#خُلِقَتْ_حُرّة
#الحلقه8
جنـــــــــــان .....
فتحت فمي بصدمه من تمثيله و اقسم بالله بليس قاعد خايف من عمايله في لمح البصر قلب الموضوع ع بابا و معاذ ، فعلا ماخشش محامي من فراغ الخبث يجري في دمه
تضاربو بين بعضهم هوا و معاذ و انا مصبيه متشمته ، ماحد فيهم غلب الثاني هما الثنين كلو نصيب حلو مسح كبدي فيهم ، لحد مادخلو ضنا عمامي و فكوها و طبعا ك العاده القاضي جدي جا يحل ف المشكله و خشينا ف المحكمه أأ قصدي المربوعه
مصعب : شاف ل بابا ، آسف ياعمي نسيت نقولك لكن انا خذيت الاذن من جدي و بعد كلمته مش حتعلى كلمه
خبيث و نذل يلعب ع الوتر الحساس ،
بابا : بس مهما و كان كنت جيت قتلي عارف ان بعد كلمة باتي مافيش كلمه لكن اقل شي يكون عندي علم بنتي وين تطلع
شايب النحس مقنعز ورافع راسه " يا أرض اشتدي ماحدى ادي " وحاط عكوزه قدامه و يديه ع العكوز و بجمود
جدي : معاك حق ياخليفه و اهو مصعب حيحب ع يدك و راسك و يستسمح منك لكن نحن عارفين ضنانا مش حيديرو غلط
جنان : مدام عارفيني مش حندير غلط ليش ماتخلوني ندير نقال و نكمل قرايتي و...
معاذ : جناااااان
جنان : لساني بروحه و حطت يدها ع فمها
مصعب : مسك ضحكته بصعوبه و صبى باس يد خليفه و راسه ، سامحني ياعمي لكن جت ع السريع والله و اطمن مستحيل ندير شي يخالفك
خليفه : تنهد ، مسامح بس معش تكرروها
مصعب : ان شاءالله
جنان : حطت كراع ع كراع و يديها ع ركبتها ، والله انا ماعاد فهمتكم كان قلت مانبيهش ننضرب و كان طلعت معاه ننضرب يعني..
مصعب : فنص عيونه فيها عشان تسكت
جنان : رفعت كتوفها ، عليش تفنص هذا الحق
جدي : حيجي يوم و نقطعه لكي بيدي لسااانك
جنان : كان قطعت لسان عزوز النحس حني من ايام شبابك مش توا و انت حتى ماقدر تمشي وهزت راسها ، وراثه وراثه
معاذ : صبى بيقرب عليها وقفه صوت جده
جدي : معاااذ
معاذ : سكر ع يده بعصبيه ، جدي خليني نربيهاا
جدي : كان في حد يحاسبها من بعد توا هوا مصعب
معاذ : رفع حاجبه ، لما تجي عنده يتكلم مدام هيا في حوش باتي نحن مسؤولين عليها
خليفه : معاذ اسمع كلام جدك
اما مصعب كان طول الحديث ساكت بخبث عشان ينحط الحق ع معاذ ، صبت جنان و تثاوبت
جنان : خليكم انتو متعاركين ع من يربيني و انا بنعدي نكمل نومي و لما تتفقو وعوني ، اه ياجدي الجميل انبصر معاك امبدري قاعد ماشاءالله سبع العشرين ورا معاذ امبدري قالي كلام عيب و سب عليا الدين ، هيا سلام
طلعت و خلتهم فاتحين فمهم من وقاحتها ، اما خليفه صفق يديه بقلة حيله منها ،
جدهم : عقد حواجبه ، معاذ صح الكلام هذا
معاذ : نزل راسه ، صح
جدهم : تنهد ، صبي اعتذر من ولد عمك و سلمو ع بعضكم
