❤السيرة النبوية❤

#الحلقة_السابعة_والستون

#قصص_الأنبياء(٢)
#السيرة_النبوية
#الحلقة_السابعة_والستون
#حياة_رسول_الله_مع_الصحابة(٢)
#زيد_ثابت_وزاهر_بن_حرام
#قصة_هاروت_وماروت_والسحر

اتكلمنا المرة إللي فاتت عن حياة رسول الله ﷺ مع الصحابة في المدينة وشوفنا بعض مواقفه معاهم،
هنكمل النهاردة إن شاء الله الكلام عن حياته ومواقفه مع الصحابة ونحكي كم موقف لرسول الله ﷺ،
قبل ما ندخل في الموضوع،
بالنسبة لتكملة السيرة في رمضان أنا كنت استخرت إننا نكملها وتبقى كل اثنين وخميس ولا أوقفها ونكمل بعد رمضان، وعملت تصويت طلعت نتيجته إننا نكمل في رمضان اثنين وخميس، فدي نتيجة الاستخارة😅
وبالنسبة للناس إللي مش بتفتح الفيس في رمضان ممكن يتابعوا معانا القصص على قناة التليجرام،
وعلى فكرة يعني قراءة جزء واحد من السيرة مش بياخذ ربع ساعة بالكتير، فمش هيأثر على يوم فيه أربعة وعشرين ساعة😚
ده غير إن السيرة مهمة في فهم القرآن إللي المفروض هنقرأه كثير في رمضان، بالإضافة إلى إن كل مرة بتطلعوا بفايدة أو معلومة واحدة جديدة على الأقل،
فلو قرأتم السيرة بنية فهم القرآن وكمان بنية التعلم عن رسول الله ﷺ عشان تحبوه أكثر عشان إيمانكم يزيد فكده أجركم هيتضاعف إن شاء الله، وهو ده إللي احنا بندور عليه💁‍♀️
♡ونصيحة قبل ما ندخل في الشرح، أي حد مخلي صورة صفحته الشخصية عالفيس بوك صورة امرأة أو منزل صور نساء على صفحته، أو مشارك فيديوهات فيها مقاطع مسلسلات أو أغاني أو أي حاجة فيها حرام،
يمسحها ويغيرها لأنها كده سيئات جارية، وإللي هتبنوه في رمضان باليمين بتهدموه بالشمال بسبب السيئات الجارية دي فانتبهوا، بلاش تجمعوا حسنات في كيس مخروم😓
فحوّلوا السيئات الجارية دي لحسنات جارية زي صورة بتذكر الناس بحديث من أحاديث رسول الله ﷺ،
بآية من القرآن كل ما حد يقرأها هتكون في ميزان حسناتكم وهكذا، وخليكم فاكرين حديث رسول الله ﷺ:
"إن الله وملائكته وأهل السموات والأرَضين حتى النملة في جُحرها وحتى الحوت ليُصلّون على مُعلم الناس الخير"
أي خير، ورسول الله ﷺ قال : "بلغوا عني ولو آية"،
فليه بقى نضيع أجر عظيم زي ده واحنا يوم القيامة هنبقى في عرض حسنة واحدة بس🤷‍♀️
فكروا في الموضوع بعقل كده وخذوا القرار الصحيح إللي متندموش عليه يوم القيامة😊

ندخل في موضوعنا النهاردة بقى😁
رسول الله ﷺ كان بيمازح أصحابه وكان متواضع جدا معاهم، وكان قريب منهم جدا زي ما ربنا أمره :
"وَاخْفِضْ جَنَاحَكَ لِلْمُؤْمِنِينَ "
كان في صحابي اسمه زاهر بن حرام يعيش في البادِية، من البدو يعني، وكان من الصحابة إللي حضروا غزوة بدر،
فكان لما يأتي المدينة كان بيجيب معاه لرسول الله ﷺ هدية زي الثمار والنباتات والأدوية العشبية إللي مش بتكون موجودة إلا في البادِية وكان رسول الله ﷺ بيجهزه في سفره،كجزاء مقابل هديته،
فكان رسول الله ﷺ يقول :
"إن زاهر باديَتنا ونحن حاضروه"
يعني هو بيفيدنا بالحاجات إللي بيجيبها من البادية ومش موجودة عندنا،
واحنا بنجهزه بالحاجات إللي بيحتاج لها من البلد،
◇عارفين، زي مثلا لما حد ييجي من الأرياف زيارة لحد من المدينة ومعاه الجبنة الحدقة والفطير المشلتت، كده يعني😅
وكان زاهر بيُضحك رسول الله ﷺ وبيحكي له مواقف فكاهية ،وكان رسول الله ﷺ بيحبه،
وكان زاهر دمِيم ، يعني بلغة عصرنا شكله وحش...قبيح المنظر،
في يوم من الأيام كان زاهر في سوق المدينة بيبيع بعض أغراضه ورآه رسول الله ﷺ فجاءه من وراه وحضنه وفي رواية إنه حط إيده على عينه،
تخيلوا الموقف، واحد رافع إيده وماسك ملابس مثلا وبيعرض بضاعته في السوق وبعدين رسول الله ﷺ جاءه وحضنه من تحت إبطه وراح مغمي عينه وقعد رسول الله ﷺ ينادي:
"مَن يشتري العبْد...مَن يشتري العبْد"
من باب المزاح، إن البائع بقى هو إللي بيتباع دلوقتي😁
فزاهر قعد يقول : أرْسلني، يعني سيبني، وهو ميعرفش إن إللي حاضنه ده رسول الله ﷺ،
فلما أخذ باله من إن الشخص إللي حاضنه ده هو رسول الله ﷺ قعد يلصق ظهره برسول الله ﷺ تبرّكا به ﷺ،
وقال له زاهر:
إذاً تجدُني كاسدًا يا رسول الله😅
يعني مش هتلاقي حد يشتريني ولا يرغب فيّ أو ثمني رخيص، بسبب إنه شكله دميم،
فقال له رسول الله ﷺ: لكنك عند الله لست بكاسد، لكنك عند الله ربِيح👌
يعني إنت عند ربنا غالي مش رخيص، لأن الله لا يَنظر إلى شكل الناس ولا ملابسهم ولا لون بشرتهم،
لكنه ينظر إلى قلوبهم👌
تخيلوا لو الناس اهتمت بقلوبها زي ما بتهتم بإنها تلبس الملابس المكوية وتلبس الماركات العالمية وتلبس الألوان المتناسقة عشان يبقى شكلها حلو قصاد الناس،
حالنا هيكون عامل إزاي😓