صراع إمرأتان

الفصل 36

******ليساء تحكي*****

قلبت صفحات الكراس و كي لقيتهم قاع مكتوبين و بخط ماما رحت ريحت على سريرها و بديت نقرا فيه و انا قلبي يخبط بالقاوي...

"سلام ليساء بنتي؟ واش راكي؟ الا طاح هاد الكراس بين يديك و أن شاء الله يطيح بين يديك و مايسبقكش ليه عبد اخر تسما ربي خلاص دا امانتو و انا راني لقيت مولاي على بيها راني نسقسيك على صحتك...أن شاء الله تكوني رفدتي روحك مور موتي و وقفتي على رجليك خاطر انا مانحبش نشوفك زعفانة و مانحبش نشوفك تبكي...نبغيك توقفي على رجليك و تكملي حياتك و كي تتفكريني دعيلي بالرحمة بزاااااف عليا.."

طاحت دمعتي مور ماقريت واش كتبت...هزيت يدي مسحتها و استغفرت و كملت نقرا...

" بديت نكتب في هاد الكراس مور مافرغت عليا الدار بروحتك للجامعة...كنت نبقى نهار كامل بين ربع حيطان نخمم فيك و في حوالك و من قوة لي كان وقتي فارغ و ماعنديش بواش نعمروا من بعد ماحبست الخدمة خممت نستغل وقتي و نكتبلك كلش...نحكيلك على روحي و على حياتي و على قاع الاسرار لي كان عندك الفضول عليهم و نريح بالك و مالقيتش خير من فكرة انو نكتبلك حكايتي هنا و نخلي الكراس يطيح في يدك بعدما ربي يدي امانتو...

شريت الكراس و قعدت نخمم كيفاش و من وين نبدا من بعد قررت نبدا من الصفر و نبدا كي شغل راني نحكي لواحد عمرو و لا عرفني..."

قلبي زير عليا و خاطري ضاق كي عرفتها راح تحكي حياتها قاع هنا...عرفت بلي راح نواجه حكايتها من الاول للتالي و بلي راح نتعرف حتى على بابا في هاد الكراس...خديت نفس قوي و سميت الله و كملت نقرا و انا ندعي باش مانصدمش بحقيقة تحطمني و تزيد على مابيا...

*******وردة تحكي******

سلام.. انا وردة...طفلة وحدة بين أربع رجال و لا خليني نقول بين أربع سبوعا الناس كامل تشهدلهم بالخير...تربيت و كبرت في عايلة تقطر حنانة...رباتنا يما على الاحترام و كبرتنا و حنا قراب لبعضانا بزاف...يما كانت هي نور الدار و روحها...كانت جامعتنا عليها و ماتخليناش نفترقوا كامل و كانت مقلشتنا قاع بصح كل واحد بطريقة و بابا كان السند تاعنا..ربانا على القوة و علمنا بلي يليق لي نحبوها نديروها و مانسمحوش في حقنا مادام علبالنا بلي ماراناش غالطين...بالمختصر علمنا تكون شخصيتنا قوية و نفرضوا على الناس تحترمنا تحت كل الظروف و مهما كان الحال...يما و بابا حطوا اليد في اليد و سعاوا دائما باش يشوفونا في القمة...كان الهدف الاول و الاخير تاعهم انو حنا نوصلوا لأعلى المراتب و نشرفوهم على بيها ماعطاوناش نهائيا الفرصة انو كاش نهار نخمموا في الاستسلام و لا الانسحاب و لا كاش نهار نخمموا نطيحوا نيفنا قدام كاش واحد...زرعوا في عقولنا بلي كرامتنا فوق قاع الناس و بلي دائما لازم نحطوا رواحنا في المرتبة الأولى من بعد عاد نخمموا في لي يجي مورانا على بيها غالبية الناس لي كانت دايرة بينا كانت تشوفنا متكبرين و انانيين و حنا قاع كخاوة كنا نشوفوها قوة شخصية و فرحانين بهاد الصفات لي زرعوهم فينا والدينا في وقت الناس الأخرى تمنات تكتسبهم بمرور الزمن..بالمختصر المفيد انا و خاوتي تربينا تربية متكاملة من كل النواحي...لقينا الحب لقينا الدعم لقينا قاع واش تمنينا باش نبنيوا طريقنا نحو النجاح و عمرنا لا حتاجينا حاجة من الغريب..