صراع إمرأتان

الفصل 38

*******ليساء تحكي******

قلبت آخر صفحة من الكراس و يديا يرعشوا... طاحوا في حجري تصاور قدم بزاف مع براوات... هزيتهم نشوفهم و انا كلش مضبب في عينيا بالدموع... أول صورة كانت ليما و السيد لي نورمالمو يكون بابا و لي اسمو يحيى... ماقدرتش نشوف في وجهو و ماقدرتش نتمعن في ملامحو حاسة روحي كارهاتو كره العمى بعد واش عرفت عليه... كنت في حالة تشف العدو... النفس و حسيت روحي نتقاتل باش نتنفس... الغصة تاع البكا حاستها خانقتني و قلبي كان يوجعني... حسيت روحي ضايعة ماعرفت واش ندير ماعرفت وين نروح بروحي...

وقفت بسيف و انا جسمي قاع يرجف... جمعت التصاور هادوك و البراوات و الكراس و جبدت صاك من تاع ماما رميتهم فيه هزيتو معاي و خرجت من الدار نمشي بسيف... نشوف في الدنيا مضببة من الدموع لي محجرين في عينيا و رجليا هازيني بسيف...

غير فتحت الباب تاع الدار قابلني حمزة داخل بالطونوبيل كي شفتو حسيت روحي شفت الفرج خاطر بقالي غير هو و شجن لي مادخلوش لحياتي بالكذب... مشيت عندو و دموعي يسيلو محبوش يحبسو هو كي شافني حبس الطونوبيل و نزل عندي يتبسم بصح غير قربت لعندو و شاف حالتي تبسيمتو نمحات و جاني يجري...

حمزة: واش بيك؟ واش صرالك؟

رميت روحي في حضنو و بديت نبكي بالصوت بلا مانهدر... البكا قاع لي حبستو و انا نقرا و نكشف في المخبي فرغتو في صدرو حتى فشلت و كنت راح نطيح لوكان ماشي هو كان مزير عليا و حاكمني من وسطي...

حمزة: ليساء طيحتيلي قلبي واش بيك؟ واش صرالك؟

باش ننطق و نجاوبو ماقدرتش... حاسة صوتي راح من الصدمة و من الحقائق لي عرفتهم .. قعدت نشوف فيه برك فاشلة يديا ماقادراش نهزهم.. حالتي هاديك زادت خوفاتو عليا..

حمزة: هيا نديك للسبيطار

درتلو براسي لا لا و انا حاسة روحي بديت نغيب..

حمزة: كيفاش هادي لا لا ماراكيش تشوفي في حالتك؟

قبل مانجاوبو سمعت صوت جمال ورايا..

جمال: واش كاين هنا؟

حمزة: جمال واش درتو للطفلة؟ علاش راهي في هاد الحالة؟

جمال: واش من حالة مافهمتش

نزل من طونوبيلتو و جا لعندي طل عليا... غير شافني كيفاش كنت رمى يدو باش  يجبدني لعندو بصح أنا بعدت عليه و تخبيت كتر في حضن حمزة...

جمال: ليساء بعدي عليه و فهميني واش بيك؟

رجعت صوتي بسيف و نطقت و انا حاسة روحي ندير في مجهود كبير باش خرجت زوج كلمات...

ليساء: حمزة ديني من هنا ماتخلينيش عندهم

جمال كي سمعني واش قلت طرطق فيا..

جمال: وين تروحي وين؟ سايبة الدنيا عندك

حمزة: حبس هبالك و ماتنساش بلي راني راجلها و يماها خلاتها أمانة عندي و عندي الحق فيها كيفك و كتر