TUAI ARI AKU? -NO PROBLEM-

TUSUN 2 - KASIM

TUSUN 2

TUAI ARI AKU?
-NO PROBLEM-

GENRE: PENGERINDU (LOVE)
LANGUAGE: MIX (IBAN, ENGLISH, MALAY)
DIKARANG: ALEXON JOHN (JOHN ALLEN)

BA RUMAH KASIM.

Kasim laun dani pagi nya laban udah bendar gawa malam tadi. Iya laun pulai ketegal bisi meeting pasal projek baru ba opis. Pengidup Kasim jauh udah bebali ti enda baka ke dulu suba sekumbang bini ti dikesayau iya nya udah lelang midang.

Dikena iya muai pengingat lama, Kasim ngaga diri tauka sengaja kiruh enggau semua pengawa iya ba opis. Nyadi, Kasim tu siku lelaki ti ngembuan dua iku anak. Siku lelaki ti diberi nama Alvin. Nyadi, Alvin tu berumur 15 taun iya nya besekula ba pom 3.

Anak Kasim siku agi iya nya indu. Anak indu iya diberi nama Anisa. Nyadi, Anisa tu berumur 17 taun. Empai lama udah ambis ngambi Sijil Pelajaran Malaysia (SPM) ba pom 5.

Diatu Anisa diasuh Kasim ngibun ngemataka Alvin lebuh iya nadai ba rumah. Ukai semina nya aja, Kasim mega bisi ngambi siku indai tuai nyadika ama iya nya gawa ba rumah iya. Nyadi, indai tuai nya tadi diberi nama Linya.

Lebuh Kasim nadai ba rumah, Linya tu mih ngibun ngintu pemakai bala anak iya. Pia mega Linya tu udah mayuh kiruh ngereja mayuh macham pengawa ba dalam rumah Kasim baka meresi rumah, berapi enggau mayuh agi pengawa iya kebukai. Kelimpah ari nya, Kasim mega bisi meri gaji tiap-tiap bulan ngagai Linya.

Enti lebuh maya Kasim pulaika rumah sepengudah ambis pengawa digaga ba opis iya, udah nya baru Linya ulih pulai tanda ambis gawa sehari nya. Tang nya mih, Linya selalu laun pulai ketegal Kasim laun belama pulai ari opis. Pengidup Kasim mayuh diambiska iya ba dalam opis ari diau ba rumah begulai enggau bala anak.

****

BA MIJA MAKAI. (PAGI NYA)

"Alvin.. Anisa.. Aram enggau Papa breakfast." Pia ku Kasim ngangauka dua iku anak iya ti benung nurun anak tangga ari tingkat tiga.

Rumah Kasim bisi tiga iti tingkat iya nya ba tingkat dua bilik tinduk Kasim. Nyadi ba tingkat tiga iya nya bilik tinduk Alvin enggau Anisa.

"Eh! Anang belanda ba tangga nya. Legi labuh seduai. Sapa tusah laban nya? Papa tu ga tusah." Kasim ngelara ulah bala anak iya.

"Ish! Enda labuh kan Papa? So, we are okay now." Saut Anisa lalu mata iya melintat enggai meda Kasim ngelara ulah seduai iya nya tadi.

"Anisa.. Anang munyi nya nuan. Papa semina madah aja. Ukai nya nganu dih. Papa sayauka seduai nemu. Sayau  Anisa. Sayau Alvin." Padah Kasim ba dua iku anak iya.

"Sayau? Huh! Ngelama tu, nadai pan Papa nya kala kiruh nanya pengawa kami duai Alvin ba rumah tu." Ku Anisa mantaika sebana enda puas ati enggau ulah Kasim ngelama tu.

"Anisa.. Nama gaga nuan munyi nya ba depan Papa? Enda mereti amat iya tu. Papa.. I'm so sorry Papa. Salah kami duai nya tadi." Pia ku Alvin udah nya.

"Enda ngawa Alvin. Papa udah teleba enggau semua tu. Okay. Papa deka nurun kereja dulu. Anisa.. Ingat, peda Alvin nya. Anything, just call or text Papa. Papa mupuk dulu." Kasim lalu nurun gawa pagi nya.

Tinggal kediri Alvin enggau Anisa ba mija makai.

