بيوت بلا جدران

بارت 86

اسعد الله اوقاتكم بكل خير احبتي ❤
/// البارت السادس وثمـانون /////
#بيوت_بلا_جدران
#شمس_السعدي
----------------------------------------------
وبعدني انطر تدگ الباب ..
واطلعلك بـ واهس شاب .. بس شايب !!
واگلك هاااا يـضيم صبـاي ؟ ..
بعدك بيه مامهتم !!
وحگ عينك ..
بعدني شما يذكرونك ..
شكو بهالروح يتلعثم ..
_______________________________
اني مرمر بنت جلولاء ..
فتحت عيني على الدنيا واني احب مهران وهو يحبني
ابن عمتي ورفيق دربي وطفولتي ..

مااتعلمت من الدنيا كثر مااتعلمت منه ..
هو واخوي عدنان ..
اثنينهم اكثر ناس احبهم بهالدنيا بس حب عن حب يختلف ..

جان يسميني فراشة جلولاء ..
لان اطير من مكان المكان مثل الفراشة مخلصه حياتي ونسة وخاصة اذا جان موجود ..

جنت انتظره يم الجرف وكت جيته .. اطلع من الصبح ابدل وازين شعري واروحله .. وهو من يجي گبل الي مايروح الاهله من بغداد الي ..

يسولفلي شيصير وياه من يوم الراح .. جان يحب عبد الحليم حافظ ويشوف افلامه ..
ومن يجيني يغنيلي غناويه ..

جان هالحب الفطري والعفوي اجمل شي صار بحياتي ..
لكن بلحظة كلشي انتهى ..
بعدنا مابدينا بحياتنا انتهت بيوم وليلة ..

مرت سنين طويلة بعدته عني بس بقت ذكرياته محاوطتني .. بقى حسرة مكتومة بداخلي ..

من كالتالي رحمة عليه ..
مدري شصار بيه شعور ماينوصف .. جنت گاطعة الامل بشوفته .. بس بلحضتها .. احس رجعت العمر 14 الاخر مرة شفته بيها..

بالگوة لملمت روحي وصبرت عليها ..
ماردت ابين البنتي واني لهذا العمر شني ردة فعلي ..

استحيت بس عواطفي غلبتني ..
بعد هالعمر مرمر شتحسين ؟
وشتنتظرين ؟

كملت الحفلة ورجعنا للبيت ..
جنت مااحجي ساكته .. دخلت الغرفتي صاح رضوان وراي ..
" يمة وين رايحة ؟"

التفتت " هااا رايحة اتمدد شوية بين ماتصير الصلاة "

رد ..
" يمة بيج شي شو مااحسج فرحانه الي مو ردتيني اتزوج هاي اني راح اتزوج علمودج "

رديت ..
" لايمة شلون مافرحانه بودي ازفك اليوم گبل باجر بس مالي خلگ شوية "

رد ..
" يمة شبيج شتحسين ناخذج للمستشفى "

اشرتله ..
" لا يمه شبيك مابيه شي لاتشيل همي عودن من يأذن گلولي "

عفتهم ودخلت ..
اخذتني رجلي للكنتور .. فتحته وطلعت الصرة الاجيت بيها من جلولاء ..

فتحتها وبدت دموعي تكت ..
عاينت على الهدوم الجنت البسها اتذكر صباي بيها ..
مديت ايدي للجاكيت طلعت المحبس الجابه الي مهران

لليوم مالبسته بعد مانزعته اخر مرة ..
جابه الي من بغداد جان حلو كلش ..
وكالي اعتبريه محبس خطوبتنا بين مااخطبخ رسمي ..