حبهن عظيم

25

عند البنات ف البيت
لانا : هي وتين فين
ليل : دخلت تنام عشان تصحي بدري تنزل القاهره
لانا : طب يالا ي ريتال نكمل مذاكره
ريتال : اه يالا عشان الحق انام شويه عاوزه اروح بدري المستشفي
لانا : طب يالا تصبحوا ع خير
الكل : وانتي من اهل الخير
داده سعاد : طب انا هدخل انام ي بنات هتعوزوا حاجه
ليل : تسلمي ي حبيبتي
ليل : حور حور انتي فين ي بنتي ساكته من ساعتها يعني
حور : لا ها أنا هنا اهو هروح فين يعني
ليل : انا اعرف بس اللي عرفاه انك سرحانه من ساعتها ف اي
حور قعدت ربعت رجليها وبصتلها : في حاجه غريبه طلع عرفني من زمان ومقالش تصرفاته غريبه والأغرب اني بحس اني مشدوداله لا مشدوده اي بحس احساس غريب عارفه لا انا مش عارفه افهمك بس انا بحس بأمان افتقدته من زمان معاه بحس اني مبسوطه ع قد ما كلامه بيوترني بس بيحرك جوايا حاجه هو انا اتهبلت ي ليل ولا اي
ليل بضحك : كل دا دا سياده العقيد مطلعش سهل بقي
حور : والله انا ما انا فاهمه
ليل : يعني هتكملي
حور : قالي أنه بيحبني وانا بصراحه مصدقاه أو حاسه بالكلمه وهي طالعه منه مش عارفه بقي
ليل : صلي استخاره وسبيها لله وانتي كده كده هتروحيله بكره مع ريتال صح
حور : ونعم بالله اه هروح وانتي مش هتروحي الشركه
ليل : سليم كلمني محتاجني ف شغل وانا بصراحه ماشيه ع سطر وسايبه عشره ف عاوزه اظبط اموري
حور : صحيح سليم دا انتي اي ظروفك معاه
ليل :ظروفي ازاي يعني
حور : انتي فاهمه قصدي
ليل بتفكير : والله ي بت ي حور اوقات بيصعب عليا بدبش فيه كل دبشه والتانيه وهو مش بيقول حاجه شكله محترم ابن ناس كفايه الموقف اللي عملوه معايا وچان بس
حور بضحك : كل دا وبس
ليل : قومي ي حور اتخمدي انا اصلا غلطنالك قومي
حور بضحك : طيب ي ستي وباستها ف خدها تصبحي ع جنه ي ليلي
ليل : وانتي من أهلها ي عيوني
وكل واحده دخلت اوضتها
___________
في صباح يوم جديد الساعه 7 ف المستشفي راح مراد ل زين
مراد : هو العقيد زين اللي كان جاي مصاب هنا فين دلوقت
موظفه استقبال: ثواني ي فندم اتنقل غرفه عاديه ف الدور التالت اوضه رقم 127
مراد :شكرا
طلع مراد الدور التالت و دور بعينه علي رقم الغرفه لحد ما لقاها وخبط فتحت ممرضه
ممرضه : خير حضرتك مين
مراد : انا العقيد مراد
ممرضه : اسفه ي فندم بس دا مش وقت زياره
مراد : انا عارف بس محتاج اشوفه ضروري عشر دقايق بس لو هو صاحي لو نايم همشي بس بجد موضوع ميستناش
الممرضه : تمام بس حاول متجهدهوش
فتح مراد الباب ودخل
مراد بنبره ندم : حمدالله ع السلامه ي سياده العقيد ياريتني انا مكانك
زين : اقعد ي مراد الله يسلمك
مراد : انا بجد مش عارف اقولك اي ع كل حاجه
زين : دا واجبي متقولش كده
مراد : انا عاوزك تسامحني ع كل حاجه انا كان في غشاوه ع قلبي والله انا مكنتش بكرهك بس مكنتش عاوزك احسن مني بس الحقيقه انك تستاهل كل خير
زين : خلاص حصل خير وانا مسامحك العمر مش بعزقه
