صباح الورد والياسمين عليكم احبتي ❤️
//// البارت التاسع والعشــرون /////
#بيوت_بلا_جدران
#شمس_السعدي
و يبقى القدر ماسكا أحلامنا ..
مانعا إياها من التحليق ..
فبعض الأحلام ممنوعة و بعضها ليست لنا ..
-----------------------------------------------
" بس اريد اسألج .. ليش ماتقبلين تنطين رحمة العلي شناقصه وانتي تدرين عيد مايريدها .."
ردت .. " ماانطي وحدة من دمي الواحد مامعروف اصله منو ومنو ابوه !!!"
انصدمت من حجايتها.. شتقصدين ؟؟ شبي علي التحجين عليه ابن عمتي ترى ..
عاينت ببرود عليه وگامت..
" لاتفتح دفاتر قديمة يرضوان "
رديت عليها :
" اريد اعرف كلشي انه مو صغير .. انتي دوم علمتيني مااسكت ومااضعف وهسا انتي تستضعفيني "
سألتني :
" انت شلك شغل برحمة عدها ابو وهو يحجي عنها "
رديت :
" رحمة بحسبة اختي وربينا سوة شلون مالي غرض بيها وعلي هم صديقي وابن عمتي واخوي "
ردت :
" اني من البداية ماراضية تماشيه عبن انت ابن الشيخ موحان وهو خلك واحد… .."
سألتها :
" ليش سكتي كملي شيخة .. شنو بي علي وهيج تكرهيه "
اشرتلي اگعد گبالها ..
" الحجي الاحجيه الك ماتحجيه لحد .. لان تطير بي ارگاب "
توترت من حجت ..
" شبي علي ؟"
ردت :
" علي ابن حرام .. عمتك جانت جاهلة وطايشة وسوت عملتها .. وماردنا ننفضح زوجناها الجعمقة العامل العندنا .. جا انت مافكرت شلون عمتك حورية ترضى تاخذ واحد مثل جعمقه .. لو علي شلون مايشبهة "
من حجت هيج حسيت طابوگة وهبدت راسي هبد ..
والدنيا تفتر بيه ..
عمتي حورية !! احسها اكثر وحدة رزنه وعاقله بيهن شلون هيج سوت ..
صح ماكو شبه بين علي وابوه بس جنت اضن طالع اعله عمتي حورية ..
سألتها ..
" وعلي مايدري مووو ؟"
ردت :
" دير بالك تحجي وتطش بالسلف وننفضح وهم علي يتسمى ابن حرام.. هسا عرفت ليش ماردت ازوجنه الرحمة .. عبن مااريد بزرها يطلعون من ظهر واحد ابن حرام .."
مااتحملت اسمع حجيها اكثر عفتها وطلعت..
واحس الدنيا تفتر بيه ..
ما اعرف وين اروح وشحجي ..
اجتني رحمة…
" ها رضوان شگالت الشيخة "
عفتها ومشيت ماعرفت شنهي ارد عليها..
وهي تمشي وراي تسأل ..
اشرتلها .. بعدين احجي اروح اشوف علي ..
لو علي الناطرني وناطر خبر مني شنهي اگله وشلون احجي ..
مستحيل اخليه يطيح بلسان العالم وينفضح .. ادري بي صاحب كرامة وعزة نفس ..
لو سمع ونفضح .. يكتل روحه مايضل لو يهج من الديرة كلها ..
أنت تقرأ
بيوت بلا جدران
General Fictionرواية تتحدث عن اجيال مختلفة .. اولهم فصلية .. لكن ليست كـ اي فصلية .. عانت منذ ستينات القرن الماضي ظلم وجبروت البشر تحت مسمى التقاليد والعادات العشائرية ..
