TUAI ARI AKU? -NO PROBLEM-

TUSUN 1 - ROSE

TUSUN 1

TUAI ARI AKU?
-NO PROBLEM-

GENRE: PENGERINDU (LOVE)
LANGUAGE: MIX (IBAN, ENGLISH, MALAY)
DIKARANG: ALEXON JOHN (JOHN ALLEN)

BA BILIK BESAI. (RUANG TAMU)

"Mommy enggai meda Rose jadi enggau lelaki tuai nya! Peda nuan umur lelaki nya nyau sama bela enggau umur Daddy nuan nya! Nadai telisih nemu nuan! Ka nuan jadi enggau lelaki baka nya pia Rose?!" Pia ku Melina iya nya indai Rose.

*Telisih (Nadai bida).

Chukup pedis ati Melina maya nya. Sema jaku, nyau ambis anak penemu tudah Melina tu tadi ditabur dikena iya ngelaban jaku peminta ari Rose. Belaya besai seduai iya maya nya.

"Please Mommy. Iya mih lelaki ti chukup manah sereta mentas enggau begulai. Anang meda iya tuai baka nya, Mommy lalu deka ngakim iya nitihka peneka ati Mommy. No! Mommy mesti nerima iya nyadika menantu." Pia ku Rose.

"Menantu?! Hahaha! Anang mimpi nuan deka jadi enggau lelaki baka iya nya Rose. Tuai! Tuai! Enda jera iya tu ku aku. Enti nuan jadi enggau iya, dini Mommy deka ngelalaika mua malu tu?"

"Mommy.. Nadai kebuah nuan deka malu ketegal nya. Nama kebuah Mommy tu tusah amat deka mereti enggau peminta ari Rose? Simple aja nya Mommy. Peda nuan Daddy dih. Okay aja iya. Nadai mayuh jaku agi nya. Enda baka Mommy. Too complicated. Kelalu milih menantu. Tuai salah! Enda gawa ka agi ga salah! Uhhh! Semua nadai ngena ba mata Mommy nya!"

"Ooo.. Udah nemu ngelaban Mommy iya diatu nih.. Enda ngawa nya Rose. Nyema nuan amat-amat udah mutus ati deka jadi enggau lelaki tuai nya, anang nuan ngarapka ati Mommy tu deka nerima iya nya nyadika menantu Mommy ba dalam rumah tu. And.. Siti agi, anang ngarap udah tu ila nuan ulih ngangauka aku Mommy agi. Ninga pending nuan nya Rose!"

"Alaaa.. Mommy.. Please.. Why Mommy? I need him in my life. Please accept him.. Huhuhuhu.."

Enggau sabak-sabak tudah Rose madah ngagai Melina. Tetap mih Melina enda ibuhka peminta ari anak iya Rose nya tadi. Enda lama udah nya, telefon Rose bemunyi.

"Aaa! Tentu nya lelaki tuai nya! Ish! Kapa deka kiruhka lelaki tuai baka iya nya. Manah agi Rose ngiga lelaki bukai ti jauh lebih manah, biak ari iya sereta sama umur enggau Rose."

"Mommy.. Why? Why? Why?"

Melina nyau enggai kiruh agi enggau jaku peminta ari Rose udah nya. Iya lalu ninggalka Rose kediri ti benung nyabak ba bilik besai. Rose maya nya nyau nadai daya agi sepengudah ninga Melina bejaku munyi nya.

Pemuas telefon Rose bemunyi nya tadi, dia dih iya lalu nyaut kangau ari telefon nya.

"Hello. Sayau.. Mommy enda ngasuh tua jadi. Baka ni chara tua deka begulai enggau manah udah tu ila Sayau? Please say something to me Sayau.. Huhuhu."

****

Dua taun sebedau penguji nya nyadi ba pendiau pengidup Rose.

Pagi nya, baka selama mih Rose nurunka pasar ti deka ngelawa tamu. Iya deka ngiga lauk baka sayur, manuk enggau ikan.

"Mawar. Aku deka nurunka pasar dulu au. Sebedau nya, ulih ga aku nganjung nuan nurun gawa. Hehehe." Pia ku Rose madah ngagai petunggal iya ti diberi nama Mawar.

"Okay boss. Ulih aja. Danji nuan ulih ngambi aku pulai gawa pukul 5 lemai legi." Saut Mawar enggau tuchum manis diberi iya.

"Gaga endar ati iya ba dia. Ehhh.. Nyamai pengidup bisi orang nganjung ngambi. Nuan nya kemaya deka meli kereta kediri empu. Dini alah nyau aku belama-lama ngambi nganjung nuan pulai gawa."

