الفهد الأسود ( الجزء الثاني )

الفصل الثامن

رواية | الفهد الأسود |
( الفصل الثامن الجزء الثاني )
________________________________________________
_ فيروز بصتلهم جامد وهي مش مصدقة اللي بيتكلموا فيه واتكلمت بعصبية :-
_  انتوا رايقين صح ؟ انتوا متعرفوش أنا كنت واقفة قدامه عاملة إزاي بعد ما هزقني

_ رشا عيونها وسعت :-
_ اوبا وقعتي تحت أيد اللي مبيرحمش سمعت إنه شديد اوي ومش بيحب الغلط

_ سها ضحكت وردت عليها :-
_ بصراحة يا بنات هو يتحب كده ويدخل القلب بعيداً بقا عن شخصيته ..

_ فيروز حست بوخزة في صدرها لما سمعت كلام سها ومكنتش طايقاها خالص ، رشا بصت علي الباب وبصتلهم :-
_  شوفتوا المزة اللي مستر هشام معاها في الميتنج ؟!

_ فيروز حواسها كلها انتبهت لرشا اللي وقفت وبصتلهم :-
_  دي لابسة جيب جلد اسود ورجليها كلها باينة وعليها بلوزة بيضة شفافة خالص جسمها كله ظاهر ، بس حتة مزة فورتيكة بياض ايه وشعرها دهبي وعيونها خضرة وهي وحيدة وسط جيش من الرجالة ربنا يستر عليها

_ سها غمزت لها :-
_  لأ إحنا لازم نشوفها لايف ونشوف مستر هشام بيتعامل معاها ازاي ؟

_ رشا ضحكت بخبث :-
_ اشطا يلا بينا

_ رشا بصت لفيروز :-
_  هتيجي معانا يا فوفو ولا انتي ملكيش في الجو ده ؟

_ فيروز وقفت فجاءة وهما ضحكوا وخرجوا التلاتة مشوا في الممر الطويل اللي فيه اوضة الاجتماعات ، وقفوا علي بعد ، كانوا شايفين كل اللي بيحصل بوضوح لأن الاوضة متقفلة إزاز ، هشام كان واقف بيشرح شغله علي الشاشة وكان باين بوضوح قدامهم ، فيروز عيونها كانت عليه وهو بيتكلم سرحت فيه وابتسمت وهي مركزة مع ملامحه ،

_ هشام خلص الميتنج ولمح فيروز والبنات اللي واقفين معاها واستغرب وقفتهم ، نهي الإجتماع وخرج برة ورشا وسها أول لما شاوفوه جروا علي مكاتبهم ، وفيروز ملحقتش تتحرك من مكانها لما هشام نادي عليها :-
_ فيروز !.

_ فيروز برقت بصدمة لما نادي عليها وملقتش البنات واقفين معاها هي لوحدها في وش المدفع , أخدت نفس واتحركت عنده وهو سألها بإستفسار :-
_ واقفة عندك بتعملي ايه ؟

_ فيروز بصتله كتير وهي مش عارفة ترد تقول ايه ؟! هشام هز راسه وسألها تاني :-
_ بسألك علي فكرة واقفة عندك ليه ؟

_ الوفد خرج من أوضة الاجتماعات وكان بمثابة طوق نجاة لفيروز اللي أخدت نفسها بإرتياح ، كلهم سلموا علي هشام وكريستين خرجت آخر واحدة وبصت لهشام بإعجاب :-
_ Iam very happy to meet you and I hope to meet you as soon as possible , You are gentleman and polite , and I had the honor to know you  
( أنا سعدت بلقائك جدا واتمنى اقابلك في أقرب فرصة ، انت جنتل مان ومهذب وأنا اتشرفت بمعرفتك )

_ هشام ابتسم بعملية ورد عليها بود :-
_ Thank you for your kindness, the honor for me
( شكراً علي لطفك ، الشرف ليا أنا )