TUAI ARI AKU? -NO PROBLEM-

TUSUN 6 - ANISA

TUSUN 6

TUAI ARI AKU?
-NO PROBLEM-

GENRE: PENGERINDU (LOVE)
LANGUAGE: MIX (IBAN, ENGLISH, MALAY)
DIKARANG: ALEXON JOHN (JOHN ALLEN)

BA RUMAH MAWAR.

Pagi ti tampak dipanchar mata panas, dia dih telefon Rose bemunyi. Pagi nya, Rose empai dani ari tinduk. Jarang-jarang Rose tu laun dani. Enti enda ketegal nyabakka Gerald, sigi tumu Rose tu udah angkat dani nyediaka pemakai diempa Mawar sebedau nurun kereja.

Pemuas ninga munyi telefon nya tadi, mata Rose lalu enchelak naka iya pemesai ketegal tekenyit. Dini enda tudah tuai nyau ensugau angkat dani ari katil pagi nya. Telefon ti diengkah iya ba atas mija tisi katil iya lalu diambi ti deka nyaut kangau ari telefon nya.

Randau Rose ba dalam telefon.

Rose: Hello. Sapa tu?

Munyi sura seiku lelaki lalu bejaku. Dia dih Rose lalu mendingka munyi sura lelaki nya tadi ti asaika kala didinga iya ngelama tu.

Rose: Gerald?

Gerald: Yes Honey. It's me Gerald. Your lovely boyfriend. Ulih tua betemu legi? I need to explain everything. Minta ampun udah ngachau tinduk nuan tumu pagi tu.

Rose: No! No! No! Aku enggai agi betemu enggau nuan. Lumur telefon baru pia?

Gerald: Please.. Sekali tu aja. Beri mih awak endur aku deka nerangka pekara tu enggau nyemetak agi. Ambika nuan nemu ni bagi betul enggau salah.

Rose: Errrmmm.. Enti amat nya ka nuan. Okay fine. Tengah hari legi tua betemu ba One Cafe. And.. Don't be late. Aku enda rindu meda orang laun sereta enda ingatka danji. Nemu nuan!

(Randau ba telefon lalu dipadamka Rose tekala nya. Bedau sempat tudah Gerald deka nyaut jaku ari Rose nya tadi ti agi deka bejaku madahka pekara kebukai.)

Gerald: Hello. Rose? Rose? Errrmmm..

****

BA AWAK TI SAMA.

"Cis! Jampat endar indu tu madamka telefon. Nadai guna-guna. Enda ngawa nya Rose. Main kasar iya tu diatu nih.. Okay fine." Pia ku Gerald lalu tuchum sereta mata iya juring malik ketisi.

"Baby.. Aram makai ba KFC tua. Legi Baby sponsor. Hehehe." Pia ku Regina ti baru pansut ari jamban ba Star Mall.

"Okay Baby. Aku tu nitihka nuan aja Baby. Aram mih." Saut Gerald lalu jari Regina dijapai dipegai iya enggau teguh.

Regina pan lalu ngambi awak nyandihka pala iya ba berang tudah Gerald sambil bejalai ti deka ngelawa KFC. Tuchum Gerald agi mengkang dibantaika iya sepemanjai jalai nya. Nyadi, Regina tu benung nyinuk enggau ulah seridi iya ba Gerald.

*Seridi = Manja (Ulah meraya)

Enda iya nemu Gerald tu semina begunaka duit iya aja. Nemu-nemu Gerald tu nyadi tukang sayat ba pengidup orang indu. Sigi sida indu ti kaya aja endur iya ngesaika bulu siga nya.

****

BA RUMAH KASIM.

"Linya.. Kini penunga Alvin enggau Anisa? Nadai dipeda batang idung seduai madi iya pagi tu." Pia ku Kasim nanya tudah Linya ti benung kiruh ngenahka pemakai ba atas mija makai.

"Alvin agi tinduk pelaba aku. Nyadi, Anisa tumu pagi tadi udah pansut ari rumah tu Tuan Kasim." Saut Linya enggau mua ti malu-malu.

"Kini penunga tuju pejalai Anisa nya? Bisi iya madah tadi?"

