TUAI ARI AKU? -NO PROBLEM-

TUSUN 5 - DIKEDUAN

TUSUN 5

TUAI ARI AKU?
-NO PROBLEM-

GENRE: PENGERINDU (LOVE)
LANGUAGE: MIX (IBAN, ENGLISH, MALAY)
DIKARANG: ALEXON JOHN (JOHN ALLEN)

BA ONE CAFE.

"Sorry Uncle. Eh! Aki. Eh! Abang. Eh! Confuse." Pia ku Rose ti nyau kesal ati sepengudah besatup belantak enggau Kasim.

"Ah! Baju kena aku ambis basah. Eh, enda ngawa nya. Ukai salah nuan. Salah aku ti berumban enda meda nuan deka angkat." Saut Kasim sambil nya iya ngendas-ngendaska baju iya ngena jari.

"Oh.. Iban.. Enda-enda. Salah aku nya. Sorry Uncle. Eh! Abang. Ish! Saru laban iya tu. Huhuhu."

"Enda ngawa nya Endu. Salah aku nya tadi."

"Endu? Tuai iya tu pelaba aku. Meda gamal baka ke enda tuai ga." Sagam ati Rose ba Kasim.

"Enti baka nya, legi aku meli ai tu baru ke nuan. Nganti ba ditu dulu au Uncle. Eh! Embal aja. Malu amat aku eh!." Pia ku Rose mantaika kesal ati iya ba Kasim.

"Nibuh kiruh nuan Endu. Aku deka mupuk dulu. Udah chukup jam tu." Saut Kasim lalu iya beguai pansut ari One Cafe tengah hari nya.

"Aaa.. Anang guai.. Nih, udah mupuk ga iya. Jampat endar singkang kaki. Deka nanyaka nama iya kenu ku jaku. Errrmmm.. Enda ngawa ga. Ngarapka ulih betemu baru." Pia ku Rose sambil nya ngaru-ngaru pala taja pan enda gatal.

****

BA JAYA HOLDINGS. (BILIK OPIS KASIM)

Kasim duduk sambil nya iya meda-meda gambar bala anak ba dalam telefon. Pemuas iya meda gambar nya tadi, dia dih iya nekan kamera ba telefon nya.

"Uncle? Hahaha! Nyau udah tuai gamal aku tu diatu pia? Errrmmm." Pia ku Kasim ti nyau nyinuk meda mua iya empu ba depan kamera telefon.

Ambis buk iya ti bisi uban nya tadi dipeda dipegai iya. Pia mega, chermin mata ti dikena iya lebuh diingkas iya lebuh dipasukka iya mega. Ambis peninggi tubuh, pemesai perut, enggau chura kulit dipeda iya ba depan kamera telefon nya.

"Enda puas ati aku. Nama aku tu tuai endar dipeda orang indu kini? Umur empai lama udah manggai 45 taun ga. Bedau ga nya tentu tuai endar. Ah! Ngeleda Kasim.. Nuan nya udah duda. Anang berunding deka nyadi orang bujang. Anak udah dua nya Kasim. Ingat umur diri empu udah tuai Kasim."

Nemu-nemu Kasim tu bepesan madah ngagai diri empu ti enda ngasuh ngaga ulah nyelaie-nyelaie ketegal umur udah tuai kenu ku jaku. Tang jauh ba dalam sukut ati iya din, Kasim sigi deka ngiga bini baru. Ukai ketegal enda sayauka niang bini, tang nya mih semua nya majak ngasuh ati Kasim merinsa lebuh nanggung rindu sepengelama lima taun ti udah lalu.

****

BA AWAK TI SAMA.

Mawar nyau geli ati lebuh meda ulah boss iya nya Kasim ti benung kiruh nyeremin diri ba depan kamera telefon. Kenu ku jaku ka nganjung Report File pasal projek baru tang enda nyadi sepengudah meda Kasim baka nya. Ka pan enda dijeling iya ari tisi pintu penama mih tudah ulah Kasim tu tadi.

"Nama mih mimpi Tuan Kasim tu ku aku. Tak nemu ka meda gamal diri empu ba depan kamera telefon. Ngelama tu enda kala ulah iya baka nya. Hehehe.. Mesti tu bisi undang ba selepak batu. Aaa.. Bisi endar utai tu. Tuan.. Tuan.. Kasih ga aku meda nuan baka nya. Lima taun udah duda lalu enda kawin-kawin. Tan endar ga ati iya nya nanggung rindu betaun-taun. Errrmmm.." Pia ku Mawar lalu iya nikal pulai ngagai mija iya empu.