مراد : احم طب انا يعني بصراحه كان حصل سوء فهم من خطيبتي وانا دلوقت عاوز اصلحه وياريت تقبل اعتذاري مره تانيه وحط الملف قدامه
زين : تفتكر العقيد زين ممكن يتسرق حاجه تخصه
مراد بعدم فهم : يعني اي
زين : يعني الملف دا انا وصلتهولك بمزاجي وكل المعلومات اللي في ناقصه وكمان غلط
مراد : انت كنت عارف
زين : انا زين الشرقاوي مش اي حد برضو
مراد : وازاي مبلغتش
زين : انت كنت وقتها ف المعسكر
مراد : يعني كنت هتبلغ
زين : لا كنت هلاعبك
مراد : عمتا انا بعتذر تاني واحب أننا نفتح صفحه مع بعض من اول وجديد لو تقبل
زين : اقبل اووي  واتمني دا من زمان انا عمري ما تعاملت معاك ع انك عدو ليا بالعكس
مراد : شكرا جدا وقام وحضنه براحه
دخل مازن ف الوقت دا
مازن : انت بتعمل اي ابعد عنه
زين بضحك : اهدي ي مازن ف اي ي بني جبتلي صرع دا بس كان أول بدايه الصلح
مازن : اه وماله المهم انت عامل اي دلوقت
مراد : طب زين وسامحني انت اي حكايتك
مازن بغضب بسيط : عارف لو كنت بتضايقني انا كنت ممكن اسامحك انما زين لا
زين : خلاص ي مازن بقي وانا قدامك اهو وانا ومراد اتصفينا قلبك ابيض بقي اترزع اقعد
مازن : ماشي ي مراد اللي زين يشوفه وبص ل زين طمني عليك الجرح إخباره اي
زين : فل اهو ي سيدي الممرضه كل ست ساعات بتغيرلي ع الجرح مش فاضل غير اني أخرج من هنا
مراد : لا ازاي بس
مازن : اهو دي اكتر حاجه عدله قولتها من يوم ما شوفتك
زين : بقولك اي انا كده كده هخرج مستني بس ريتال وحور
مراد : طب استأذن انا بقي عشان الحق اروح الشغل والملف دا
زين : الملف دا اديه ل مازن
مراد مد أيده ل مازن واداله الملف
مازن : اي دا
زين : اتكل انت ع لله ي مراد وانا هفهمه 
مراد : تمام وحمد الله على سلامتك مره تانيه وخرج
مازن فتح الملف : اه ي مراد الكلب
زين : ولا اركز كده هو غلط وندمان وبعدين شكله مكنش يعرف حاجه عن الملف
مازن:  المفروض كنت تقرص ودنه حتي
زين : مازن متستهبلش انت عارف شغلنا مفيش قرص ودن دي خيانه فاهم يعني اي وخلاص بقي انسي الحوار دا
مازن : ماشي ي زين اما نشوف اخرتها
زين : خير انشاء لله وبعدين انت هتفضل سايب اللي وراك وقاعدلي كده لا روح شوف وراك اي ولا يكونوش مفهمينك اني والد
مازن : منك لله والد ي زين عالعموم وخرج من جيبه تليفون : دا تليفون بهاء شوف انت عاوز اي وانا اعملهولك
زين : لا خلي معاك لحد ما اخرج كده كده ع بليل هكون ف البيت
مازن : لا ما الحجه رجاء ماكده عليا ترجع معايا ع البيت عندنا
زين : ازاي ي بني لا طبعا وريتال لا وبعدين انت عارف انا مش هرتاح
مازن: والله دي مشكلتك ابقي حلها مع ماما لكن انا هروحك ع الفيلا عندنا وريتال هتبقي مع ماما علطول فين المشكله بقي ومش عاوز كلام تاني انا هروح المبني اشوف القضيه مع اللوا نشأت وارجعلك تاني حاول ترتاح شويه
زين : ماشي وامري لله
مازن خرج وراح ع مبني المخابرات
_______
في البيت
