❤السيرة النبوية❤

#الحلقة_مائة_وأربعة_وثلاثون

#قصص_الأنبياء(٢)
#السيرة_النبوية
#الحلقة_مائة_وأربعة_وثلاثون
#أحداث_السنة_السابعة_من_الهجرة
#رسائل_رسول_الله_إلى_الملوك_الجزء_الرابع
#رد_فعل_هرقل_على_رسالة_رسول_الله
#الأَرِيسِيِّين

اتكلمنا المرة إللي فاتت عن الحوار إللي حصل بين هرقل وأبو سفيان، ووصول رسالة رسول الله ﷺ إلى هرقل،
وشفنا إن هرقل أقر واعترف إن محمد ﷺ رسول من عند الله،
هرقل استدعى رئيس الكهنة وكان اسمه ضَغاطِر أو صَفاطِر وكان له مكانة عظيمة جدا عند الكهنة وعامة الناس وكلمته مسموعة أكثر من هرقل نفسه،
فأخبره برسالة رسول الله ﷺ وفي رواية تانية إن هرقل أرسل له دحية الكلبي برسالة رسول الله ﷺ عشان يستشيره،
المهم يعني إن ضغاطر وصلت له رسالة رسول الله ﷺ،
فلما قرأها ضغاطر وسأل دحية الكلبي شوية أسئلة عن رسول الله ﷺ فلقى إن كل المعلومات بتشير إلى إن محمد ﷺ هو نبي آخر الزمان إللي بشّر به عيسى عليه السلام،
فقال ضغاطر لهرقل:
أنا مصدقه وهتبعه👌
فقال له هرقل إنه مش هيقدر يعمل زيه؛ لأنه لو اتبع محمد ﷺ ملكه هيزول والكهنة مش هيسكتوا ومش بعيد يقتلوه،
فآثر هرقل إنه يحافظ على ملكه في مقابل عدم الدخول في الإسلام،
أما ضغاطر فأسلم، وقال لرسول النبي ﷺ دحية الكلبي :
أَقرِئ صاحبك مني السلام وقل له أني أشهد أن لا إله إلا الله وأن محمدا رسول الله ، وإني آمنت به وصدقته 👌
فخرج ضغاطر على الأساقفة وأخبرهم بإسلامه ودعاهم لاتباع نبي آخر الزمان لكنهم رفضوا واجتمعوا عليه وقتلوه رحمه الله.
☆والأساقفة دول هم رؤساء القساوسة يعني الأُسقف أعلى منزلة عند النصارى من القسيس.

◇احنا ممكن نشوف قصة ضغاطر إنها قصة واحد أسلم وقُتل وخلاص وعدت،
لكن الموضوع مش بسيط أبدا، انتم متخيلين واحد له مكانة عظيمة جدا مش بس بين عامة الناس لأ ده حتى بين كبار رجال الدولة ومش بس كده ده مكانته وكلامه في نفوسهم أعظم من مكانة هرقل نفسه وكلامه بيمشي على الكل،
ومع ذلك ساب كل ده وقاوم نفسه الأمارة بالسوء وفتنة الدنيا ودخل في دين محدش يعرف عنه حاجة،
وهو مش بس هيفقد كل المميزات إللي عنده دي،لأ، ده كمان هيعرّض نفسه للقتل وده واحد ميعرفش عن الإسلام غير لا إله إلا الله محمد رسول الله،
ميعرفش حتى إزاي يصلي، ومع ذلك أخذ القرار باتباع رسول الله ﷺ 👌
عشان نتخيل مع بعض حاجة بسيطة بس من إللي ضغاطر كان فيها؛ لو واحد فينا عرف إن شغله إللي بياكل منه وبيصرف بيه على أهل بيته فيه حاجة تغضب ربنا هل هيقدر ياخد القرار بإنه يسيب الشغل ده فورا؟
بلاش دي هناخد مثال أبسط من كده،
الأفراح المختلطة إللي مليانة محرمات من أغاني وتبرج للنساء ورقص ومعاصي بالكوم،
لو حد فينا اتعزم فيها من أخوه أو أخته أو أي أحد من قرايبه هيرفض إنه يروح لأنه مكان يغضب الله ولّا هيقول ده فرح أخويا أو فرح أختي إزاي محضرش فرحهم،
والناس هتقول إيه وأخويا هيزعل و مبررات كتير ويلاقي صعوبة كبيرة جدا إنه ياخد قرار زي ده😞
ودي حاجة بسيطة جدا لو قارناها بموقف ضغاطر👌
فضاغطر لأنه كان صادق مع الله وكان عايز يرضي الله بجد ومكنش مُدّعي؛ ربنا سهل عليه إنه ياخد قرار الدخول في الإسلام ومهمهوش هو هيفقد إيه من المميزات إللي عنده ولا همه رد فعل الأساقفة ولا حتى همه إنه هيتعرض للقتل،
لأنه هو عارف كويس أوي إن مهما كانت مُتع الدنيا والمناصب والمكانة بين الناس فهو هيسيب كل ده ومش هينفعه غير عمله وكل إللي هو فيه لا يُقارن أبدا بجنة عرضها السماوات والأرض،
فمين إللي يضحي بجنة عرضها السماوات والأرض عشان منصب ولّا شوية مُتع كلها كم ساعة وهيتركها ويموت💁‍♂️