مساء الورد احبتي ❤️
//// البارت اربعـــون /////
#بيوت_بلا_جدران
#شمس_السعدي
----------------------------------
تعبنا والعمر عدا .. الزمن عدا
صحنا يا زمن هدي .. ياعمر هدي ولا هدا
طفينا العمر شمعة ورا شمعه ..
وواسينا الزمن دمعة ورا دمعه ..
دمعنا شجاب وشوده..كبرنا والزمن عدا
وين الناس لنحبها وتحبنا
محتاجينهم لكن زمنا القاسي بعدنـا ..
-------------------------------------------
ظلام دامس في كل مكان ..
وقت الفجر مع الاذان ..
في شتاء بارد يجردنا من زهور الفرح ..
تأخذني الاعاصير الى افكار متضاربة ..
على أوتار وجعي أمشي في دروبٍ تائهة..
باحثة في السراب بخطوات متعثرة ..
عن بقايا أشلاء امرأة .. كادت تنسى انها امرأة ..
اخرجوني من منفى الى اخر ..
امشي بعيون دامعة ..
أبحث عن شيء ضائع ..
عن ذكرى ولت ولم تعد ..
عن امنية تمنيتها لكنها تحققت بعد فوات الاوان ..
( مرمر )………
جنت نايمة ..
حلمت لأول مرة بحلم حلو ..
گاعدة بوسط بستان .. واولادي كلهم يمي ..
بس جان واحد وياهم گاعد ..
مو ابني وجهة مامبين .. ماعرفته منو ..
فرحت من شفت رضوان گبالي ..
" هايمة اجيت .. وين جنت يبعد امك شلعت گلبي عليك "
حضني بوسني وباس راسي ..
بس بقت عيني على هالوليد ..
سألته ..
" يمه منيلك هذا الولد .. صاحبك ؟؟"
باوعله ورد عليه بأبتسامه ..
" يمه هذا اخوي شني ماعرفتيه "
فزيت من نومي على صوت منهل وهو يهمس ..
" گومي .. گومي "
لبست حجابي ولملمت روحي "
" انت منو ؟ منهل ؟"
جنت مااشوفن زين بالظلمة ..
رد ..
" اي منهل .. گومي لمي غراضج كلهن وخليهن بصرة بساع "
سألته ..
" ليش ؟"
رد ..
" مو تردين تخلصين من اسم فصليه راح اخلصج اطلعي ردي الديرتج بعد خلصت عقوبتج "
رديت ..
" عگبيش لمن ضاع عمري كله .. لمن بقيت وحدي لا ولد الي ولا اهل ؟"
لزمني حيل من ايدي وهمس ..
" اذا تخافين على ولدج تمشين منا .. وهالبيت بعد ماتعتبيه والسلف كله ماتوصليله .. ولو لمحتج لو واحد لمحج جايه للسلف .. تموتين بس گبلها بتج تموت .. رضوان وراح ومااضن يرد فأذا تردين بتج تروح وراه بكيفج بعد "
رديت بغصة گلب ..
" حرام عليك .. وين ترحون من الله .. لو رد ومالگاني شنهي تگله ؟!"
رد ..
" مايرد بعد يله امشي .. اگدر اسحولج تسحول واطلعج بس مااريد فضايح .. واذا صارت فضيحة انتي التتضررين .. امشي بساع.. جعمقة راح يركبج بالسيارات الديرتج يله گبل لايطر الفجر "
وگف فوگ راسي ..
وطلع مسدسه عليه ..
حسباله اخاف من الرصاص يكتلني .. هو اني متت من يوم الجابوني طفله ..
من يوم الخليت رجلي بهالحوش .. بس الخلاني افكر واگوم .. رضوان ..
خفت يجي ويدري بيه متت ويصير بي شي .. انه ادري شوفتي ضلت حسرة بگلبه مثل ماشوفته حسرة بگلبي ..
لو رحمة ماتتحمل اذا متت تموت وراي ..
أنت تقرأ
بيوت بلا جدران
Ficción Generalرواية تتحدث عن اجيال مختلفة .. اولهم فصلية .. لكن ليست كـ اي فصلية .. عانت منذ ستينات القرن الماضي ظلم وجبروت البشر تحت مسمى التقاليد والعادات العشائرية ..