"See.. Papa pedis ati nya. Anisa tu enda nemu nyaga ati Papa. Please Anisa.. Anang ngaga ulah baka tu agi ba depan Papa. Enda kasih nuan meda Papa nya? Errrmmm.. Siang malam Papa gawa ngiga duit dikena iya melanja pengidup kitai sebilik." Padah Alvin ba Anisa sambil nya jari iya nyengkau ruti ba pinggai.

"Ohhh.. Nuan deka nanahka Papa pia? Okay. Fine." Saut Anisa lalu iya bekerendut dada.

"Aih! Dini bisi aku nanahka Papa. Tiap utai ti udah disebut aku nya tadi sigi betul magang-magang. Tang nya mih.. Mata Anisa nya bangat buta enda meda pengasih Papa ngelama tu." Saut Alvin ti nyau engkuam laban ruti ti penuh ba dalam nyawa iya.

"Ah! Kiruh aku enggau Papa nya. Ni ku nuan mih Alvin ka ngakim Papa nya baka ni. Aku enggai kiruh enggau seduai. Okay bye." Anisa lalu angkat ari mija makai ninggalka Alvin kediri ti benung ngirup ai milo pagi nya.

"Eleh.. Pedis ati iya tu. Errrmmm.. Nyamai agi aku makai ruti tu. Nyamai ruti gaga nuan Aunty. Delicious munyi ku ribai." Ruti digaga Linya nyau dipuji Alvin enggau pengambis ati.

****

BA DALAM KERITA.

Kasim benung nganti ba tisi jalai alun. Jauh tudah Kasim tu tegenung. Ngenang nasit diri ti bangat merinsa sepengudah ditinggalka bini iya. Charut runding Kasim lebuh iya bebagika pengawa ba opis enggau pengidup ba rumah.

"Salah pengawa digaga aku tu kini? Nama kebuah Anisa nyau nemu mantah jaku aku diatu? Suba nadai iya kala ngaga ulah baka nya. Anisa.. Anisa.. Pedis pala Papa digaga nuan baka tu. Errrmmm.. Sayau.. Jampat bendar nuan ninggalka aku enggau bala anak. Berasai enda lantang sereta timpang pengidup nadai nuan Sayau ba dunya tu. Huhuhu." Pia ku Kasim besebana ba dalam kerita iya.

Nyau beteritik ai mata Kasim lebuh ngenangka pemerinsa diri ditinggalka bini ti dikesayau. Ba dalam ati iya din, chukup pedis deka muai pengingat lama ti udah lama ditempa kenyau ari suba. Makin dikenang, makin merinsa ati Kasim nya.

Enda ulih dipelalai iya agi tang nama mih daya iya deka nusi semua utai nya ba depan anak iya. Ukai nya nemu reti enti dipadahka. Nya mih utai ti selalu dirunding Kasim ngelama tu. Deka iya ngiga bini baru tang pintu ati iya bedau telenga deka nerima indu.

Pemuas Kasim tegenung nya tadi, dia dih telefon iya bemunyi. Dunya tegenung Kasim lalu padam tekala nya sepengudah tekenyit ninga munyi telefon iya empu. Dia dih, Kasim lalu ngambi telefon iya ari kambut tanchut.

Randau ba dalam telefon:

Sekretari: Hello, Tuan Kasim. Mawar tu.

Kasim: Aaa.. Mawar, nama utai dih?

Sekretari: Dini Tuan Kasim? Tuan nemu enda sehari tu kitai bisi meeting pasal projek baru nya?

Kasim: Akai! Nama nuan enda madah tumu tadi Mawar? Okay Mawar. Baka tu iya Mawar, nuan ngaga nama utai ti patut digaga dulu. Enda lama agi aku deka datai ba opis. Benung ba rantau jalai tu.

Sekretari: Sorry Tuan Kasim. Kumbai aku Tuan udah nemu pasal meeting nya. Laban kemari sebedau pulai lemai nya, aku bisi nganjung reminder pasal meeting nya ba email Tuan.

Kasim: Ooo.. Enda ngawa Mawar. Engka aku enda ingat deka double check email ari nuan kemari. I'm so sorry Mawar. Enda lama agi aku deka datai ba opis.

Sekretari: Au mih Tuan Kasim. Take care Tuan Kasim.

Kasim: Thanks Mawar.

Randau Kasim enggau sekretari opis iya ba dalam telefon lalu ngetu padam tekala nya.

-BETAMPUNG-