****

LEMAI NYA BA RUMAH MAWAR.

"Tuk! Tuk! Tuk!" Munyi ketuk pintu penama ba bilik tinduk Rose.

"Anang guai! Agi begari tu!" Pia ku Rose.

Enda lama udah nya, pintu penama bilik tinduk Rose pan lalu ditukangka iya.

"Aaa.. Sis Mawar. Nama dih?" Tanya Rose.

"Sis Mawar.. Sis Mawar.. Nuan tu udu endar bulaka danji. Huh!" Saut Mawar lalu mata iya melintat lebuhka merening Rose ti benung bediri tegi-tegi ba depan iya.

"Danji? Bula? Nama utai ku nuan tu Mawar? Enda aku mereti enggau utai ti dipadahka nuan tu. Please Mawar.. Anang ngaga jaku silup baka tu."

"Okay fine. Orang udah enda ingatka kitai agi. Kapa iya deka kiruh. Benchi sis.."

"Okay enda nuan tu Mawar? Any problem in the office?"

"Problem. Problem. Nuan nya problem aku diatu. Dini danji nuan deka ngemai aku makai tengah hari tadi? Huh!"

"Ohhh.. Minta ampun Mawar. Amat- amat minta ampun aku ba nuan Mawar. Ukai aku enda ingat, tang nya mih..."

"Tang nya mih nama tu? Uji apuska dulu leka jaku ti deka disebut nuan nya dih. Ish! Pedis amat ati aku tu."

"Nemu nuan Mawar, diatu runding aku benung charut tusut baka busut ba ditu. Ngenang tu ngenang nya agi. Ah! Nadai guna-guna antu perut buntas baka Gerald nya."

"Gerald? Nama ulah ti udah digaga iya ba nuan? Padah ngagai aku. Pegila numbuk mua iya nya. Berani-berani iya ngemediska ati petunggal aku tu nih.."

"Eh! Iya tu ku aku. Nuan ingat nuan nya kering baka lelaki. Nibuh aja mih."

"Au aja mih aku tu. Bah! Aku nganti nuan madah tu."

"Gerald bisi indu bukai. Huhuhu." Lalu Rose nyabak sepengudah iya madah munyi nya ba depan Mawar.

Lalu Rose merap tudah tubuh Mawar enggau sabak-sabak lemai nya.

"Huh?! Amat nuan Rose?! Sapa indu nya?!" Tanya Mawar ti nyau tekenyit enda temu tunga.

****

BA RUMAH GERALD.

Gerald maya nya benung gali ba atas katil sambil meda gambar seduai iya Rose ba dalam telefon.

"Rose.. Rose.. Nuan nemu aku tu enda sayauka nuan nya. Aku semina deka ke duit nuan aja. Ish! Nadai guna-guna Regina nya. Ngachau lubuk duit aku. Ambis pejalai atur aku ngelama tu dikachau iya. Errrmmm.. Ka pan enda, berengkah baru mih tu ari pun. Rose.. Rose.. Senang aja deka ngambi ati nuan nya. Jaku manis kunchi iya Rose. See you next round Rose. Wait and see. Hahaha!" Pia ku Gerald ti nyau engkakah kediri ketawa ba dalam bilik tinduk iya.

****

BA AWAK TI SAMA. (RUMAH MAWAR)

"Amat jai Gerald nya nih.. Sampai ati iya beduan nuan baka tu. Empat taun seduai udah begulai. Agi ga iya ngiga indu bukai. Ish! Pedis amat ati aku ba ditu. Enti aku betemu enggau antu perut buntas nya pegila lusa, sigi tendang aku telu pelir iya nya." Pia ku Mawar ti nyau pedis ati sepengudah ninga Rose mantaika sebana ati iya.

Bendar Rose nyabak lemai nya sepengudah iya nusi ngagai Mawar cherita ti udah nyadi ba iya tengah hari tadi. Ambis tisu ba dalam kutak dikena iya ngendas ai mata. Idung Rose nyau majak mirah ketegal nyirutka insak ti majak neritik ketegal sabak enda nemu ngetu-ngetu ari tadi.

-BETAMPUNG-