اسعد الله اوقاتكم بكل خير احبتي ❤
/// تكملـة البارت الاخـــــير /////
#بيوت_بلا_جدران
#شمس_السعدي
----------------------------------------------
يدق ناقوس الحزن المرير .. والاشتياق الضرير ..
لأنه اشتياق كتب عليه أن لا يرى الأحبة ..
دنيا من الوله .. دنيا من الاغتراب .. دنيا تختصر ذاتها لتكون عبارة عن محطات لنا .. نقف فيها لننتظر عودتهم ويقفون فيها ينتظرون عودتنا .. وبين محطات الحياة تتلاشى الحياة .. لنبقى مجرد حروف سطرتها الحياة ..
-----------------------------------------------
دگ موبايلي واني جنت اعيد بالكاسيت للمرة الماااعرف شگد ..
رقم غريب مايشبه ارقامنا ..
مامتعودة ارد على ارقام .. رديت وبقيت ساكتة
سمعت صوته..
" كل عام وانت بالف الف خير "
بقيت مصدومة مامتوقعة اتصاله وبنفس الوكت متوترة واني اسمع صوته ..
رقمي جديد هذا منين عرفه ؟ ذاك موبايلي من اخذه موسى بعد مااعرف وين صار ..
همس ..
" اعرف زعلانة لان طلعت من العراق من غير حتى مااگلج بس جنت محتاج ابعد وافكر "
رديت ..
" مامن حقي اضوج هاي حياتك وحقك تعيشها وتشوف مستقبلك "
اتنهد ..
" حياتي كان المفروض اعيشها بالعراق .. هواي خطط جانت ببالي بس للاسف ماصارت "
رديت ..
" كلشي قسمة ونصيب "
ضحك ..
" بعدج مصرة ؟"
سألته ..
" لو گلتلك اي راح تتقبل كلشي وتنسى "
سكت لوهلة ..
رديت ..
" شفت ؟؟ صح گلوبنا تريد بس عقلنا يرفض وهالصراع مستحيل يخلينا نرتاح ونعيش عادي "
رد ..
" سكوتي مو معناها رفضي او عدم اقتناعي .. سكوتي هو استغرابي من موقفج المصرة عليه "
رديت ..
" مو مهم وين تربيت وبأي بيئة راح تبقى رجل شرقي ومستحيل تگدر تنسى .. وليش اجذب اني هم مااگدر انسى السنتين الراحوا جانت صعبه حيل عليه ومستحيل تتنسى .."
رد ..
" ع العموم مااريد اضغط عليج بس ع الاقل خلينا نحجي بين فترة وفترة لاتگطعين عني "
سكتت ..
سلم وسد التلفون ..
دخلت ماما ..
ابتسمت ..
سألتها ..
" انت منطيته رقمي مووو ؟"
ردت ..
" لح عليه راد يباركلج بعيد ميلادج ماگدرت اگله لا "
رديت ..
" مو من حقي اخليه عايش على املي .. يوم عبالج مااشتاقله ؟.. او مااريد اسمع صوته ؟ بس مااريد انطيه امل .. لان اعرف ماراح نعيش سوة ولا راح ننجمع وان انجمعنا راح يبقى اكو حاجز بينا صعب نتخطاه "
سألت ..
" يعني لو تزوج وشاف حياته هناك ماتضوجين ؟"
سكتت ماعرفت شنو ارد ..
اتنهدت وگامت ..
طلعت وراها من الغرفة شفت فيصل جايب زنوب واولاده ..
جانوا يضحكون عليه ويگلوله شني ناوي تدخل بيهم للمنتخب كلهم نفس العمر ..
أنت تقرأ
بيوت بلا جدران
Fiction généraleرواية تتحدث عن اجيال مختلفة .. اولهم فصلية .. لكن ليست كـ اي فصلية .. عانت منذ ستينات القرن الماضي ظلم وجبروت البشر تحت مسمى التقاليد والعادات العشائرية ..
