قميصه ودخل مكة يصرخ:
يا معشر قريش!! الغَوْث الغوث!! اللطيمة اللطيمة😱
الحقوا محمد هياخد أموالكم إللي مع أبو سفيان😱
يعني الحقوا القافلة وأغيثوها لأن محمد خرج وهياخدها ويا تلحقوها يا متلحقوهاش😅

أهل مكة شافوا منظر ضمضم وصريخه، ولسه إللي حصل في سرية نخلة مأثر فيهم،
فكلهم قاموا وأخذوا الموضوع بجدية، وقعد أبو جهل يحمسهم وبدأوا يجهزوا جيش عشان يروحوا يلحقوا القافلة،
وده كان من ذكاء ضمضم،
تخيلوا لو كان دخل عليهم عادي كده وقال لهم أبو سفيان بيقول لكم الحقوه عشان محمد هيهجم على القافلة، كان رد فعلهم هيكون إيه😅
كانوا هيقعدوا يسألوا في التفاصيل ،
وليه وإزاي وإيه إللي حصل ، وعلى ما يعرفوا التفاصيل وياخدوا القرار هتكون القافلة ضاعت،
فهو عمل الحيلة دي عشان يخرجوا بأسرع وقت ممكن😉

☆وفي هنا قصة مشهورة ولكنها ضعيفة😅
وهي قصة رؤيا عاتكة، وهي إن عاتكة عمة رسول الله ﷺ شافت رؤيا قبل ما ضمضم ييجي بثلاثة أيام وكان تفسيرها إن ضمضم هييجي وهيحصل قلق في مكة، والناس قعدوا يسخروا منها، وهي قصة طويلة يعني،
بس هي ضعيفة لا تصح، فمش هقولها اختصارا للوقت،
وهي من القصص التي شاعت ولم تثبت في السيرة النبوية 👌

قريش جمعت جيش كبير جدا حوالي ألف وثلاثمائة مقاتل وخرجوا عشان ينقذوا القافلة،
وخرج كل سادات قريش تقريبا، أبو جهل ، عقبة بن أبي مُعَيْط، ، عتبة بن ربيعة، أُبي بن خلف، وغيرهم،
ولم يخرج أبو لهب ...خاف، وخلى واحد تاني كان عليه دين لأبي لهب يخرج مكانه،
فقال له أبو لهب اخرج مكاني وأنا هتنازل عن الدين، فخرج الرجل مكان أبي لهب،
أمية بن خلف بقى مكنش عايز يطلع معاهم😕
لأنه خايف من كلام سعد بن معاذ إللي كان قاله له قبل كده إن رسول الله ﷺ قال إنهم هيقتلوه،
فلما عرف أبو جهل إن أمية بن خلف مش ناوي يخرج جاء له وقال له:
يا أبا صفوان!
إنت لو قعدت ومطلعتش مع الناس، الناس هيتكاسلوا ومش هيرضوا يخرجوا، فأقنعه بالخروج معاهم،
ولما تجهز أمية بن خلف للخروج زوجته قالت له :
مش فاكر لما صاحبك من يثرب قال لك إن محمد قال إنه هيقتلك، بلاش تخرج😥
فقال لها: أنا مش هخرج معاهم، أنا بس همشي معاهم شوية وأرجع👌
خرجوا كلهم واختار المشركون أبو جهل عشان يكون قائد الجيش،
لكن واجهتهم مشكلة🙊
وهي إنهم خافوا من قبيلة بني بكر، خافوا ليخرجوا من مكة فتقوم بني بكر هاجمة على مكة وهم كان بينهم ثارات قديمة، فاحتاروا😕
فجاء الشيطان وتمثل في صورة رجل من أشراف بني كنانة هو سراقة بن مالك وقال لهم:
أنا هجيركم وأحميكم من بني بكر فاخرجوا ومتقلقوش 👌
"وَإِذْ زَيَّنَ لَهُمُ الشَّيْطَانُ أَعْمَالَهُمْ وَقَالَ لَا غَالِبَ لَكُمُ الْيَوْمَ مِنَ النَّاسِ وَإِنِّي جَارٌ لَّكُمْ"