"Ooo.. Enggai nganjung ngambi aku gawa agi udah tu pia. Errrmmm.. Okay enda ngawa ga enti nuan enggai."

"Alololo.. Anang ngambi ati. Aku semina nundi nuan aja tadi. Ish! Nya pan ka ringat.."

"Eh! Nadai aku ringat au. Udah nuan enggai ngambi nganjung aku pulai gawa. Enda ngawa ga. Udah chukup duit simpan asil ari gaji tiap bulan, ila aku meli kerita kediri empu ga."

"Ringat iya tu pelaba aku. Errrmmm.. Okay. Okay. Sorry Mawar. Legi aku sponsor nuan makai. Hehehe."

"Hahaha! Deka sponsor aku makai pia? Dini nuan deka bulih duit Rose? Rose.. Rose.. Anang deka meri duit, kereja pan lalu bedau bulih.. Kati ku aku.."

"Ohhh iya.. Enda ingatka diri empu bedau bulih pengawa. Hehehe. Au mih Mawar. Aku bedanji deka ngiga pengawa berengkah hari sehari tu. Danji!"

"Bedanji belama-lama. Legi enda ga ingat. Udah bulih pengawa ti meruan lalu badu ga gawa ketegal pangan lama, tu nya mih. Ehhh.. Mayuh macham ulah iya tu. Kedalih.. Kedalih.. Errrmmm.. Baka ni deka bulih duit enti baka nya belama ku aku."

"Alaaa.. Mawar.. Anang munyi nya nuan enggau aku. Nuan nemu aku tu tusah deka bulih utai ti manah, sigi bisi aja penanggul datai nekul pengidup aku. Huhuhu. Tang.. Aku enda kala minta duit belanja ba nuan.. Amat enda? Hehehe."

"Au. Au. Au. Aku nemu nuan nya anak orang kaya baka pengidup raja sema jaku. Aku tu nama dih? Kaya enda ga aku tu. Errrmmm.. Nasit bangat enda manah diberi petara ba jalai pengidup aku ari suba-suba. Huhuhu."

"Apu! Iya tu ku aku.. Kaya tauka enda.. Nya ukai ketegal pengidup kitai enda bulih nasit ti manah. Semua utai tu bepanggai ba kitai empu. Kitai empu milih jalai pengidup diri. Enti nuan milih A. Lalu A nya mih iya. Enti nuan milih B. Lalu B nya mih penyadi iya. Aku enda kaya nemu nuan. Mommy enggau Daddy aku ke kaya nya. Eh, udah nya.. Manah agi tua mupuk diatu. Legi enggaika laun nuan datai ba opis. Aaa.. Kena anu boss baru nuan nemu diri. Hahaha!"

"Motivation in the morning. Au mih Rose. Sorry Rose.. Akai.. Amat ga nya nih. Bah! Enti munyi nya, aram mih tua mupuk diatu. Pulai aku gawa legi tua berandau baru. Hehehe."

****

BA PENYANGKAI BEGUNAN OPIS ENDUR MAWAR GAWA.

"Okay Mawar. Udah datai. Hehehe." Pia ku Rose lalu iya tuchum sambil nya merening mua tudah Mawar.

"Au. Au. Aku niki opis dulu. Tang.. Ingat, nuan mesti ngambi aku sebedau pukul 5 lemai. Mesti udah nganti ba endur tu. Anang laun nemu nuan." Pia ku Mawar mekat tudah Rose.

"Okay boss.. Anang irau nuan. Enda aku laun legi. Hehehe. Danji sis.."

"Au mih sis." Saut Mawar lalu iya mupuk niki ngagai opis ba tingkat tujuh.

Udah Mawar mupuk nya tadi, Rose meda telefon iya enda lama sebedau mupuk ngagai tamu. Benung iya nyinuk meda telefon nya tadi, dia dih datai siku lelaki lalu negah iya ari tisi cheremin kereta.

"Bah!!!"

"Telu manuk nuan labuh pechah!" Pia ku Rose ti nyau tekenyit enda temu tunga.

Jantung Rose asaika deka labuh lebuhka ditegah lelaki nya. Rose lalu malik ngagai tisi cheremin kerita iya ti deka meda sapa orang ti udah negah beduan iya nya tadi.

"Eh, Honey.. Alaaa.. Kumbai aku sapa mih nya tadi." Pia ku Rose bejaku kediri lalu iya nukangka pintu kerita.

"Honey.. I'm so sorry. Tekenyit ehhh.. Hahaha!" Pia ku Gerald iya nya pangan Rose ari seduai iya agi belajar ba UiTM suba. (Sepengelama tiga taun lebih duai iya udah bepangan)

-BETAMPUNG-