صراع إمرأتان

الفصل عشرين

بعد مرور ثلاثة اشهر

******حمزة يحكي*****

فقت الصباح على ياسر واقف عند راسي يحرك فيا بالقاوي و يضرب فيا باش نوض...في الاول رميتو في التقيل و لعبتها ماحسيتش بيه و مافطنتلوش قاع بصح من بعد مرة وحدة لقيت روحي قاعد و نشهق بالخلعة كي لقيتو فرغ عليا كاس ما بلا مايهددني مامبا باش نضرب حسابي و بلا مايهرب كي دار واش دار...بقى واقف عند راسي و مربع يديه و يخزر فيا و انا نشوف في روحي ضارب دوش على صباح ربي بلا مانشقى للدوش اصلا...

هزيت يدي مسحت وجهي من بعد خزرت فيه و النار تخرجلي من عينيا...

حمزة:واش بيك صباح الله؟ جهلت و لا هبلت؟

ياسر:نتا لي واش بيك؟ طرشت و لا قاعد تلعب فيها؟عندي ساعة واقف نفيق فيك ماحبيتش تنوض و حتى رافاي و مادرتش باش تنوض وحدك؟ ماراكش ناوي تروح تخدم على روحك ...العطلة عندها سمانة ملي كملت و نتا رجلك ماطاحتش في لافاك حابهم يطردوك؟

حمزة:شحاااال تهدر ياسر بنادم صابح كاره حياتو و نتا حالف لا تسكت

ياسر:اسمع غادي نخرج من هنا عندك عشر دقايق في يدك و نلقاك رايح لجد خدمتك مانقعدش نتبع فيك كي الدراري و ديجا يماك بدات تنشغل عليك و تحس بلي ماراكش نورمال

حمزة:يما دوك انا نوض نحكي معاها و الخدمة ماحابش نروح اليوم كي نفري شغالاتي نروح وحدي بلا ماتقولي

السيد كان خارج كي سمعني واش قلت رجع تم تم و جبد معاه الكرسي تاع لبيرو تاعي حطو اون فاص ليا و ريح عليه...و بدا يخزر فيا من لفوق للتحت بالشوفة تاعو لي ترعب...ياسر مالغري ماشي كبير عليا بزاف مي عندو دور في حياتي مايتوصفش بالكلمات...يكون بابا اذا حتاجيت لي يربيني و خويا لكبير اذا حتاجيت لي ينصحني و صاحبي اذا حتاجيت سند و بير  اذا حتاجيت وين نرمي اسراري...جامي خيبني و خلاني وحدي و جامي غمض عينيه و لعبها ماشايفش واش راه يصرالي...يفهمني بالطايرة و بلا مايقعد يلف و يدور و حتى اذا حاولت انا نهرب نلقاه حكمني و دخل في السوجي ديراكت و مايطلقنيش حتى يحلي مشكلتي...

ياسر:حكاية طفلة ياك؟

تلونت بقاع الوان الدنيا و النفس راحلي كي سمعتو واش قال...و تم تم لعبتها كي شغل ماتأترش و جاوبتو بكل ثقة و انا نجرب نخبي عليه...

حمزة:لا نتا صبحت هابل تاع الصح...من وين راح تجي هاد البنت يرحم باباك

كملت كلامي و لعبتها غادي نولي نرقد و انا ناسي قاع الماء لي كنت غارق فيه...هو كي شافني غادي نعطيه بالظهر و نرقد حكم لغطى تاعي و نحاهلي من يدي بالقاوي باش نعاود نخزر فيه و قال...

ياسر:من لافاك مثلا

حمزة:روح لخدمتك روح راك بديت تخلط

جاوبتو بالزربة و وقفت قاصد الدوش باش نتخبى منو باسكو علبالي بلي لوكان يزيد يشك فيا شوية برك و لا نزيد نريح معاه دقيقة قاع الحكاية  لي عندي تلت شهور نخبي فيها على روحي و على العايلة راح نفرغها في ثواني صغار...