اسعد الله صباحكم بكل خير احبتي ❤
حبايب اعتذر ع التأخر لان انحذف ورجعت كتبت من جديد ..
//// البارت الرابع والاربعـــون /////
#بيوت_بلا_جدران
#شمس_السعدي
----------------------------------
فارگنه الزمن بين المحطات ..
ولگينه الدمع وأكف ينتظرنه ..
بعدنه أصغار واكبر منه الهموم ..
حزن بحزن جبناهه وكبرنه ..
لا بينه صبر نتحمل هموم ..
وعلى العمر المضى شينفع صبرنه ..
لا يا زمن أرحم دموع العين ..
وشوفنه الفرح مره بعمرنه ..
___________________________
في عتمة الليل .. اشكي واصرخ الم ووجع لقلب يبكي
حرقة .. لأهل لايعرفون الرحمة ..
الشتاء قاسي لكنه احن عليه منهم ..
وكأنّي خلُقت من حنين الشتاء .. وشاعرية المطر .. ورحمات الجمعة ..
وكأن هذا القلب .. خُلق للغربة والالم ..
وباب ذاكرتي .. لايلقى سوى انسان مهجور على حافة القبر تهوي ..
اخذت بنتي وغراضي اسحل بيهن ..
بعز البرد ..
محد حجت بيهن الا عمتي رضية ..
" ولك عويد بت حديثة ووياها طفلة وين تولي بهالليل عودن للصبح خليها "
رد ..
" خلها تحير بروحها مو مگرن انه ببيتي وتتمعشگ وي غيري "
ردت هدوة ..
" جا ماتطلگها شناطر ؟؟"
رد ..
" لا مااطلگها .. الا اخليها معلگة لا هي متزوجة ولا هي مطلگة .. جا شني ترديني اطلگها واخليها تاخذه .. "
رديت ..
" بعمرك ماراح تصير رجال .. وحوبتي اني وبتي تطلع بيك يا عيد .. اريد الله مايشوفك الراحة .. دعاء يتيمة ومظلومة "
من دعيت عليه تخبل ..
رجع ضربني وسحلني للشارع ..
عمتي رضية وعمتي سمرة يحجن عليه ..
" ولك دخلها شتگول العالم علينا "
وهو يرد ..
" ما تگول وحدة...... وطردتها الا افضحها بالسلف واضيع ماي وجهها "
گعدت يم الباب ابجي وادعي عليه ..
حضنت ماسه لفيتها وخليتها جوة عباتي ..
وهي تبجي وتناشغ بحضني ..
اعاين على الشارع والگيعان ظلمة هندس والجو بارد..
ادگ الباب محد يفتحها ..
اسمعه يصيح عليهن..
" التفتحه اطلعها وياها بالشارع "
جنت ادعي يگعد عمي حطاب ويسمعني ..
بس عمي اذا نام مايگعد من التعب الا واحد يگعده وعمتي سمرة ماتگعده ادريها تخاف من عيد ..
بقيت بالباب گاعدة امن الي ..
شفت من بعيد اجه جعمقة يطوطح ..
وانه من صغري اخاف منه اصلا ..
شلت غراضي وبتي وگمت ..
مشيت خاف يشوفني وشو شيسويلي ..
ركضت ورى الحوش ..
شفت المخزن مال علف .. فتحته وطبيت بي ..
گعدت وحضنت ماسه خفت تبرد ..
جان المخزن رطب وبارد وريحته تكتل ..
تذكرت امي من تحجيلي عنه .. ماشايفته گبل ..
شلون تحملت تنام وتگعد بي ..
بس الظلمة مالته تخوف ..
لو الرطوبة والريحة تموت ..
أنت تقرأ
بيوت بلا جدران
General Fictionرواية تتحدث عن اجيال مختلفة .. اولهم فصلية .. لكن ليست كـ اي فصلية .. عانت منذ ستينات القرن الماضي ظلم وجبروت البشر تحت مسمى التقاليد والعادات العشائرية ..