"Nadai Tuan Kasim. Berumban iya nurun tadi peda aku. Bisi ngemai kantung. Engka nya bisi bejalai enggau bala kaban iya kini."

"Ooo.. Au mih Linya. Enda ngawa. Legi aku telefon nanyaka kini penunga endur iya bejalai. Terima kasih Linya. Nah! Ambi ruti enggau ai kupi tu."

"Eh! Nibuh Tuan Kasim. Anang kiruh nuan Tuan. Hehehe."

Kasim semina tuchum aja lebuh ninga Linya madah munyi nya. Kasim nemu Linya nya agi malu-malu deka bejaku berandau enggau iya.

****

BA STAR MALL TENGAH HARI NYA.

Anisa benung duduk kediri ba siti bangku ti enda jauh ari endur makai iya nya KFC.

"Ish! Stress endar runding aku tu! Papa nadai kala ngambi berat pasal aku enggau Alvin. Gawa! Gawa! Gawa! Nya aja utai temu Papa ngelama tu. Nama iya ingat kami duai Alvin tu enda rinduka penyayau enggau pengasih ari iya? Errrmmm.. Please Papa.. Berubah mih.." Sebana ari ati tudah Anisa ti ngujungka iya tegenung jauh ari dunya nyata.

Enda lama udah nya, dia dih Rose lalu datai duduk ngerimbai tudah Anisa ti benung tusah ati nya tadi. Tengah hari nya, Rose benung nganti penatai Gerald. Tang nya mih, Gerald lalu enda datai-datai ba endur nya.

"Kini mih penunga antu Gerald tu. Ngelama nya lalu enda datai-datai. Legi ukai main agi madah diri empu deka tumu datai. Tu nama penyadi dih? Errrmmm.. Makai jaku diri empu antu perut buntas nya. Nadai guna-guna lelaki baka iya nya." Muchau tudah Rose tu tadi lebuhka nganti penatai Gerald.

Pemuas iya duduk meratika utai ti bisi ba dia, Rose lalu malik ngagai tisi sepiak kiba iya.

"Eh! Anak sapa mih tu? Merampau agi nya. Errrmmm.. Love problem mih nya." Ku sagam ati Rose din.

Pemuas duduk nganti ba bangku nya tadi, dia dih Rose lalu angkat ti deka bejalai tama ngagai KFC. Pia mega Anisa pan angkat ari bangku nya tadi. Nyadi, seduai iya sama bela seretai angkat ari bangku nya.

Nya mih ngujungka seduai iya sama bela belantak enggau pangan diri. Pala Anisa tepangka ba pala Rose.

"Ouch! Sorry. Aunty enda sengaja ngelantak nuan." Pia ku Rose ti lalu lanchat megai jari tudah Anisa enggaika tegali tepangka ba geladak.

"Enda ngawa Aunty. Salah aku nya tadi. Enda meda Aunty mansa nya. Minta ampun Aunty. Aunty?" Saut Anisa ti lalu malik ngagai mua tudah Rose.

"Enda.. Enda.. Sigi salah Aunty nya. Bisi pedis nuan? Enti bisi pedis, aram tua ngelawa klinik kin. Aunty nganjung."

"Eh, nadai aku pedis dih Aunty. Nadai ngawa tu Aunty." Lalu Anisa mantaika tuchum iya ba depan Rose.

"Amat? Au mih enti kenya. Tanda minta ampun, Aunty deka ngemai nuan makai ba KFC. Ulih? Please.."

"Aaa.." Anisa pan tekenyit lebuh ninga Rose munyi nya.

Bengap-bengap tudah Anisa tu tadi laban bedau kala orang ti baru dikelala iya enda mukai-mukai nemu ngemai makai. Ka pan enda, nitih aja mih tudah Anisa tu tadi enggau peminta ari Rose nya. Seduai iya Rose sama bela tama ngagai KFC tengah hari nya.

Deka Anisa nejuka peminta ari Rose nya tadi, malu ga iya deka madah munyi nya. Ari ti nanggung malu, manah agi Anisa nitihka peminta ari Rose nya tadi taja pan iya enggai ti kebendar iya. Seduai iya pan lalu duduk ba siti mija makai ba dalam KFC nya sambil berandauka pekara ti udah nyadi nya tadi.

-BETAMPUNG-