صراع إمرأتان

الفصل 22

******ليساء تحكي******

مرات نسمعوا بحكايات من قوة الشوك مانقدروش نستوعبوهم...نكذبوهم و نرفضوهم و نهاجموا الناس لي قالتهم على اساس هوما تشويه للمجتمع و قصص ماكانش منها...من قوة مايكونوا قباح و صعاب عقلنا مايقدرش يفهمهم و قلبنا مايتقبلهمش و نجربوا بقاع واش نقدروا نحاربوهم و نحبسوهم برك باش مانتشوكاوش في الواقع لي رانا عايشينوا...

و حكاية شجن وحدة من هاد الحكايات..حكاية صح كاين اصعب و ابشع منها و كاين ناس عاشوا الدوبل تاع واش عاشت هي بصح هاد الشي مايعنيش بلي هي ساهلة و تجوز بلخف و نقدروا نتقبلوها...

كي كنت نسمع فيها تحكي و هي هاكك محطمة و مدمرة قدامي حسيت روحي خديت ضربة قاوية في روحي و في نفسيتي...لحمي تشوك و قلبي وجعني و حسيت الارض دارت بيا...رجعت ماحاسة بوالو و نسيت همي قاع و حشمت اصلا نزيد نقول عليه هم...تشوكيت و نصدمت و تحطمت و دمرت و بكيت مع كل شهقة خرجت من شجن و جسمي رجف مع كل رعشة دارها جسمها...تخيلت روحي في بلاصتها برك تمنيت نموت و مانجربش الاحساس هاداك...هي تحكي و انا نسقسي في روحي "اذا نتي سمعتي برك الحكاية صرا فيك قاع هاد الشي تسما واش حست هي و واش جوزت كي عاشت قاع هاد الصوالح؟"

لساني في دوك الدقايق لي كانت تحكي فيهم تقال...مالقيت مانقول...حوست على كلمة تهدن شجن و لا على جملة تردلها الروح مي مالقيتش...مخي و قلبي قالولي بلي ماكانش كلمة تنسي طفلة في الاغتصاب...ماكانش كلمة داوي طفلة من جرح الاغتصاب...ماكانش جملة تخفف وجيعة الطفلة لي عاشت الاغتصاب..مهما قلنا مهما حكينا مهما دعمنا و مهما جربنا نحسوا بيها نبقاوا مقصرين...مهما وقفنا قدامها و مهما قلنالها بلي راكي بخير و رانا حاسين بيك نبقاوا فاشلين و ماقادرين نديروا والو...سي فغي الدعم النفسي مهم و سي فغي كي نوقفوا معاهم  نجبروا بخاطرهم و نخففوا عليهم بصح اذا قلنا كلامنا داواهم و نساهم نكونوا نكدبوا على رواحنا و عليهم برك...

الشرف هو اغلى حاجة تملكها البنت...تاج راسها و راس اهلها و والديها...هو الامانة لي تقبل تموت و ماتضيعهاش في الحرام...هو دنيتها...هو كلش في حياتها...الشرف في مجتمعنا العربي و الاسلامي هو راس مال البنت و كنزها الغالي و كي تخسروا تحس بلي خسرت حياتها و كلش يظلام في عينيها...

لي تخسروا بارادتها في لحرام و تندم و تتحطم فما بالك بوحدة كانت حامياتوا بقاع واش تقدر و فاقت نهار و مالقاتوش...وحدة لي وعدت روحها و وعدت والديها بلي تصونو و تموت و ماتقبلش يروح منها و جا نهار و داوه منها بسيف ...وحدة لي عيطت و كسرت و حاربت و رفضت و دارت قاع واش تقدر مي في لخر لقات روحها خاسرة...لقات روحها محرومة من اعز حاجة كانت عندها بسبة وحش مارحمهاش و لي تقتل كتر انو الوحش هادا عاشت معاه حياتها كلها و توقعت منو الحب و الحفظ و الصون...توقعت منو غير الخير بصح هو كلالها لحمها و رماها... لي تقتل كتر هو المجتمع لي يزيد يكمل عليها..المجتمع لي يزيد يشككها في روحها....المجتمع لي يلومها و لي يمسح فيها كلشي بلا مايحوس يفهم...المجتمع لي يدير قاع واش يقدر و يستغل الدين كيما يحب هو برك باش يبرأ المذنب و يحميه باسكو هو الراجل...لي تقتل كتر هو كلام ناس لي يزيد يدبحها و يقتلها و يحطم واش بقى صالح فيها في بلاصة مايصلح واش تحطم فيها...