صراع إمرأتان

الفصل العاشر

لحقت للفاك تاعي و قريت كيما نهار لي قبلو زوج تاع لي كور و خرجت حكمت طريقي للاسيتي...غير وصلت لتما حكمتني الخلعة باسكو غير حطيت رجلي في لباب الحارس لي كان تما تم تم بعدلي من الطريق و تبسم معاي...انا من قوة الشوك بقيت نخزر موراي نشوف اسكو كاين شي وحدة موراي و لا لالا..يعني قلت بلاك ماراهش معاي راه مع كاش طفلة وحدو خرة يعرفها مي المشكل كنت تما وحدي..و الحاجة لي خلاتني نستغرب كتر انو الانسان هذا نفسو موالفة غير نرجع دايما نلقاه عاقد حواجبو و يخزر فيا تحسب قتلتلو باباه و يزيد يطلب مني واحد الورقة تقول بلي انا دايرة الاقامة هنا و لوكان مايشوفهاش مايخلينيش ندخل كيما يقول القانون مي اليوم مادارش هاكك و كان تعاملو مختلف...بيان سور انا مركزتش معاه بزااف و تجاوزت الصدمة تاعي و هبطت راسي نجبد الورقة باش نوريهالو مي هو حبسني و قالي..

الحارس:مكلاه مكلاه تقدري تجوزي

هزيت راسي فيه و انا مستغربة و مافاهمة فيها والو..لقيتو مازال كيما كان يخزر فيا و يتبسم...لوكان ماجيتش نعرف روحي بلي قليلة زهر نقول بلي راه يضربلي الشيتة بصح الله غالب زهري و نعرفو...

المهم خليتو موراي و دخلت ناوية نحكم طريقي لشومبرتي ديراكت بصح حبسوني الحراس لخرين لي كانوا واقفين في جيهة خلاف كي هوما تاني تبسموا معاي و قالوا مرة وحدة..

الحراس:السلام عليكم

خزرت فيهم و الخلعة تاعي غير تزيد تكبر...يعني انا موالفة نجوز عليهم و نعاود و جامي قيمتهم و لا قيموني بصح اليوم هوما لي راهم يحوسوا عليا و هوما لي بدلوا المعاملة تاعهم معاي لدرجة خلاوني داخلة في ستين حيط و مافاهمة فيها والو...

جاوبتهم و خففت مشيتي باش نلحق لشومبرتي بلخف باسكو خلاص بديت نتوسوس منهم و بديت نخاف...و مخي بدا يدي فيا و يجيب باش يفهم واش راهو صاري..يعني انا مادرت حتى عفسة باش يرجعوا يقيموني هاكدا و جدي نعرفوا مليح مستحيل يكون هو وصاهم عليا باش يتبدلو معاي هاكدا بين ليلة و ختها...و لا زعما يكون هو هداه ربي و تبدل و قال مادامني حصلتها مع الكلوشارات هادوك على الاقل نوصي عليها الحراس كاشما يعسوها منهم؟؟..اواااه محال غير هادي لي ماتصراش...مكلاه طمعي روحك يا ليساء...

لحقت للبلوك تاعي و طلعت للايطاج لي فيه شومبرتي...غير لحقتلوا حكمني الخوف ديراكت باسكو لبنات كامل كانوا برا ماعدا كاميليا...بديت نمشي في وسطهم و قلبي يضرب من الخلعة بصح لبروبلام مام هوما و كانوا مبدلين معاي...يعني موالفة غير يشوفوني يحوسولي على المشاكل ديراكت بصح اليوم لعبوها كي شغل كامل ماشافونيش و ماقربولي ماحكاو معاي...و بيني و بينكم الجاست تاعهم هادي زادت خوفتني كتر و كتر..زعما يكونو يحفرولي و راهم يوجدوا رواحهم باش يجيبو حق كاميليا و راهم غير يمثلوا عليا درك؟؟

كملت طريقي للاشومبر و انا غايسة نخمم في الشي لي صرا معاي اليوم...فتحت الباب و دخلت و غلقتها و انا ماشي قاع مركزة تقدروا تقولوا كنت في دنيا خلاف...على بيها غير درت و لقيت شجن مريحة فوق السرير تلبس في الباسكات تاعها عيطت تم تم من الخلعة لي طلعت معاي من رجلاي...و شجن تم تم هزت يديها غلقت على ودنيها و عيطت عليا...