TUAI ARI AKU?
-NO PROBLEM-
GENRE: PENGERINDU (LOVE)
LANGUAGE: MIX (IBAN, ENGLISH, MALAY)
AUTHOR: ALEXON JOHN (JOHN ALLEN)
MAIN CHARACTERS: ROSE & KASIM
OTHER CHARACTERS: MAWAR, ANISA, ALVIN, etc.
GENTERAN CHERITA:
"Mommy enggai meda Rose jadi enggau...
Sida Kasim menyanak bejalai sambil meda-meda utai ti bisi ba Star Mall tengah hari nya. Alvin majak deka meli kasut baru lebih-lebih agi kasut ti dikena iya bemain bul ba sekula. Pia mega, Anisa majak deka meli gari baru. Iya tu nyelaie sebengkah ga taja pan gari agi mayuh tang iya tetap deka meli baru. Sema jaku nyau penuh ba jemari di bilik tinduk, agi mih iya deka meli gari.
Kasim sehari nya nadai meli utai ti semina mansutka duit dikena bala anak iya bebelanja. Nemu-nemu Kasim tu ngambi ati bala anak iya sehari nya.
"Alvin.. Anisa.. Perut Papa lapar tu. Seduai enda lapar pia?" Tanya Kasim ba dua iku anak iya nya.
"Lapar Papa.." Alvin enggau Anisa sama bela nyaut.
Nyau sereta seduai iya nyaut ti lalu murus-murus perut madahka diri empu lapar.
"Haha. Kumbai Papa enda lapar seduai tadi. Meda tak lalu enda ngetu bejalai tama kedai tu tama kedai nya. Penat kaki Papa tu deka nitihka seduai kin kia."
"Alaaa.. Ukai kitai tiga selalu baka tu ka? Hehe." Pia ku Anisa ti lalu duduk ba bangku.
"Au Papa aaa.. Amat ku Anisa nya. Eh, kemaya kita tiga tu deka makai? Lapar amat perut tu.." Saut Alvin lalu iya nyandih ba pun tiang ti enda jauh ari bangku endur Anisa duduk nya tadi.
"Okay. Okay. Papa pan lapar tu. Nyawa Papa tu asai deka makai pemakai Korea. Ehhh.. Seredah udu sera nyawa tu ku aku." Lalu mata iya gining-gining ngiga kedai makai.
"Pemakai Korea? Wah! Nyamai nya Papa. Anisa pan deka makai nya." Ninga Kasim nyebut pemakai Korea nya tadi, Anisa lalu gagit ati laban sigi tak rinduka pemakai Korea.
"Eleh.. Padah aja deka makai ba Sushi King. Nyin dih!" Pia ku Alvin ti lalu nunjukka dini endur alai kedai makai Sushi King udah nya.
BA AWAK TI SAMA. (ONE CAFE)
"Rose.. Aku bisi pekara deka ditanya ba nuan." Pia ku Mawar.
"Nama pekara nya dih Mawar?" Saut Rose ti lalu betungkat dagu sambil iya merening tudah Mawar.
"Hehe. Nuan sigi selalu ngirup ba One Cafe tu ka?"
"Au. Nama dih?"
"Nadai. Semina deka nanya aja."
"Nama ai ditu enda nyamai pia?"
"Eh, nyamai amat-amat ai ba ditu. Kupi iya cun sepi aku."
"Ooo.. Sigi nyamai ga Mawar. Nya alai aku selalu ngirup ba ditu. Agi pan Uncle nya selalu ngirup ba ditu. Opppsss.. Salah. Salah."
"Uncle? Uncle ni ga tu Rose.." Tekenyit tudah Mawar lebuhka ninga Rose nyebut munyi nya.
"Nadai dih Mawar. Salah sebut nya tadi. Hehe."
"Bula iya nya. Mesti tu bisi ngelalaika utai. Sapa Uncle nya dih?"
Mulut Rose lalu ngetu bejaku udah nya. Iya lalu tuchum lelinsum sereta ai kupi ba gelas nya tadi lalu diirup iya.
****
BA SUSHI KING.
"Okay. Kenyang udah perut Papa tu. Anisa.. Alvin.. Seduai agi bisi deka ngudar pemakai? Enti agi ka.. Udar aja.. Papa belanja sehari tu. Hehe." Pia ku Kasim sambil iya ngendas mulut ngena tisu.
