******حمزة يحكي*****
متكي في بلاصتي في شومبرتي و هاز يدي اليسرى اون فاص ليا...نخزر في الخاتم و نتبسم وحدي كي البهلول...لمعة عينيا من الفرحة قادرة ضوي مدينة كاملة مهما كان ليلها كحل....صورة ليساء في الخطبة و زينها...رقتها و خدودها لي كانوا حومر من الحشمة مازالهم مرسومين بين عينيا...و من قوة لي جا كلش ساهل و ميسر من عند ربي سبحانو مانيش قادر نستوعب بلي خلاص ليساء رجعت خطيبتي و مرتي على سنة الله و رسوله و بلي مابقى يفرق بيني و بينها والو من غير العقد و العرس...فرحتي كانت كبيرة بزاف لدرجة حاس قلبي راح يطرطق و يخرج من بلاصتو باسكو ماراهش قادر يهزها و يستوعبها...و حتى فرحة يما و خالتي ليا و ياسر زادت خلاتني نحس براحة اكبر...مازال صوت تزغريتة يما بعدما حكيتلها كلش تضرب في ودني و دموع فرحتها مازال حاس بيهم على يدي و انا نمسح فيهم....اللقطة كي جبدتني لحضنها و قعدت تبوس فيا و تحمد في ربي لي خلاها تعيش نهار خطوبتي و تفرح بيا جامي لا ننساها...المشاعر هادو قاع مانيش قادر نعبر عليهم و ندور ندور و نرجع نقول غير الحمد لله يا ربي لي سهلتلي و كملتلي واش كنت حاب...
تنهدت بالقاوي و انا مازال نتبسم و نخزر للسقف بعدما حطيت يدي...من بعد دُرت على كرشي و هزيت تلفوني و صونيت لليساء...في الاول نيميروها كنت كاتبو عندي باسمها برك و درك خلاص بدلتو و رجع خطيبتي و حتى الاسم هادا رجعت كي نشوفو في تلفوني نحس كرشي تزغرت من الفرحة...
كنت مازال نتبسم و سالخ سناني كي البهلول حتى سمعت صوتها...
ليساء:الو
جربت نجمع روحي شوية و نرزان باش مانبينش بلي راني ذايب من الفرحة و تروح الرجولة تاعي قاع في خبر كان...
حمزة:سلام...واش راكي لباس؟
ليساء:الحمد لله و نتا واش راك؟
حمزة:الحمد لله..خالتي وردة راها مليحة؟
ليساء:الحمد لله...بعدما رحتوا نتوما زادت شوية برك و رقدت...تعبت اليوم من قعدة الكرسي بزاف
حمزة:ربي يشافيها ان شاء الله
ليساء:ان شاء الله...ايه و نتوما وصلتوا للدار بخير؟
حمزة:الحمد لله...حتى انا يما و خالتي كي رجعنا دخلوا ديراكت رقدوا شوية مي درك ناضت خالتي و راها دير في العشا
ليساء:ايا مليح
سكتنا شوية مالاقيينش واش نهدروا و واش نقولها ..كنا بزوج بينا مازال ماتعودناش على فكرة بلي رانا مخطوبين و كنت حاس بلي مازال كاين هاديك الرسمية و الحدود بيناتنا على بيها قررت نكسرهم و قلت...
حمزة:علبالك مازال مانيش مستوعب بلي خلاص نخطبنا...من قوة لي جاز كلش بلخف حاس روحي كنت نحلم
ليساء: يا ريتو كان حلم
كي سمعتها واش قالت وجهي تبدل و تبسيمتي تبخرت...جمعت روحي و قعدت نيشان و انا عاقد حواجبي خايف من واش راح نزيد نسمع..
أنت تقرأ
صراع إمرأتان
Romanceيقولو ناس زمان همك يجيك من دمك و انا نقول قادر الرحمة لي تلقاها في الغريب ماتلقاهاش في لقريب... لكرونيك تحكي على زوج بنات تجمعهم الصدفة في وقت تكون فيه ظروفهم حطمتهم و تعبتهم..زعما يلقاو الخير في بعضاهم؟و زعما يكون كاين حب في حياتهم؟
