صراع إمرأتان

الفصل الخامس عشر

كي حسيت بيها حضنتني و جبدتني لعندها غمضت عينيا و قعدت كيما كنت عاطيتها بالظهر..عمري في حياتي ماتخيلت بلي راح يجي نهار و نزعف من ماما و لا نعاملها بالبرود هادا...عمري ماتخيلت اصلا بلي راح يجي نهار و نتوجع و يكون هي عندها يد في وجيعتي حتى لقيت روحي نعيش في هاد المشاعر و هاد النهار...

كي حست بيا بلي مابدلتهالش الحضن..جبدتني عندها كتر و حطت يدها في شعري تلعب بيه و بدات تحكي..

وردة: علبالي راكي زعفانة مني و موجوعة بسبة ضعفي..و علبالي بلي الحالة هادي لي راكي فيها درك سبابها انا خاطر مانقدرش ندافع عليك و لا نخرجك من غبينتك و الهم لي راكي فيه بصح والله غير الله غالب عليا يا بنتي..شحال من مرة جربت و حاولت و ماقدرتش...كنتي مازالكي صغيرة و سييت نخرج من هنا و نبدا وحدي من صفر بصح مانجحتش...ماكنتش قادرة نتخيل بلي راح نغضب بابا و نعيش حياتي قاع و هو ماشي راضي عليا على بيها في كل مرة كنت نرجع و نقول اللهم الدموع و لا نكتب عند ربي بنت عاقة بوالدها...كنت راضية بالهم و المزيرية مادام نتي ماراهمش يمسوك و ماراهمش يدناولك...سكت المرة الاولى كي دناولك بسبة الطفل هاداك و بنت خويا و قلت ماعليش سوء تفاهم برك و ماتتعاودش...و في المرة الثانية خممت نهربك و نخليك تكملي قرايتك بصح كي وقفتي نتي في وجههم قلت خلاص راهي فرات و ماشي محتاجة بصح اليوم....

لحقت لكلمة اليوم و تنهدت و سكتت...ستنيتها تكمل بصح والو...رجعت درت لعندها و حطيت عينيا في عينيها و قلت...

ليساء:بصح اليوم واشنو؟؟

حطت يدها على خدي و تبسمت مالغري الدموع كانو على خدها راسمين طريق و كملت تحكي....

ماما:بصح اليوم كي شفت وجههك مور ماضربوك و شفت وجهي انا في المراية مور واش صرا عرفت بلي لوكان نصبر ميات عام فوق واش صبرت ماراح يتبدل والو...و عرفت بلي سواء كان سوء تفاهم و لا غلطة تاع الصح راح يبقاوا على الطالعة و الهابطة يضربوك و يحرقولي قلبي عليك...عرفت بلي لوكان نبقى نخمم حياتي وافية في رضاية بابا عمرو و لا راح يرضى و لا راح يقبلني بنتو و يحسبني من دمو و لحمو و عرفت بلي خلاص جا لوقت باش نحط النقاط على الحروف

كي سمعت جملتها الاخيرة قعدت بالزربة و انا نتبسم و نخزر فيها...مسحت دموعي لي هبطو بسبة كلامها و قلت و الفرحة خارجة من عينيا..

ليساء:راح نروحو من هنا ماما؟؟خلاص قبلتي و راح نبعدوا؟؟

تبسمت معاي و قعدت كيفي...خزرت في يديا و حكمتهم حطتهم بين يديها من بعد رجعت ركزت في عينبا انا...

ماما:نتي برك لي راح تبعدي

الضحكة مرة وحدة راحت من وجهي...و فرحت عينيا قلبت صدمة و وجيعة...مخي ماحبش يستوعب واش قالت و قلبي حسيتو نقسم في النص من قوة واش سمعت...و بسيف باش قدرت ننطق و انا حاسة كل حاجة فيا ترجف..