يروح رحيم وأحمد عند البنات سوا ويرنوا الجرس
داده سعاد : اتفضلوا
احمد : صباح الخير ي داده البنات فين
داده سعاد : صباح الخير ي بني كلهم لسه صاحيين ووتين صحيت م الساعه 6 ونزلت القاهره
احمد : ماشي ي داده قولي ل ليل وحور اني عاوزهم
داده سعاد : أعملكوا قهوه ولا بعد الفطار
رحيم : لا ي داده ولا اي حاجه متتعبيش نفسك
احمد : سيبك منه دا واد مؤدب أنا مستني الفطار
داده سعاد بضحك : حاضر خمس دقائق ويكون جاهز
خرجت ليل : صباح الخير يا ابو حميد صباح الخير يا رحيم
رحيم وأحمد : صباح النور ي ليل
احمد : شوفي حور والبنات يالا عشان نفطر
لانا خرجت م الاوضه هي وريتال: همك ع بطنك
احمد : ملكيش انتي دعوه ي لانش
لانا بغضب : برضو هيقولي لانش
طلعت حور : والله سمعت صوتك عالي قولت وتين مشيت اكيد احمد اللي بيناكف فيكي صباح الخير عليكم جميعا
الكل: صباح النور
داده سعاد: يالا ي ولاد الفطار جاهز
راحوا كلهم يفطروا
احمد : اي اخبار شغلك ي حور
حور: مفيش من بعد القضيه دي وانا وقفت مستنياك تشوفلي مكان مناسب افتح فيه مكتبي
احمد طلع من جيبه مفاتيح وحطها قدامها : طب اتفضلي ي ستي
حور : مفاتيح اي دي
احمد هو بياكل : دي مفاتيح المكتب
حور بفرحه : قول والمصحف
احمد بضحك : والمصحف وكمان جاهز مش فاضل غير تفتحيه بس
حور : انا مبسوطه اووي ربنا يخليك ليا
احمد : انا معملتش حاجه ليل هي اللي مخلصه كل حاجه انا بس جبت المكان ومن فتره طويله ليل هي اللي ظبطت الدنيا وانا كنت بشرف بس وامبارح استلمت المفتاح
حور قامت وحضنت ليل : ربنا يخليكي ليا ي احن اخت ف الدنيا
لانا : مسمعتيش انتي ي ريتال عن الاخت اللي واقعه من قعر القوفه دايما
ضحكت ليل وحور وحضنوها
رحيم : مبروك ي حور
ريتال بضحك : الف مبروك ي مرات اخويا
احمد ضحك : شكلك مش سهله انتي ي ريتال
داده سعاد : الف مبروك ي حبيبتي ربنا يجعله فتحت خير عليكي
حور بفرحه : الله يبارك فيكوا و ربنا يخليكوا ليا
رحيم : هو احنا هنروح ل وتين امتي
احمد ضحك : ي بني هي لحقت تروح
رحيم : اه زمنها وصلت
احمد : بكره ي حبيبي أنشاء لله نروح يالا ي حور انتي وريتال اوديكوا ل زين واروح الشركه
لانا : خودوني معاكوا بليز
احمد : ممنوع اصطحاب الأطفال
حور : بطل غلاسه ي احمد
لانا : والله انتي اللي فيهم وبعدين رحيم وليل نزلين الشركه دلوقت وانا مش عاوزه اقعد لوحدي وزهقت م المذاكره
احمد : امري لله يالا ننزل كلنا
________
ف امريكا
سماح : انا مش قادره استوعب ابني انا يعمل فيا كل دا
جلال: ارضي بالمكتوب بقي ي سماح خلاص مش هنقعد نولول
سماح : اه وانت خسران اي انا اللي دمي اتحرق وسنين عمري راحوا هدر
جلال : وانا يعني كنت بتفسح بس خلاص مبقاش حاجه ف ايديا وبعدين هو انا السبب بتلوميني لي لومي ابنك الناصح اللي راح ل ليل وادالها كل حاجه ع طبق من دهب
سماح : يا حاسره قلبك ف ابنك الحيله ي سماح