"Alvin udah kenyang tu. Enda nemu Anisa dih. Meda nya agi kunyap-kunyap makai. Lama-lama iya tu makai ku aku. Enda nemu ambis lauk ba pinggai nya." Ngerara tudah Anisa ti benung nyinuk makai pemakai Korea.
"Eh, anang munyi nya Alvin. Awakka Anisa nya nembuka pemakai iya. Papa deka pansut dulu au. Ngambi angin dulu." Pia ku Kasim ti lalu angkat ari mija udah nya.
BA LUAR SUSHI KING.
Kasim benung duduk ba bangku sambil iya meda gambar Sara ba dalam telefon.
"Sara.. Sara.. I miss you so much. Gaga ati sayau meda bala anak sehari tu. Lama udah enda bejalai baka tu enggau seduai iya. 5 taun Sara.. 5 taun nemu nuan.. Chukup pedis asai ati tu deka nanggung pengerindu ti lama udah layu nadai nuan ba tisi aku. Sara.. Enti nuan agi idup diatu, sigi senang lantang kitai sebilik. Gaga sama gaga. Ketawa sama ketawa. Errrmmm.. Diatu berasai timpang pengidup aku nadai nuan enggau bejalai sehari tu. Anak-anak pan rinduka nuan Sara. Errrmmm.. Sayau ngarapka Sara meruan senang lantang ba serga din. Huhu."
Pemuas Kasim meda gambar Sara ba telefon iya nya tadi, dia dih pending iya bisi ninga orang ngangauka iya ari jauh.
"Eh, Uncle..! Uncle..!"
Ninga orang ngangau nya tadi, telefon lalu ditepu iya ba dalam kambut tanchut. Iya ti benung tunduk meda telefon lalu engkadah malik ngagai sapa ti ngangauka iya nya tadi. Tekenyit naka mih tekenyit tudah ati Kasim tu tadi. Nemu nya Rose benung ngepai-ngepaika jari iya ari jauh.
"Eh, Endun.. Eh! Rose ku aku." Saut Kasim ti agi saru enggau nama kangau tudah Rose.
"Nama pejalai Uncle ba Star Mall ditu? Sapa enggau Uncle tadi dih? Dating pia Uncle.. Hehehe." Pia ku Rose nanya Kasim ti agi tebelenga nya tadi.
Rose mansang lalu bediri ba depan tudah Kasim ti benung duduk ba bangku nya tadi.
"Stop.. Stop.. Siti-siti dulu tanya nuan Rose. Pedis pala Uncle deka nyaut mayuh macham tanya ari Rose tu. Uncle enda nemu ni bagi deka disaut dulu." Saut Kasim lalu iya ngaru pala taja pan enda gatal.
"Ooo.. Okay Uncle. Sorry.. Tanya keterubah ari Rose iya nya nama pejalai Uncle ba ditu? Dating ehhh.. Hehe."
"Aaa.. Enda ke nyamai agi baka nya. Uncle pan senang ati deka nyaut. Errrmmm.. Kemaya mih Uncle tu bisi pangan ga. Huhu."
"Laaa.. Ni nemu.. Engka Uncle dating kini. Enti ukai nya dih? Nama dih Uncle?" Majak Rose tu mejal tudah Kasim ti ngasuh nyaut tanya ari iya nya tadi.
"Nadai Uncle nuan tu dating dih. Errrmmm.. Sapa mih indu deka ke Uncle ti udah tuai tu. Huhu."
"Iya ga amat dih Uncle. Berani-berani indu baka nya madah Uncle aku tu tuai. Agi pan bisi indu deka ke Uncle sigat tu. Hehe."
"Huh?! Sapa?"
"Hehe. Bye Uncle. Ila tua betemu baru au." Pia ku Rose ti lalu beguai nyingkangka kaki iya ari endur nya.
"Rose! Rose! Rose! Nih.. Jampat endar pejalai kaki iya nya. Bedau sempat agi deka nemu sapa nama indu nya. Huhu." Pia ku Kasim ti nyau bengap-bengap enda nemu utai.
Kasim ti deka madahka Rose iya bisi ngemai bala anak iya bejalai shopping pan enda sempat mega. Asa ati tudah Kasim tu tadi laban enda sempat berandau panjai enggau Rose. Nya mih, kelalu beguai ga tudah Rose tu tadi. Kebuah pia laban Rose tu nemu Mawar lama udah nganti iya ba endur penyangkai kerita din. Nya alai Rose tu tadi berumban beguai mupuk ninggalka tudah Kasim.
