جدي غير شافني نعتلي بيدو باش نروح نريح حداه...درتلو برايو باسكو كنت حاسة بلي واش راح يصرا ماراحش نقدر نستوعبو و انا واقفة...غير ريحت حداه هو بدا يحكي....
جدي:اسمعيني مليح و ركزي معاي في واش راح نقولك تعرفيني منحبش نعاود كلامي زوج مرات
خزرت فيه و درتلو براسي ايه من بعد هبطت عينيا نخزر في يديا لي كنت نلعب بيهم و انا نرجف نستنى في لخبر لي راح ينزل عليا...
جدي:اليوم في الصدقة جاو بزاااف من معارفي لكبار و واحد منهم عندو طفل في عمرو 26 سنة شافك و حكى عليك مع والديه..و هوما قصدوني طلبو يدك في لحلال و انا مرفضتش باسكو علبالي خير منو ماراحش تلقاي..الطفل قاري و مربي و عينيه مايهزهمش من الارض و زيد لاباس عليه و كاين غير هو عند يماه و باباه و راني حكيت مع يماك في هاد الموضوع و قررنا نرجعولهم لخبر بلي رانا قابلين و ماعليهم غير يخيرو النهار لي حبو و يجيو يلبسوك الخاتم
كي بدا هو يحكي و لحق لموضوع الزواج طلعت راسي و قعدت نخزر في ماما...كنت نخزر فيها و دموعي لاصقين في شفاري...من جيهة موجوعة منها و من واش راني نسمع و من جيهة اخرى مانيش حابة نبين ضعفي قدامهم و نخليهم يستشفاو...
هي ماخزرتش فيا نهائيا و قعدت حاطة راسها في الارض و تبكي في الوقت لي كنت انا حابتها توقف و دافع عليا...حبيتها تنوض و تقول لجدي هادي بنتي انا و انا لي نخيرلها مستقبلها و نتحكم في حياتها كيما نحب...حبيتها تحسسني بلي مانيش وحدي و هي راها معاي...حبيتها تخلصني من شعور اليتم لي راه عندي في قلبي مي والو...حاجة من هادو ماصرات...كانت قاعدة اون فاص ليا و مستسلمة..ضعيفة و مهزوزة في الوقت لي كنت انا حابتها تكون قوية على جالي...
وجيعتي كبرت كتر و كتر و حسيت روحي راح نطرطق بلبكا هنا في وسطهم على بيها تم تم و بلا مانفطن خزرت في جدي و حركتلو راسي بمعنى ايه و وقفت خارجة من تم...هاربة منهم و من لخزرات تاعهم لي كانت كلها تستشفى فيا و فرحانة بواش راه يصرالي...خزرت في كل واحد منهم مليح باش نحفض وجوههم و نشفى مليح على واش دارو فيا باش جامي يجي نهار و نحن فيهم و نرحمهم...
لحقت لباب الصالون لوين كانت واقفة مرت خالي..و دورت وجهي رجعت من اول و جديد نخزر فيهم و كي جيت نخرج حبستني مرت خالي لي كانت تهمس في ودني...
مرت خالي:نتي ظلمتيه و غلقتي التاقة في وجهو مي هاهو ظهر ناس ملاح و ناوي لحلال
تشوكيت كي سمعتها واش قالت و هزيت راسي نخزر فيها كيفاش كانت تتبسم على جنب فرحانة بواش راه يصرالي من بعد حركت راسها تاع ايه و قالت...
مرت خالي:والله غير هو
في الدقيقة هاديك حسيت الارض لعبت بيا و انا نتفكر في وجهو..في قلة احترامو...في الشي لي كان قاعد يدير فيه مع كل بنت تجوز عليه و كلامو طايح...تفكرت شحال خلاط و مايسواش و شحال مافيهش ريحة الرجلة و اهم حاجة تفكرت شحال نكره انا الرجال لي دايرين كيفو...
أنت تقرأ
صراع إمرأتان
Romanceيقولو ناس زمان همك يجيك من دمك و انا نقول قادر الرحمة لي تلقاها في الغريب ماتلقاهاش في لقريب... لكرونيك تحكي على زوج بنات تجمعهم الصدفة في وقت تكون فيه ظروفهم حطمتهم و تعبتهم..زعما يلقاو الخير في بعضاهم؟و زعما يكون كاين حب في حياتهم؟