جلال : يوووه دي مبقتش عيشه خلاص اللي حصل
ووقعت سماح ع الأرض
جلال : سماح سماح فوقي سماح
حاول يفوقها مش بتفوق طلع تليفونه من جيبه كلم الإسعاف
_______
في مبني المخابرات طلب اللواء نشأت اجتماع ب مازن وادهم ومراد وبعد ساعه اجتمعوا
اللواء نشأت : ازيكوا ي شباب
الكل : بخير ي فندم
اللواء نشأت موجهه كلامه ل مازن : زين عامل اي ي مازن
مازن باحترام : الحمدلله بخير ومصمم يخرج النهارده
اللواء نشأت : كنت عارف دماغه المهم دلوقت احنا اتحفظنا عن السبب الرئيسي من تهريب الشحنات اللي كانت بتتدخل مصر الفتره اللي فاتت حاولنا نتكلم معاه ونستجوبه لكن مفيش فايده مبيتكلمش اصلا معندناش اي معلومه غير اللي كان العقيد سيف الله يرحمه وصلهم اسمه ممدوح المنشاوي السن 37 سنه عايش من 25 سنه ف امريكا ودي اول مره ينزل مصر ل سبب مجهول لحد دلوقت لأن دي مش اول عمليه يعملها وعمره ما نزل مصر
مازن : انا راي نسيبه ل زين بالكتير يومين وهيكون رجع الشغل
اللواء نشأت: حد عنده راي تاني
الكل : لا ي فندم
اللواء نشأت : تمام الكل يتفضل ع مكتبه
وقف الكل باحترام وخرجوا
_________
عند دولت ف الفيلا
دولت : اي ي حبيبي مش هتيجي معايا النادي انت وعدتني من فتره ومطنشني خالص
رامي بضيق : معلش انتي عارفه المشروع الجديد واخد كل وقتي
وبحب مصطنع : انا مرهق شويه روحي انتي ي حياتي وع ما ترجعي اكون فوقت شويه
دولت : لو كان كده ماشي باي باي ي بيبي
رامي بقرف : ف كسحه ي ختي
وطلع الفون من جيبه
رامي : صباح الخير يا حبيبتي وحشتيني
موده : لا ي رامي مفيش صباح الخير كل الفتره دي متكلمنيش دا انا قولت تكون عاوز تفسخ الخطوبه ولا حاجه وبتتهرب مني
رامي بضحك : طب والله وحشني جنانك دا بس حقك عليا هانت كلها كام يوم وارجع انا خلاص قربت اخلص الشغل اللي كنت جاي هنا عشانه وراجع
موده : بس انت اتاخرت اووي المره دي ومش راضي تخليني اجيلك
رامي : هو انا بلعب ي موده انا بشتغل وبحاول ابعتلك فلوس كل فتره عشان نخلص بيتنا ونتجوز علطول اوعدك اول ما ارجع مش هبعد عنك
موده : خلاص ي حبيبي بس ابقي كلم بابا أتفق معاها بس ع اخر الحاجات اللي وصلنالها
رامي : من عنيا ي اغلي موده يالا باي
موده : باي
قفل رامي ف سره : هانت ي دولت هانت كلها اسبوع بالكتير واسحب فيهم كل المبلغ اللي انا عاوزه وتبقي بالسلامه
__________
عند زين ف المستشفي وصل احمد زين وريتال ولانا وراح ع الشركه
ريتال : صباح الخير ع احلي عقيد ف الدنيا
زين : صباح الخير ي حبيبتي
حور : اخبارك اي دلوقت
زين : الحمدلله احسن بكتير
لانا بتحط ورد جمبه : الف سلامه عليك
زين : الله يسلمك مكنش له لزوم تتعبي نفسك
لانا : لا تعب ولا حاجه دا حتي زوق حور
زين : بجد زوقك حلو ي حور
حور : ميرسي
ريتال : طبعا ماكلتش
زين : لا ي لمضه كلت وخدت علاجي الممرضه جت ادتهوملي
ريتال بنظره ذات معني : اي دا وكمان أكلتك
