صراع إمرأتان

الفصل السادس

حطيت واش كنت هازة في يدي و جيت راح نفتح الباب تاع شومبرتي باش ندخل حتى نحس بيد نحطت على كتفي و جبدتني بالقاوي حتى خبطت في الحيط لي كان مورايا...شهقت بالقاوي من الوجع و انا مغمضة عينيا...من بعد فتحتهم غير بلعقل نشوف شكون هادا لي دار فيا هاد الشي..لقيتها طفلة باين من وجهها كلوشار و ماتخافش...ماكياج كومبلي و اللبسة تقدرو تقولو مكانش...جاية طويلة و معمرة دير زوج بيا...و شعرها ناقص ضارب لكتافها...

خزرت فيا من لفوق لتحت بشوفة متعجبش حتى من الخوف حسيت روحي راح نتغاشى و بديت نعرق...

الطفلة1: واش جديدة هنا؟

هي كانت واقفة اون فاص ليا و تكمي و الدخان لي يخرج من فمها تنفخو عليا حتى رجعت نسعل بالقاوي حاسة روحي راح نجيف..و عينيا بداو يحرقو فيا من الدخان...خزرت فيها و انا نحرك في يدي قدام وجهي باش نبعد الريحة و نسعل..

ليساء:ايه

الطفلة1:(خزرت فلي موراها) باينة خوافة

كملت كلامها و دارت شافت فيا و هي تتبسم على جنب و انا من الخوف جسمي كلو كان يرجف...هاداك وين فهمت واش ربح جدي كي بدلي لاشومبر...يعرفني خوافة و حطني هنا باش في نهاري نرجع للدار هاربة بصح والله لوكان نحس ناكل الضرب صباح و عشي غير قرايتي لي نكملها و غير ديبلوم الدونتيست لي نهزو بين يديا...

خزرت فيها بلا مانجاوبها و الرعب باين في وجهي و بيان سور هوما كي شافوني هاكك ماحبوش يضيعو الفرصة و تم تم الشاف لي ضربتني  دارت خزرت في لبنات لي كانو موراها و لي تقدرو تقولو نسخة منها...و دارتلهم براسها تاع روحو لجيهة قشي..خزرت فيهم لقيتهم هزو لافاليز تاعي و فتحوها و بداو يجبدو في القش و يقيسوه على رواحهم غير من الفوق و انا نخزر فيهم مشوكية..و هوما يقسمو في قشي اون فاص ليا نورمال...كي فطنت نطقت و انا نرجف بالخوف حتى صوتي قريب منسمعش...و انا نرمي في الخطوة جيهتهم ناوية نحبسهم...

ليساء:صوالحي

انا نطقت و تحركت من بلاصتي و الطفلة لي كانت واقفة في وجهي حكمتني من حجابي و حكمت حتى شعري معاه و جبدتني لتالي حتى عيطت من الوجع و الدموع تعمرو في عينيا..

الطفلة1:وين بيها؟

حطيت يديا على يديها نجرب نفك شعري و انا مطوية على زوج...و خزرت فيها و دموعي وحدهم بداو يهبطو..

ليساء:تعيشي اطلقيني

الطفلة1:راح نطلقك ماتخميش صبري نكمل شغلي برك

ليساء:تعيشي قوليلهم يحبسو و يخليولي صوالحي

تبسمت على جنب و من بعد هزت واحد من يديها و حكمتني من خدودي و زيرت عليهم حتى فمي حسيتو تكسر من لوجع..

الطفلة1:ماراحش ندوهم كامل غير ماتخميش..راح نهزو واش نحبو برك

ليساء:حرام عليكم والله....