زين وهو فهم معني كلامها : مريض انا ولا مش مريض والمريض ليس عليه حرج
ضحكت لانا : اه طبعا انت هتقولي بس حلوه بقي الممرضه ع كده
زين : لا لا ي لانا متقوليش كده بقي انا ممكن ابص لحد وانا معايا القمر بنفسه
حور بصتله ومتكلمتش
زين : بقولك اي ي توته ما تاخدي لانا وتتمشوا لحد اخر المستشفي وبالمره تجبيلي الإقرار اللي همضيه عشان أخرج من هنا
لانا باحراج مصطنع : احنا بنتكرش ي بت ي ريتال
ريتال بضحك : لا لا طبعا هو بس يقصد أننا نتمشي يالا نتمشي
وخرجوا سوا
زين : تعالي جمبي ي حوريه
حور قامت من مكانها ووقفت قدامه
زين : هنتكلم وانتي واقفه اقعدي
حور : حاضر وقعدت
زين : دلوقت انا لازم اتكلم معاكي انتي عاوزه اي
حور : مش عاوزه حاجه والله
زين : بصي ي حور انا لسه قايم من عمليه فتحي مخك معايا يعني انتي عندك استعداد نعلن جوازنا
حور بصتله ومش عارفه ترد هي صلت استخاره وصاحيه مرتاحه بس مش عارفه ترد
زين : طب نعمل فتره خطوبه بس مش هتزيد عن شهر ومعنديش اوبشن تالت والله عشان تنسي حوار أننا نسيب بعض دا
حور ضحكت : لا انا موافقه
زين بخبث: ع اي بالظبط
حور : أننا أننا يعني نعلن جوازنا بس ممكن شويه وقت الاول عشان في مشاكل مع اخواتي تتحل الاول
زين : مفيش مشكله بس انا دلوقت محتاج تكلميني عن نفسك يومك ماشي ازاي انا عارف كل حاجه بس حابب اسمع منك
حور بعفويه وفرحه مش عارفه مصدرها : انا مليش غير اخواتي البنات والداده واحمد ورحيم دا طلع اخو ليل وكمان هيخطب وتين هنروح بكره القاهره عشان يتقدم رسمي وشغلي يومي بين شغلي واخواتي ومشاكلنا واكملت بفرحه والنهارده استلمت مفتاح مكتبي الجديد ليل وأحمد عملوهالي مفاجاه المهم واكملت بنبره حذره : هو انت ممكن بعد يعني ما نتجوز تقولي ما تشتغليش
زين : لا مش هقولك كده انا احب يبقي ليكي كيان وشخصيه وتبقي ناجحه وانا من يوم ما عرفتك وكان السبب شغلك ف عمري ما هخليكي توقفي شغلك
حور : بجد شكرا جدا وبس ي سيدي دي حياتي مفيهاش حاجه اصلا
زين : يعني مفيش مكان ليا
حور: لا
زين بزعل مصطنع : لا
حور : اقصد يعني لا طبعا يبقي ليك انت هتبقي جوزي
زين بضحك : يانهار قمر ع كلمه جوزي ي ولاد بس لعلمك ي حرمي المصون انا جوزك مش هبقي لسه
حور : لا لسه لحد ما نعلن الاشهار يبقي لسه بس انا كمان يعني لسه خايفه من بهاء باشا مش ضامنه تصرفاته
زين : بمناسبه الموضوع دا بصي ي حور وحكي لها كل حاجه لحد مقابله مازن
حور بدموع : يعني انت حابسه
زين حاول يمسح دموعها : طول ما انتي معايا مش عاوز اشوف دموعك وبعدين هو كويس انا بس مخليه ف مخزن لحد ما اوصل لكل اللي وراه باباكي مش لوحده وانا مش ضامنه وكنت خايف عليكي وانا مش هنا وليكي عليا اول ما اخرج من هنا هخرجه تمام
حور بابتسامه : شكرا ربنا يخليك ليا
زين بهزار : مفيش بوسه بقي
حور ضربته ف كتفه
زين : اااه مش كده ي حبيبتي دا انا حتي زي جوزك
خبط مازن ودخل
_________
فوت وكومنت برايكوا♥️♥️